ސަރުކާރަށް ގޯސް ނިންމުންތަކެއް ނިންމިފައިވާ ކަމަށާއި އެ ކަންކަން އިސްލާހް ކުރަން ޖެހޭ ކަމަށް ސްރީލަންކާގެ ރައީސް ގޮތަބަޔާ ރާޖަޕަކްސަ ވިދާޅުވެއްޖެ އެވެ.
ހޯމަ ދުވަހު ހުވާކުރި އާ ކެބިނެޓް މިނިސްޓަރުންނާ މުހާތަބު ކުރައްވަމުން ގޮތަބަޔާ ވިދާޅުވީ ދަނޑުވެރިކަމުގައި ކެމިކަލް ބޭނުން ކުރުން މަނާ ކުރުމަކީ ގޯސް ނިންމުމެއް ކަމަށެވެ.
ގަސް ކާނާ ބޭނުން ކުރުމުގައި ހުރަސްތައް ދިމާވުމުން ދަނޑުވެރިކަމަށް އަސަރު ކުރާނެ ކަމަށް ބުނެ، ލަންކާގެ ދަނޑުވެރިންނާއި ގިނަ ތަޖުރިބާކާރުން މީގެ ކުރިން ކަންބޮޑުވުން ފާޅުކުރި އެވެ.
އޭގެ އިތުރުން ގައުމަށް ދިމާވެފައިވާ އިގްތިސާދީ އަދި މާލީ ކާރިސާއިން އަރައިގަތުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީއަށް އެދެވުނީ މާ ލަހުން ކަމަށް ގޮތަބަޔާ ވިދާޅުވި އެވެ.
އައިއެމްއެފްގެ އެހީތެރިކަން ހޯދާ ނަމަ، އެ އިދާރާގެ ގިނަ ޑިމާންޑުތަކަށް ލަންކާއިން ބޯލަނބަން ޖެހޭނެ ކަމަށް ބުނެ، ސަރުކާރުގައި ހިމެނުނު ބައެއް އިސްވެރިން ކުރިން އެކަމާ ދެކޮޅެވެ.
އެހެން ނަމަވެސް، ލަންކާ ސަރުކާރުން އެންމެ ފަހުން ވަނީ އައިއެމްއެފްގެ އެހީއަށް ރަސްމީކޮށް އެދިފަ އެވެ. ފިނޭންސް މިނިސްޓަރު އަލީ ސަބްރީ މި ވަގުތު ހުންނެވީ އައިއެމްއެފްއާ އެކު މަޝްވަރާއަށް އެމެރިކާގަ އެވެ.
