މާލެ ސިޓީ ކައުންސިލުން މިފަހުން ހުށަހެޅި ބައެއް ވަޒީފާތަކަށް މީހުން ނެގުމަށް ސިވިލް ސާވިސް ކޮމިޝަނުން ހުއްދަ ނުދިންކަމަށް ބުނާ ވާހަކަތައް ދޮގުކޮށް، ބައެއް މަގާމުތަކުގެ ޝަރުތުތަކާއި މުސާރައާ ނުބައްދަލުވާތީ އެކަން އިސްލާހުކުރަން އެންގި ކަމަށް ސިވިލް ސާވިލް ކޮމިޝަނުން ބުނެފި އެވެ.
މާލެ ސިޓީ ކައުންސިލްގެ މޭޔަރު ޑރ. މުހައްމަދު މުއިއްޒު ވަނީ ސިޓީ ކައުންސިލަށް މުވައްޒަފުން ނެގުމުގައި ސިވިލް ސާވިސް ކޮމިޝަނުން ހުރަސް އަޅަމުންދާކަމަށް މި ނޫހަށް ވިދާޅުވެފަ އެވެ. އެކަމާ ގުޅިގެން ސިވިލް ސާވިސް ކޮމިޝަނުގެ ނައިބު ރައީސް އިބްރާހިމް ރަޝީދު މި ނޫހަށް ވިދާޅުވީ، ސިޓީ ކައުންސިލުން އަމިއްލަ ޝަރުތުތަކާއި މުސާރައާއެކު ހަތް މަގާމަކަށް މީހުން ނަގަން ސީއެސްސީއަށް ހުށަހެޅި ކަމަށެވެ.
ސީއެސްސީން ސިޓީ ކައުންސިލަށް އިސްލާހުކުރަން އެންގީ މަގާމުގެ ޝަރުތުތަކާ މުސާރައާ ނުބައްދަލު މަގާމުތަކަށް މީހުން ނެގުމަށް ހުށަހެޅުމުން ކަމަށް ރަޝީދު ވިދާޅުވި އެވެ. އެގޮތުން ސިޓީ ކައުންސިލުން އޯލެވެލް ފެންވަރުގެ ޝަރުތާއެކު މީޑިއާ އޮފިސަރަކަށް 20،000ރ. ރުފިޔާގެ މުސާރައެއް ހުށަހެޅި ކަމަށް އޭނާ ވިދާޅުވި އެވެ.
"މިހާރު އޯ ލެވެލް ފެންވަރަށް ކިޔަވައިގެން، 20،000ރ. މުސާރައެއް ނުދެވޭނެތާ މީޑިއާ އޮފިސަރެއްގެ މަގާމަށް. އޭރުން އެހެން މުއައްސަސާތަކުން ވެސް އެގޮތަށް އަމަލުކުރަން ފަށާނީ. ދެން ސީއެސްސީން ޒިންމާ ނަގަން އޮންނަނީ މިކަންކަމަށް. މަގާމުގެ މުސާރައާ ޝަރުތުތައް ބައްދަލުވާން ޖެހޭނެތާ," ރަޝީދު ވިދާޅުވި އެވެ.
އެ ސަބަބުތަކާހެދި ރަޝީދު ވިދާޅުވީ މުވައްޒަފުން ނަގަން ސީއެސްސީން ގެންގުޅޭ އޮނިގަނޑާ އެއްގޮތަށް އެކަން ކުރިޔަށް ގެންދިޔުމަށް ކައުންސިލަށް އެންގި ކަމަށެވެ. އަދި މީހުން ނެގުމަށް އޮންނަ މިންގަނޑާ ދިމާވާ މަގާމުތަކަށް އެ ކޮމިޝަނުން ހުއްދަ ދީފައިވާނޭ ކަމަށް ރަޝީދު ވިދާޅުވި އެވެ.
ވަޒީފާގެ މުސާރައާއި ޝަރުތުތަކުގެ ހަމަހަމަކަން ދަމަހައްޓައި، ބައްދަލުވާކަން ކަށަވަރު ކުރުމަކީ ސީއެސްސީގެ ޒިންމާއެއް ކަމަށާއި، އެހެންކަމުން އެދޭ ގޮތަކަށް އެދޭ ޝަރުތުތަކާއެކު އެދޭ މުސާރައެއް ދިނުމަށް ހުއްދަ ދެވޭކަށް ނޯންނަކަމަށް އޭނާ ވިދާޅުވި އެވެ.
"އެގޮތަށް އަމިއްލަ މުސާރައާ ޝަރުތުތައް ކަނޑައަޅާނަމަ، އެހެން ހުރިހާ ކައުންސިލަކުން ވެސް އެގޮތަށް އަމަލުކުރަން ބޭނުންވާނެ. އެކަމަކު އެއީ ކުރެވެން އޮންނަ ކަމެއް ނޫން،" ރަޝީދު ވިދާޅުވި އެވެ.
ރަޝީދު ވިދާޅުވީ ގިނަ ބަޔަކަށް އެކަން އެހެން ގޮތަކަށް ހީވެފައި އޮތަސް، މުއައްސަސާތަކުގައި މަސައްކަތްކުރާ ކޮންޓްރެކްޓް މުވައްޒަފުން ވެސް ބަލަނީ ސިވިލް ސާވިސްގެ ބައެއްގެ ގޮތުގައި ކަމަށެވެ. އަދި އެހެންކަމުން އެފަދަ ހާލަތްތަކުގައި ވެސް މުސާރައިގެ ކަންކަން ސީއެސްސީން ބަލަމުންދާނެ ކަމަށެވެ.
އޭނާ އިތުރަށް ވިދާޅުވީ ސިޓި ކައުންސިލުން ހުށަހެޅި ގިނަ މަގާމުތަކަށް ސީއެސްސީން ހުއްދަ ދީފައިވާނެ ކަމަށެވެ. އަދި ނުދީ ހުންނާނީ ވަރަށް މަދު އަދަދެއްގެ މަގާމުތަކަށް ކަމަށް އޭނާ ވިދާޅުވި އެވެ. އެގޮތުން 20،000 ރުފިޔާގެ މުސާރައެއްގައި މީޑިއާ އޮފިސަރަކަށް އެދުނު ހުށަހެޅުން އެއީ އެފަދަ އެއް މަގާމު ކަމަށެވެ.
މުއިއްޒު ވަނީ 360 އެއްހާ މުވައްޒަފުން މިހާރު ތިބި ސިޓީ ކައުންސިލަށް އިތުރު މުވައްޒަފުން ބޭނުންވާ ކަމަށް ވިދާޅުވެފަ އެވެ. ސިޓީ ކައުންސިލަށް މަގާމުތަކަށް މީހުން ނަގަން ފިނޭންސް މިނިސްޓްރީއާ އެލްޖީއޭއިން ހުއްދަދީފައިވާއިރު، ސިވިލް ސާވިސް ކޮމިޝަނުން ހުއްދަ ނުދޭކަމަށް އޭނާ ވިދާޅުވި އެވެ. އަދި އެކަމުގެ ސަބަބުން ކައުންސިލްގެ މަސައްކަތްތަކަށް ބުރޫއަރާކަމަށް މުއިއްޒު ވިދާޅުވި އެވެ.
