ސްރީލަންކާގެ ކޮލޮމްބޯގައި ރައީސް އޮފީސް ކުރިމަތިން ޓެންޓު ޖަހައިގެން ކުރަމުންދާ މުޒާހަރާގައި ބުރާސްފަތި ދުވަހު ބައިވެރިވި ފުލުހަކާ މެދު ފިޔަވަޅު އަޅަން ނިންމައިފި އެވެ.
ކުއްޓިގަލަ ޕޮލިސް ސްޓޭޝަނުގެ ސާޖަންޓެއްގެ މަގާމު ފުރަމުންދާ ފުލުސް މީހާ ވަނީ ޕޮލިސް ސްޕެޝަން އިންވެސްޓިގޭޝަންސް ޔުނިޓަށް ހާޒިރުކޮށް ސުވާލުކޮށްފަ އެވެ.
އެ ފުލުސް މީހާ މުޒާހަރާ ކުރަމުންދާ "ގޮތަ ގޯ ގަމަ" އަށް ގޮސް، ގައުމުގެ ހާލަތާ މެދު ހިޔާލު ފާޅުކުރި އެވެ. އަދި ކުށްކޮށްފައިވާ މީހުން ދިފާއު ނުކުރުމަށް ފުލުހުންނަށް ގޮވާލި އެވެ.
އޭނާ މުޒާހަރާގައި ހަރަކާތްތެރިވާ މަންޒަރުގެ ވީޑިއޯ ސޯޝަލް މީޑިއާގައި ވަނީ އާއްމުވެފަ އެވެ. ލަންކާގެ ނޫސްތަކުން ބުނާ ގޮތުގައި އޭނާއާ މެދު ވަރަށް އަވަހަށް އިސްލާހީ ފިޔަވަޅު އަޅާނެ އެވެ.
ފުލުހުން ނެރުނު ބަޔާނެއްގައި ބުނީ ފުލުސް މީހާގެ މައްސަލަ ބަލަމުންދާ ކަމަށާއި އޭނާ ޕޮލިސް ސްޓޭޝަނުން ނިކުމެ، މުދާހަރާގައި ބައިވެރިވީ ހުއްދަ ނުހޯދާ ކަމަށެވެ.
އޭގެ އިތުރުން އެ ފުލުސް މީހާއަކީ މީގެ ކުރިން ދެ ފަހަރު ސަސްޕެންޑްކޮށްފައިވާ މީހެއް ކަމަށް ވެސް ބަޔާނުގައިވެ އެވެ. އެއީ ކެނެބިސް ގެންގުޅުމާއި ގަވާއިދާ ހިލާފަށް ލަކުޑި އުފުލުމުންނެވެ.
