ސްރީލަންކާގެ އިގްތިސާދީ ކާރިސާގެ ސަބަބުން ރައްޔިތުންގެ ފިއްތުންތައް ކުރިމަތިވެ، ކެބިނެޓް އެއްކޮށް އިސްތިއުފާ ދިންތާ ދުވަސްތަކެއް ފަހުން، މުޅިން އާ ކެބިނެޓެއް ހޯމަ ދުވަހު ހުވާކޮށްފި އެވެ.
އާ ކެބިނެޓުގައި ހިމެނެނީ 17 މިނިސްޓަރުންނެވެ. ކެބިނެޓް އެކުލަވާނުލެވި ގިނަ ދުވަސްތަކެއް ހޭދަވީ ސިޔާސީ ޕާޓީތަކުން ސަރުކާރާ މެދު ހިތްހަމަނުޖެހުމުންނެވެ.
ޕާޓީތަކުން ޑިމާންޑް ކުރީ ސަރުކާރު އިސްތިއުފާ ދިނުމަށް ފަހު، އިންތިގާލީ ސަރުކާރެއް ގެނައުމަށެވެ. ނަމަވެސް ރައީސް ގޮތަބަޔާ ރާޖަޕަކްސަ ވިދާޅުވީ އިސްތިއުފާ ނުދެއްވާނެ ކަމަށެވެ.
ރައީސް އޮފީސް ކުރިމަތީގައި މުޒާހަރާ ކުރަމުންދާ މީހުންގެ މައިގަނޑު ޑިމާންޑަކީ ވެސް ރައީސް އާއި ބޮޑު ވަޒީރު މަހިންދަ ރާޖަޕަކްސަގެ އިސްތިއުފާ އެވެ. ނަމަވެސް ދެ ބޭފުޅުން މަގާމުގައި ދެމިތިއްބަވާނެ އެވެ.
އާ ކެބިނެޓާ ގުޅުމުގެ ދައުވަތު ސިޔާސީ ޕާޓީތަކުން ގަބޫލުކޮށްފައި ނުވާތީ، މިނިސްޓްރީތައް އަނެއްކާވެސް ހަވާލުކުރަން ޖެހުނީ ރައީސް ނިސްބަތްވެވަޑައިގަންނަވާ ޕާޓީގެ އިސް މެމްބަރުންނަށެވެ.
އާ ކެބިނެޓް ހުވާކޮށްފައިވާ އިރު، އިގްތިސާދީ ކާރިސާއާ ގުޅޭ މަޝްވަރާއަށް ފިނޭންސް މިނިސްޓަރު އަލީ ސަބްރީ އާއި އެހެން އޮފިޝަލުން އާދީއްތަ ދުވަހު ވަނީ އެމެރިކާއަށް ވަޑައިގެންފަ އެވެ.
ނޫސްތަކުން ބުނީ ލަންކާގެ ދަރަނި ރީސްޓްރަކްޗާކޮށް، އިގްތިސާދީ އެހީ ހޯދުމާ ގުޅޭ މަޝްވަރާ އައިއެމްއެފްއާ އެކު ފަށާނީ ހޯމަ ދުވަހު ކަމަށެވެ.
