ސްރީލަންކާގެ އިގްތިސާދީ ކާރިސާއިން އަރައިގަންނަން މި އަހަރު ހަތަރު ބިލިއަން ޑޮލަރު ބޭނުންވާ ކަމަށް ފިނޭންސް މިނިސްޓަރު އަލީ ސަބްރީ ވިދާޅުވެއްޖެ އެވެ.
ބްލޫމްބާގްއަށް ދެއްވި އިންޓަވިއުއެއްގައި ސަބްރީ ވިދާޅުވީ އިގްތިސާދީ ކާރިސާއާ ގުޅިގެން އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ އެހީއަށް އެދެން ތައްޔާރުވަމުންދާ ކަމަށެވެ.
ރިޕޯޓުތައް ބުނާ ގޮތުން ލަންކާ ސަރުކާރާއި އައިއެމްއެފްގެ އޮފިޝަލުންނާ ދެމެދު މަޝްވަރާތައް ފަށާނީ އެޕްރީލް 18 ވަނަ ދުވަހު ވޮޝިންޓަންގަ އެވެ.
"އަޅުގަނޑުމެން މި އެދެނީ ވީ އެންމެ އަވަހަކަށް އެމެޖެންސީ ފަންޑެއް ދޫކޮށްދިނުމަށް،" މަޝްވަރާ ރަނގަޅަށް ގޮސްފި ނަމަ ދެ ހަފްތާ ތެރޭގައި ފަންޑު ލިބޭނެކަން ފާހަގަކުރައްވަމުން ސަބްރީ ވިދާޅުވި އެވެ.
މި ހަފްތާގައި ލަންކާގެ ލޯނުތައް ޑީފޯލްޓުވެ، ދަރަނި ރީސްޓްރަކްޗާ ކުރުމުގެ މަސައްކަތް ފަށާފައިވާ އިރު، އެކަން ކާމިޔާބު ކުރުމަށް ލަންކާއަށް ފަންޑު މުހިއްމެވެ.
"އަޅުގަނޑުމެން ތަކުރާރުކޮށް މި ދަންނަވާ ވާހަކައަކީ ދަރަނި އަދާ ކުރުމަށް އިހްތިރާމް ކުރާނަމޭ. ދަރަނި ދައްކަން ބޭނުން، އެކަމަކު އެކަމަށް ބޭނުންވާ ފައިސާއެއް މިހާރަކު ނެތް،" ސަބްރީ ވިދާޅުވި އެވެ.
ޗައިނާ އާއި އިންޑިއާ ފަދަ ގައުމުތަކުގެ މާލީ އެހީ ލިބޭނެ ކަމުގެ އުއްމީދު ބޮޑު ކަމަށާއި ފަންޑު ލިބުމާ އެކު ހަރަދު ކުޑަކޮށް، އާމްދަނީ އިތުރު ކުރަން ހަރުދަނާ ފިޔަވަޅުތަކަށް އަޅާނެ ކަމަށް ސަބްރީ ވިދާޅުވި އެވެ.
ލަންކާގެ އިގްތިސާދީ ހާލަތުގެ ސަބަބުން ޒަރޫރީ ތަކެތި ލިބުން ދަތިވެ، ކޮންމެ ދުވަހަކު ވެސް ގިނަ ގަޑިއިރުތަކެއް ވަންދެން ކަރަންޓު ކަނޑަ އެވެ.
އާއްމު ދިރިއުޅުމަށް ހުރަސް އެޅިފައި ވާތީ، ރައްޔިތުން ދަނީ ސަރުކާރުގެ އިސްތިއުފާއަށް ގޮވާލައި މުޒާހަރާ ކުރަމުންނެވެ. އެ މީހުން ބޭނުން ވަނީ ރާޖަޕަކްސަ އާއިލާ ވެރިކަމާ ދުރަށް ޖެހުމަށެވެ.
ރައީސް ގޮތަބަޔާ ރާޖަޕަކްސަގެ އޮފީސް ކުރިމަތީގައި ގިނަ ބަޔަކު ޓެންޓު ޖަހައިގެން މުޒާހަރާ ކުރާތާ ފަސް ދުވަސްވެފައިވާ އިރު، ލަންކާގައި މިއަދު ފާހަގަކުރާ އާ އަހަރާ ދިމާކޮށް ރައީސް ދެއްވި މެސެޖުގައި ގޮވައިލެއްވީ ކެތްތެރިކަމާއި އެއްބައިވަންތަ ކަމަށެވެ.
