މާލެ ސަރަހައްދުން ތިލަފުއްޓަށް ކުނި ގެންދިޔުމަށްޓަކައި އިންޑަސްޓްރިއަލް ޒޯނުގައި އަޅާ ވެމްކޯގެ ވޭސްޓް ޓްރާންސްފާ ސްޓޭޝަންގެ މަސައްކަތް ފަށައިފި އެވެ.
އެ ސަރަހައްދުގައި ކުރިން ހުރި ވެމްކޯގެ އޮފީސް ކުރިން ނަގައިފައިވާއިރު، އެ ސަރަހައްދު މިހާރު އޮތީ ސާފުކޮށް ނިމިފަ އެވެ. އެންވަރަންމެންޓް މިނިސްޓްރީގެ ސްޓޭޓް މިނިސްޓަރު އަލީ ސޯލިހު ވިދާޅުވީ އެތަނުގައި ދެން ކުރިއަށްދާނީ ވޭސްޓް ޓްރާންސްފާ ސްޓޭޝަން އިމާރާތްކުރުމުގެ އަމަލީ މަސައްކަތް ކަމަށެވެ. އެންވަރަންމެންޓް މިނިސްޓަރު އާމިނަތު ޝައުނާ މިއަދު އެ ސަރަހައްދަށް ޒިޔާރަތްކުރައްވައި މަސައްކަތް ކުރިއަށްދާ ގޮތް ބައްލަވައިލެއްވި އެވެ.
މާލޭން ތިލަފުއްޓަށް ގެންދިއުމުގެ ކުރިން ވަގުތީކޮށް ބަހައްޓާ ތަނެއްގެ ގޮތުގައި ވޭސްޓް ޓްރާންސްފާ ސްޓޭޝަނެއް ގާއިމުކުރަން ސަރުކާރުން ނިންމީ މިދިޔަ އަހަރުގެ ޖޫން މަހުގެ ތެރޭ އެވެ. އެއީ 11.8 މިލިއަން ޑޮލަރުގެ ހަރަދުކޮށްްގެން ދޮޅު އަހަރުތެރޭ ނިންމާގޮތަށް ކުރިޔަށް ގެންދާ މަޝްރޫ އެކެވެ.
އެއީ ޓެކްނިކަލް އެސިސްޓެންސް ސްޕެޝަލް ފަންޑް، ޖަޕާން ފަންޑު ފޯ ޕްރޮސްޕަރަސް އެންޑް ރެޒިލިއެންޓް އޭޝިއާ އަދި އޭޝިއަން ޑެވެލޮޕްމެންޓް ބޭންކް (އޭޑީބީ) ގެ އެހީތެރިކަމާއެކު ކުރިޔަށް ގެންދާ މަޝްރޫ އެކެވެ.
އެ މަޝްރޫއުގެ މަސައްކަތް ކުރަނީ ޗައިނާގެ ސްޓޭޓް ކޮންސްޓްރަކްޝަން އެންޑް އިންޖިނިއަރިން ކޯޕަރޭޝަން (ސީއެސްސީއީސީ) އިންނެވެ.
