ޕެރިސް (އޭޕްރީލް 18) - ފްރެންޗް ލީގުގައި މިރޭ ދެ ވަނައިގައި އޮތް މާސޭ 2-1 އިން ބަލިކޮށް، ޕީއެސްޖީން ލީގު ޗެމްޕިއަންކަން ހޯދުމާ ގާތަށް ޖެހިލައިފި އެވެ.
އަންނަ ބުދަ ދުވަހުގެރޭ ނޯންޓެސް އަތުން މާސޭ އަށް މޮޅުނުވެވި، ޕީއެސްޖީ ކުޅޭ މެޗުން އެންޖާސް އަތުން ކުރިހޯދައިިފިނަމަ ޕީއެސްޖީ އަށް ލީގު ޗެމްޕިއަންކަން ކަށަަވަރުކުރެވޭނެ އެވެ.
މިރޭގެ މެޗަށް ފަހު ޕީއެސްޖީ ލީގުގެ އެއް ވަނައިގައި އޮތީ 15 ޕޮއިންޓުގެ ލީޑަކާ އެކު އެވެ. ޕީއެސްޖީ އަށް 32 މެޗުން 74 ޕޮއިންޓް ލިބިފައިވާއިރު، މާސޭ ދެ ވަނައިގައި އޮތީ 32 މެޗުން 59 ޕޮއިންޓް ހޯދައިގެންނެވެ.
ޕީއެސްޖީ ދަނޑުގައި މިރޭ ކުޅުނު މެޗަށް މާސޭ ސަޕޯޓަރުން ނުވައްދަ އެވެ. ފްރެންޗް ފުޓްބޯޅައިގެ މަޝްހޫރު "ލެ ކްލާސިކް" މެޗަށް މާސޭ ސަޕޯޓަރުން ނުވައްދަން ނިންމީ މި ދެ ކްލަބްގެ ކުރިމަތިލުންތަކުގައި ފަހަކަށް އައިސް ސަލާމަތީ ފިޔަވަޅުތައް ވަރުގަދަކުރި ނަމަވެސް ސަޕޯޓަރުންގެ މެދުގައި ހަމަނުޖެހުންތަކެއް ހިނގާފައިވާތީ އެވެ. އެންމެ ފަހުން ދެ ޓީމުގެ ސަޕޯޓަރުން އެކުގައި ދަނޑުގައި ތިބެގެން މެޗެއް ފުރިހަމަކުރެވުނީ 2018 ވަނަ އަހަރު އެވެ.
މިރޭގެ މެޗުގައި ޕީއެސްޖީ އަށް ލީޑުނަގައިދިނީ 12 ވަނަ މިނިޓްގައި ނޭމާ އެވެ. މާކޯ ވެރާޓީ ދިން މޮޅު ބޯޅައަކުން ނޭމާ މި ގޯލު ޖެހީ އޭރިއާތެރެއިން މާސޭގެ ކީޕަރު ޕައު ލޮޕޭޒަށް މާ ބޮޑު ފުރުސަތެއްނުދީ އެވެ.
މެޗުގެ 31 ވަނަ މިނިޓްގައި ކޯނަރަކުން އޭރިއާތެރެއަށް ހުރަސްވި ބޯޅައެއްގައި ޕީއެސްޖީގެ ކީޕަރު އިޓަލީގެ ޖިއަންލުއީޖީ ޑޮންނަރުންމާ ހެދި ގޯހެއްގެ ފައިދާނަގައި މާސޭ އިން އެއްވަރުކުރި އެވެ. މި ގޯލު ޖެހީ ކްރޮއޭޝިއާގެ ޑިފެންޑަރު، ޑޫޔޭ ޖަލޭޓާ-ޖާ އެވެ. އޭގެ ފަހުން ޕީއެސްޖީގެ ލިއޮނަލް މެސީ ޖެހި ދެ ގޯލެއް ވަނީ އޮފްސައިޑް ކަމަށް ނިންމައިފަ އެވެ.
ފުރަތަމަ ހާފު ނިމުމުގެ ކުރިން ޕީއެސްޖީން ވަނީ މެޗުން މޮޅުވި ގޯލު ޖަހައިފަ އެވެ. ފުރަތަމަ ހާފުގެ އިތުރު ވަގުތުގެ ފަސް ވަނަ މިނިޓްގައި މި ގޯލު ޖެހީ ޕެނަލްޓީ އަކުން ކީލިއަން އެމްބާޕޭ އެވެ. މާސޭގެ ވަލެންޓިން ރޮންޖިއޭ އަތުގައި ބޯޅަ ޖެހުނު ކަމަށް ބަލައި ޕެނަލްޓީ ދޭން ނިންމީ ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފަ އެވެ. އެ ނިންމުމާ މެދު މާސޭ އިން ވަނީ ވަރަށް ބޮޑަށް ހިތްހަމަނުޖެހުން ފާޅުކޮށްފަ އެވެ. މި ޕެނަލްޓީން ޖެހި ގޯލަކީ އެމްބާޕޭ މި ފަހަރު ލީގުގައި ޖެހި 21 ވަނަ ގޯލެވެ. ސީޒަނުގެ ހުރިހާ މުބާރާތެއްގެ ޖުމްލަ އަށް ބަލާނަމަ 32 ވަނަ ގޯލެވެ.
މެޗު ނިމެން ފަސް މިނިޓަށް ވެފައި ވަނިކޮށް، ޑިމިޓްރީ ޕަޔެޓްގެ ހިލޭ ޖެހުމަކުން ވިލިއަމް ސަލީބާ ވަނީ ގޯލެއް ޖަހައި މާސޭ އަށް އެއްވަރުކޮށްދީފަ އެވެ. އެކަމަކު، އެ ގޯލު ބަލައިނުގަންނަން ނިންމީ ވީއޭއާރް އިން ބަލައިފަ އެވެ.
ޕީއެސްޖީން މި ފަހަރު ފްރެންޗް ލީގު ކާމިޔާބުކޮށްފިނަމަ މިއީ ފާއިތުވި 10 އަހަރު ތެރޭ އެ ޓީމުން ލީގު ކާމިޔާބުކުރާނެ އަށް ވަނަ ފަހަރެވެ. އަދި ޕީއެސްޖީގެ ތާރީހުގައި އެ ޓީމުން ލީގު ހޯދާނެ 10 ވަނަ ފަހަރެވެ. ޕީއެސްޖީގެ ރައީސް ކަމާާ ގަތަރުގެ މަހުޖަނު ނާސިރު އަލް ހެއްލާފީ ހަވާލުވި ފަހުން އެ ޓީމު ވަނީ މިހާތަނަށް ހަތް ފަހަރު ފްރާންސް ލީގުގެ ޗެމްޕިއަންކަން ހޯދައިފަ އެވެ.
