އަފްގާނިސްތާނުގެ އިރުމަތީގައި އޮންނަ ހޯސްތް އަދި ކުނާރް ޕްރޮވިންސަށް ޕާކިސްތާނުގެ ސިފައިން ދިން ވައިގެ ހަމަލާތަކުގައި މަރުވި މީހުންގެ އަދަދު 47 އަށް އަރައިފި އެވެ.
މިދިޔަ އޯގަސްޓް މަހު އަފްގާނިސްތާނުގެ ވެރިކަމަށް ތާލިބާނުން އައި ފަހުން، ދެ ގައުމުގެ މެދުގައި ބޯޑަރުގެ މައްސަލައިގައި އޮތް ނުތަނަވަސްކަން ވަނީ ބޮޑުވެފަ އެވެ.
ޕާކިސްތާނުން ތުހުމަތު ކުރާ ގޮތުގައި ހަނގުރާމަވެރި ގްރޫޕުތަކުން އަފްގާން ފަސްގަނޑުގައި ތިބެ، ޕާކިސްތާނާ ދެކޮޅަށް ދަނީ ގަވާއިދުން ހަމަލާ އަމާޒު ކުރަމުންނެވެ.
ޕާކިސްތާނުގެ ހަނގުރާމަވެރިންނަށް ރައްކާތެރިކަން ނުދޭ ކަމަށް އަފްގާން ތާލިބާނުން ބުނެ އެވެ. އަފްގާން ތާލިބާނުން އެންމެ ހިތްހަމަނުޖެހޭ މައްސަލައަކީ ދެ ގައުމުގެ 2،700 ކިލޯމީޓަރު ދިގު ބޯޑަރު މެދުގައި ޕާކިސްތާނުން ފެންސެއް ބިނާކުރަމުން ދިޔުމެވެ.
އަފްގާނިސްތާނުން ތުހުމަތު ކުރާ ގޮތުގައި ހޮނިހިރު ދުވަހު ފަތިސް ވަގުތާ ދިމާކޮށް އިރުމަތީގެ ދެ ޕްރޮވިންސަކަށް ވައިގެ ހަމަލާ ދިނީ ޕާކިސްތާނުގެ އަސްކަރީ ހެލިކޮޕްޓަރުތަކުންނެވެ.
ދެ ގައުމުގެ ބޯޑަރު ގުޅޭ ހިސާބުގައި އޮންނަ ދެ ޕްރޮވިންސަށް ދިން ހަމަލާތަކުގައި އާއްމުން ދިރިއުޅޭ ގެތަކަށް ގެއްލުންވި އެވެ. ހަމަލާތަކުގައި މަރުވި މީހުންގެ ތެރޭގައި ގިނައިން ހިމެނެނީ އަންހެނުންނާއި ކުޑަކުދިންނެވެ. އިތުރު 22 މީހުންނަށް އަނިޔާވި އެވެ.
އަފްގާނިސްތާނުގެ އޮފިޝަލަކު ބުނީ އެއް އާއިލާއަކަށް ނިސްބަތްވާ 24 މީހުން މަރުވި ކަމަށެވެ. ހަމަލާތަކާ ގުޅޭ ގޮތުން ޕާކިސްތާނުގެ އަސްކަރިއްޔާއިން މިހާތަނަށް އެއްޗެއް ނުބުނެ އެވެ.
ނަމަވެސް އާދީއްތަ ދުވަހު ޕާކިސްތާނުގެ ފޮރިން މިނިސްޓްރީން އަފްގާން ތާލިބާނުންނަށް ގޮވާލީ އަފްގާނިސްތާނުގައި އުޅޭ ހަނގުރާމަވެރި ގްރޫޕްތައް ކޮންޓްރޯލް ކުރުމަށެވެ.
އެގޮތުން އަފްގާނިސްތާނުން އޮޕަރޭޓް ކުރަމުން ދިޔަ ޓެރަރިސްޓުން ދިން ހަމަލާތަކެއްގައި މިދިޔަ ބުރާސްފަތު ދުވަހު އުތުރު ވަރިޒިސްތާން ޑިސްޓްރިކްޓުގައި ޕާކިސްތާނުގެ ހަތް ސިފައިން މަރުވި ކަމަށް ބުންޏެވެ.
އެ ސަރަހައްދަކީ ޕާކިސްތާނުގެ ތާލިބާނުން އެންމެ ހަރަކާތްތެރި އެއް ސަރަހައްދެވެ. އަފްގާން އާއި ޕާކިސްތާނުގެ ތާލިބާނަކީ ތަފާތު ދެ ގްރޫޕެކެވެ. ނަމަވެސް ދެ ގްރޫޕުން ގެންގުޅެނީ އެއް ފިކުރެކެވެ.
ޕާކިސްތާނުގެ ތާލިބާނުން ވަނީ ރޯދަ މަހުގެ ފުރަތަމަ ދުވަހުން ފެށިގެން ޕާކިސްތާން ސިފައިންނާ ދެކޮޅަށް ހިންގާ ކެމްޕެއިން ވަރުގަދަ ކުރާނެ ކަމަށް ބުނެފަ އެވެ.
ހޮނިހިރު ދުވަހުގެ ވައިގެ ހަމަލާތަކާ އެކު އަފްގާނިސްތާނުގެ ތާލިބާން ސަރުކާރުން ވަނީ ޕާކިސްތާނަށް އިންޒާރު ދީފަ އެވެ. ދެ ގައުމުގެ މެދުގައި ހަނގުރާމައެއް ފަށައިފި ނަމަ އެއްވެސް ބަޔަކަށް ފައިދާ ނުކުރާނެ ކަމަށް އަފްގާން ސަރުކާރުން ބުންޏެވެ.
