ސިއްހީ ދާއިރާއަށް ބޭނުންވާ ސާމާނުގެ އެހީއަށް ސްރީ ލަންކާގެ ފޮރިން މިނިސްޓްރީން ޑިޕްލޮމެޓިކް މިޝަންތަކާއި ކޮލޮމްބޯގައި ހިންގާ ބައިނަލްއަގްވާމީ ޖަމިއްޔާތަކުގެ ކިބައިން އެދެފި އެވެ.
އެޕްރީލް 13 ވަނަ ދުވަހު ނެރުނު އެންގުމެއްގައި ފޮރިން މިނިސްޓްރީން ވަނީ ލަންކާގެ ހޮސްޕިޓަލްތަކަށް މި ވަގުތު އެންމެ ބޭނުންވާ ތަކެތީގެ ލިސްޓެއް އާއްމުކޮށްފަ އެވެ.
ފޮރިން މިނިސްޓްރީން ހިއްސާކުރި ލިސްޓުގައި ހިމެނެނީ ބޭހާއި، ކެންސަރުގެ ފަރުވާއަށް ކުރިއަށް އޮތް ހަ މަހަށް ބޭނުންވާ ތަކެއްޗާއި، މާބަނޑު އަންހެނުންގެ ފަރުވާއަށް ކުރިއަށް އޮތް ތިން މަހަށް ބޭނުންވާ ތަކެއްޗެވެ.
އެ އެންގުމުގައި ބުނެފައި ވަނީ ބޭރު ފައިސާގެ ދަތިކަމާ ހެދި ސިއްހީ ދާއިރާއަށް ބޭނުންވާ ސާމާނު ނުލިބޭ ކަމަށާއި ފޮރިން މިނިސްޓްރީން ބޭރުގެ ފަރާތްތަކުގެ އެހީއަށް އެދުނީ ހެލްތު މިނިސްޓްރީގެ ލަފައަށް ކަމަށެވެ.
ލަންކާއަށް ބޭނުންވާ ސިއްހީ ސާމާނާ ގުޅޭ އިތުރު މައުލޫމާތު ލިބޭނީ ހެލްތު މިނިސްޓްރީގެ ކޯޑިނޭޓަރު ޑރ. އަންވަރް ހަމްދާނީއަށް ގުޅައިގެންނެވެ.
ފޮރިން މިނިސްޓްރީން ބުނީ 771214131 009411 ނަންބަރު ފޯނުން، 2669491 009411 ނަންބަރު ފެކްސް އަދި moh.covid.coordinator@gmail.com އިން އިތުރު މައުލޫމާތު ލިބޭނެ ކަމަށެވެ.
