ކްރިކެޓް ބޯޑް އޮފް މޯލްޑިވްސް (ސީބީއޭއެމް) އިން ކޮންމެ ރަމަޟާން މަހަކަށް ހާއްސަކޮށްގެން ކުރިއަށްގެންދާ ކްރިކެޓް ކާނިވަލުގެ އޮފީސް ޓޭޕްބޯލް މުބާރާތުގައި އިއްޔެ ކުޅުނު މެޗުތަކުން މޯލްޑިވްސް އިންލޭންޑް ރެވެނިއު އޮތޯރިޓީ (މީރާ) އާއި ޕޮލިސް ކްލަބް މޮޅުވެއްޖެ އެވެ.
ކުޅިވަރު އެކުވެނި އެއް ނަމްބަރު ދަނޑުގައި އިއްޔެ ހަވީރު ކުރިއަށްދިޔަ ފުރަތަމަ މެޗުގައި އެމްއެމްއޭއާ ބައްދަލުކޮށް ހަ ވިކެޓުން ކާމިޔާބުކުރީ މިރާގެ ޓީމެވެ. ދެ ވަނަ މެޗުގައި ރައީސް އޮފީސްގެ ޓީމާއި ވާދަކޮށް ޕޮލިސް ކާމިޔާބުކުރީ ހަ ވިކެޓުންނެވެ.
ފުރަތަމަ މެޗް އެމްއެމްއޭ އަށް ޓޮސް ދިމާވުމުން ނިންމީ ބެޓްކުރާށެވެ. އެ ޓީމަށް އަށް އޯވަރުތެރޭ ހަ ކުޅުންތެރިން ނުބައިވެގެން ހެދުނީ 82 ލަނޑެވެ. އެމްއެމްއޭގެ އަބްދުﷲ ރަޝީދު އަބްދުﷲ ވަނީ ނުވަ ލަނޑުއެއްކޮށްފަ އެވެ. މީރާގެ ހުސެއިން އުސައިދު އާއި އަލީ މުއާޒް ކޮންމެ ކުޅުންތެރިއަކު ދެ ވިކެޓް ނެގި އެވެ. ޖަވާބުގައި މީރާ އިން ކުޅެންއަރައި ހަ ވަނަ އޯވަރުގައި 85 އެއްކޮށް މެޗު ކާމިޔާބުކުރި އެވެ. އެންމެ ރަނގަޅަށް ކުޅުނީ 15 ބޯޅައިން 32 ލަނޑު ހެދި މުހަންމަދު ޖިނާހް އާއި 10 ބޯޅައިން 27 ލަނޑު ހެދި ކަމުރުލް އިސްލާމް އެވެ.
އިއްޔެގެ ދެ ވަނަ މެޗުގައި ޓޮސް ދިމާވުމުން ޕޮލިހުން ނިންމީ ފީލްޑް ކުރުމަށެވެ. ރައީސް އޮފީސް އިން ކުޅެން އަރައި އެއް ކުޅުންތެރިއަކު ނުބައިވެގެން 114 ލަނޑު ހެދި އެވެ. އެންމެ ރަނގަޅަށް ކުޅުނީ 14 ބޯޅައިން 33 ލަނޑު ހެދި މުންސެދު މުހަންމަދު އާއި 20 ބޯޅައިން 31 ލަނޑު އެއްކުރި، ނައިބު ރައީސް ފައިސަލް ނަސީމް އެވެ. ޖަވާބުގައި ކުޅެން އަރައި، ޕޮލިހުން ވަނީ 7 ވަނަ އޯވަރުގައި 115 ލަނޑު ހަދައި މެޗުން މޮޅުވެފަ އެވެ. ޕޮލިހުގެ މޫސާ ވަސީމް 13 ބޯޅައިން 31 ލަނޑު ހެދިއިރު، އެ ޓީމުގެ ފަރުޝާން މޫސާ ވަނީ 16 ބޯޅައިން 32 ލަނޑު އެއްކޮށްފަ އެވެ.
ސަރުކާރު އޮފީސްތަކުގެ މެދުގައި ކުޅެވޭ މުބާރާތް މި އަހަރު ރޭވިފައި އޮތީ ދެ ގްރޫޕަކަށް ބަހާލައިގެން ކުރިއަށްދާ ގޮތަށެވެ. އެއީ ކޮންމެ ގްރޫޕަކުން އެންމެ މޮޅު ޓީމެއް ހޮވުމަށް ފަހު ފައިނަލް ކުޅޭ ގޮތަށެވެ. މި ޑިވިޝަނުގައި ބައިވެރިވެފައިވަނީ މޯލްޑިވްސް ކަސްޓަމްސް، މޯލްޑިވްސް އިމިގްރޭޝަން، މީރާ، ދިވެހި ސިފައިންގެ ކްލަބް، ރައީސް އޮފީސް، ޕޮލިސް ކްލަބް، އެމްއެމްއޭ، މުލިއާގޭ ރިކްރިއޭޝަން ކްލަބް، ހަޔާ އެޑިއުކޭޝަން އަދި ޔޫތު މިނިސްޓްރީ އެވެ.
މުބާރާތުގައި މިއަދު ދެ މެޗެއް ކުޅޭނެ އެވެ. ފުރަަތަމަ މެޗުގައި ކްލަބް އިމިގްރޭޝަން ބައްދަލުކުރާނީ ހަޔަ އެޑިއުކޭޝަންއާ އެވެ. ދެ ވަނަ މެޗުގައި އެމްއާރްސީ ބައްދަލުކުރާނީ ޔޫތު މިނިސްޓްރީއާ އެވެ. މެޗުތައް ފަށާނީ 16:00 ގަ އެވެ.
