އިސްލާމްދީނަށް ފުރައްސާރަ ކުރި ކަމުގެ ތުހުމަތުގައި ޕާކިސްތާނުގައި ގްރޫޕަކުން ހަމަލާ ދީ އަނިޔާވެރި ގޮތަކަށް ސްރީލަންކާގެ ރައްޔިތަކު މަރާލި މައްސަލައިގައި ހަ މީހަކު މަރަން ހުކުމްކޮށްފި އެވެ.
އޭގެ އިތުރުން ވެސް ކޯޓުން ވަނީ ގިނަ އަދަދެއްގެ މީހުންނަށް ދެ އަހަރާއި އުމުރު ދުވަހުގެ ޖަލު ހުކުމަކާ ދެމެދުގެ ހުކުމްތަކެއް އިއްވާފަ އެވެ.
މިދިޔަ ޑިސެމްބަރު މަހު ހިނގި މަރާ ގުޅިގެން ގިނަ ބަޔަކު ނުރުހުން ފާޅުކުރި އިރު، އޭރު ބޮޑު ވަޒީރުގެ މަގާމުގައި ހުންނެވި އިމްރާން ހާން ސިފަކުރެއްވީ އެއީ ޕާކިސްތާނަށް ލަދުވެތި ދުވަހެއްގެ ގޮތުގަ އެވެ.
ޕާކިސްތާނުގެ ސިއަލްކޮތު ޑިސްޓްރިކްޓުގައި ފެކްޓްރީ މެނޭޖަރެއްގެ ވަޒީފާ އަދާކުރަމުން ދިޔަ ޕްރިޔަންތަ ދިޔަވަދަނަގެ ގައިގައި ތަޅައި އަނިޔާކޮށް މަރާލުމަށް ފަހު ހަށިގަނޑުގައި ރޯކޮށްލި އެވެ.
ހޯމަ ދުވަހު ޕްރޮސެކިއުޓަރުން ބުނީ ދައުވާ ކުރި 89 މީހުންގެ ތެރެއިން 88 މީހުންގެ މައްޗަށް ކުށް ސާބިތުވެފައިވާ ކަމަށެވެ. ހަ މީހުންނަށް މަރުގެ ހުކުމް، ނުވަ މީހުންނަށް އުމުރު ދުވަހުގެ ޖަލު ހުކުމް އަދި ބާކީ ތިބި މީހުންނަށް 2-5 އަހަރުގެ ޖަލު ހުކުމް އިއްވި އެވެ.
އިސްލާމްދީނާއި ކީރިތި ރަސޫލާ އަށް ފުރައްސާރަ ކުރުމަކީ ޕާކިސްތާނުގައި ބޮޑު ކުށެކެވެ. އެފަދަ ކަމެއްގެ ތުހުމަތު ކުރެވޭ މީހާއާ މެދު ޕާކިސްތާނު ރައްޔިތުން ވަރަށް ގިނަ ފަހަރު އަމަލު ކުރަނީ އަނިޔާވެރިކޮށެވެ.
