ސެވިލް، ސްޕެއިން (އޭޕްރީލް 18) - ސްޕެނިޝް ލީގުގައި މިރޭ އިތުރު ވަގުތުގައި ކަރިމް ބެންޒެމާ ޖެހި ގޯލާ އެކު ފަހަތުން އަރައި 3-2 އިން ސެވިއްޔާ ބަލިކޮށް، ރެއާލް މެޑްރިޑުން ލީގު ޗެމްޕިއަން ކަށަވަރުކުރުމަށް މުހިންމު މޮޅެއް ހޯދައިފި އެވެ.
މިރޭގެ މޮޅާ އެކު ރެއާލުން ލީގުގެ އެއް ވަނައިގައި އޮތީ 15 ޕޮއިންޓުގެ ލީޑަކާ އެކު އެވެ. އެއީ ދެ ވަނައިގައި އޮތް ބާސެލޯނާ އަށް ވުރެ ދެ މެޗު އިތުރަށް ކުޅެގެންނެވެ. ސެވިއްޔާ އަތުން ރެއާލަށް މި ލިބުނު ތިން ޕޮއިންޓަކީ ލީގު ޗެމްޕިއަންކަން ހޯދުމަށް ބަލާއިރު، އެ ޓީމަށް ބޮޑު އެޑްވާންޓާޖެއް ނެގޭނެ މޮޅެކެވެ. އެއީ ލީގުގެ ރޭހުގައި އޮތް ޓީމެއް އަތުން ރަށުންބޭރުގައި ހޯދުނު މުހިންމު ތިން ޕޮއިންޓް ކަމަށްވާތީ އެވެ.
ރެއާލަށް 32 މެޗުން 75 ޕޮއިންޓް ލިބިފައިވާއިރު، ބާސެލޯނާ އަށް ވަނީ 30 މެޗުން 60 ޕޮއިންޓް ލިބިފަ އެވެ. ތިން ވަނައިގައި އޮތް ސެވިއްޔާ އާއި ހަތަރެއްގައި އޮތް އެންމެ ފަހުގެ ޗެމްޕިއަން އެތުލެޓިކޯ މެޑްރިޑަށް ވަނީ 32 މެޗުން 60 ޕޮއިންޓް ލިބިފަ އެވެ.
ސެވިއްޔާގެ ސަންޗޭޒް ޕިޒްޗުއާން ސްޓޭޑިއަމްގައި މިރޭ ކުޅުނު މެޗުގެ 21 ވަނަ މިނިޓްގައި ސެވިއްޔާ އިން ލީޑުނެގީ އިވާން ރަކިޓިޗް ވައްދާލި ހިލޭޖެހުމުންނެވެ. ރަކިޓިޗް ފޮނުވާލި އެ ބޯޅަ ހުއްޓުވަން ރެއާލްގެ ކީޕަރު ތިބައު ކޯޓުއާ އަށް މާ ބޮޑު ކަމެއް ނުކުރެވުނެވެ. އޭގެ ހަތަރު މިނިޓް ފަހުން ހެސޫސް ކޮރޯނާ ދިން ބޯޅައަކުން އެެރިކް ލަމޭލާ ވަނީ ގޯލެއް ޖަހައި ސެވިއްޔާ އަށް ދެ ގޯލުގެ ލީޑެއް ނަގައިދީފަ އެވެ. ސެވިއްޔާ އިން ފުރަތަމަ ހާފު ނިންމާލީ ދެ ގޯލު ކުރީގައި އޮވެގެންނެވެ.
ރެއާލުން ދެ ވަަނަ ހާފަށް ކުޅެން ނުކުތީ އެޑުއާޑޯ ކަމަވިންގާގެ ބަދަލުގައި ރޮޑްރީގޯ ކުޅެން އަރުވައިގެންނެވެ. މެޗުގެ 50 ވަނަ މިނިޓްގައި ރެއާލްގެ ޑެނީ ކާވަހާލް ނެގި ހުރަހަކުން ރޮޑްރީގޯ ވަނީ ގޯލެއް ޖަހައި، ރެއާލަށް އުންމީދެއް ހޯދައިދީފަ އެވެ. މެޗުގެ 74 ވަަނަ މިނިޓްގައި ރެއާލްގެ ވިނީޝިއުސް ޖޫނިއާ ގޯލެއް ޖެހި ނަމަވެސް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލާފައި އެ ގޯލު ނުލާން ނިންމީ ވިނީޝިއުސް އަތުން ބޯޅަ ކޮންޓްރޯލް ކުރި ކަމަށް ބަލައިފަ އެވެ.
ފުލުފުލުގައި ރެއާލުން އެޓޭކްކުރަމުންދިޔައިރު، މެޗުގެ 83 ވަނަ މިނިޓްގައި އެ ޓީމުން ދެ ވަނަ ގޯލެއް ޖަހައި ނަތީޖާ ހަމަހަމަކުރި އެވެ. މިއީ ބަދަލަކަށް ކުޅެން އެރި ނަޗޯ ފެނާންޑޭސް ޖެހި ގޯލެކެވެ. ކުޅެން އެރިތާ މާގިނައިރެއްނުވެ ނަޗޯ މި ގޯލު ޖެހީ ކާވަހާލް ދިން ބޯޅައަކުންނެވެ. ރެއާލް މޮޅުވީ އިތުރު ވަގުތުގެ ގޮތުގައި ދެއްކި ހަތް މިނިޓްގެ ތެރެއިން ދެ ވަނަ މިނިޓްގައި ބެންޒެމާ ޖެހި ގޯލުންނެވެ. މިއީ ރޮޑްރީގޯ އޭރިއާތެރެއަށް ވަދެ، ޖައްސާލި ބޯޅައެއް ކޮންޓްރޯލް ކޮށްލުމަށް ފަހު ބެންޒެމާ ޖެހި ގޯލެކެވެ. މިއީ މި ފަހަރު ސީޒަނުގައި ބެންޒެމާ ޖެހި 39 ވަނަ ގޯލެވެ.
ފަހު ވަގުތު ކުރިއަށް ޖެހިގެން ސެވިއްޔާ އިން އިތުރު ގޯލެއް ޖެހޭތޯ ބެލި ނަމަވެސް ކާމިޔާބެއްނުވި އެވެ.
