ސްރީ ލަންކާގެ ރައީސް އާއި ބޮޑު ވަޒީރު ބަދަލު ނުވާ ގޮތަށް މުޅިން އާ ކެބިނެޓެއް އާދީއްތަ ދުވަހު މަގާމުގެ ހުވާ ކުރަން ހަމަޖެހިއްޖެ އެވެ.
ރިޕޯޓުތައް ބުނާ ގޮތުން އާދީއްތަ ދުވަހު އާ ކެބިނެޓުގެ މެމްބަރުން މަގާމުގެ ހުވާ ކުރަން ހަމަޖެހިފައިވާ އިރު، ޒުވާން ބޭފުޅުންތަކެއް މިނިސްޓްރީތަކާ ހަވާލުވާނެ އެވެ.
އާ ކެބިނެޓް ހުވާ ކުރި ނަމަވެސް ރައީސް ގޮތަބަޔާ ރާޖަޕަކްސަ އާއި ބޮޑު ވަޒީރު މަހިންދަ ރާޖަޕަކްސަ މަގާމުގައި ދެމިތިއްބަވާނެ އެވެ.
ލަންކާގެ ރައީސް އޮފީސް ކުރިމަތީގައި އެތައް ހާސް ބަޔަކު އެއްވެ މުޒާހަރާ ކުރަމުން ދާތާ އަށް ދުވަސްވެފައިވާ އިރު، އެ މީހުންގެ އެންމެ ބޮޑު ޑިމާންޑަކީ ރައީސް އާއި ބޮޑު ވަޒީރުގެ އިސްތިއުފާ އެވެ.
މުޒާހަރާގެ ބައިވެރިންނާ ބައްދަލުކުރައްވަން ބޮޑު ވަޒީރު މަހިންދަ ރާޖަޕަކްސަ ހުށަހެޅުއްވި ނަމަވެސް، އެ މީހުން ބުނީ ބައްދަލުކުރަން ބޭނުން ނޫން ކަމަށެވެ.
އެ މީހުން ބޮޑު ވަޒީރަށް ފޮނުވި ސިޓީއެއްގައި ބުނީ ބައްދަލުކުރަން ބޭނުން ނުވާ ކަމަށާއި ބޭނުން ވަނީ ރައީސް ގޮތަބަޔާ ރާޖަޕަކްސަގެ އިސްތިއުފާ އާއި ރާޖަޕަކްސަ އާއިލާގެ ހުރިހާ މެމްބަރުން ސަރުކާރުން ވަކިވުން ކަމަށެވެ.
ސިޓީގައި ފާހަގަކޮށްފައިވާ ރާޖަޕަކްސަ އާއިލާގެ މެމްބަރުންނަކީ ރައީސް ގޮތަބަޔާގެ އިތުރުން ބޮޑު ވަޒީރު މަހިންދަ އާއި ޗަމާލް ރާޖަޕަކްސަ، ބެސިލް ރާޖަޕަކްސަ، ނަމާލް ރާޖަޕަކްސަ، ޝަޝިންދްރަ ރާޖަޕަކްސަ އަދި ނިޕުނާ ރަނަވަކަ އެވެ.
މުޒާހަރާގެ ބައިވެރިން ޑިމާންޑް ކުރަނީ އެ ހުރިހާ އެންމެން ވެސް ސަރުކާރާއި ޕާލިމެންޓުން ދުރަށް ޖެހުމަށެވެ. ސޯޝަލް މީޑިއާގައި ސިޓީ އާއްމު ކުރުމަށް ފަހު މުޒާހަރާގެ ބައިވެރިން ބުނީ ޑިމާންޑްތައް ބަލައިގަންނަން ދެން ހުއްޓާ ނުލައި މުޒާހަރާ ކުރާނެ ކަމަށެވެ.
އެހެންކަމުން، އާދީއްތަ ދުވަހު އާ ކެބިނެޓް ހުވާ ކުރާ އިރު ރައީސް އާއި ބޮޑު ވަޒީރު މަގާމުގައި ދެމިހުންނަވާތީ ލަންކާ ސޯޝަލް މީޑިއާގައި ދަނީ ފާޑުކިޔަމުންނެވެ.
