ކްރިކެޓް ބޯޑް އޮފް މޯލްޑިވްސް (ސީބީއޭއެމް) އިން ކޮންމެ ރަމަޟާން މަހަކަށް ހާއްސަކޮށްގެން ކުރިއަށްގެންދާ ކްރިކެޓް ކާނިވަލުގެ އޯޕަން ޓޭޕް ބޯލް މުބާރާތުގެ ސެމީ ފައިނަލުގެ ފަހު ދެ ޖާގަ އެއާޕޯޓް ރެކްރިއޭޝަން ކްލަބާއި އެވިއާ މޯލްޑިވްސް އިން ހޯދައިފި އެވެ.
ތިން ގްރޫޕަކަށް ބަހާލައިގެން އޯޕަން ޓޭޕް ބޯލް މުބާރާތް ކުރިއަށްދިޔައިރު، ގްރޫޕް އޭގެ އެއް ވަނަ ހޯދައި ސެމީ އަށް ދިޔައީ ހަތަރު މެޗުން ވެސް މޮޅުވި އޭއާރްސީ އެވެ. ގްރޫޕް ބީ އިން ފުރިހަމަ ރެކޯޑަކާ އެކު ސެމީ އަށް ދަތުރުކުރީ ސަންކުއިކް ލިލީއެވެ. ގްރޫޕް ސީ އިން ސެމީގެ ޖާގަ ހޯދީ ކުޅުނު ތިން މެޗު ވެސް ކާމިޔާބުކުރި މޯލްޑިވްސް އެއާޕޯޓްސް ކޮމްޕެނީ (އެމްއޭސީއެލް) އެވެ.
ސެމީގެ ފަހު ޖާގަ ކަނޑައެޅީ ތިން ގްރޫޕުން އެންމެ ރަނގަޅު ނަތީޖާ ނެރުނު ދެ ވަނަ ޓީމެއް ހޮވައިގެންނެެވެ. އެ ޖާގަ ހޯދީ އެވިއާ މޯލްޑިވްސް އެވެ. ސެމީ ފައިނަލް ފުރަތަމަ މެޗުގައި މާދަމާ ހަވީރު އޭއާރްސީ ބައްދަލުކުރާނީ އެވިއާއާ އެވެ. އެ މެޗަށް ފަހު ދެ ވަނަ ސެމީގައި އެމްއޭސީއެލް އާއި ސަންކުއިކް ލިލީ ބައްދަލުކުރާނެ އެވެ.
މުބާރާތުގައި މިއަދު ހަވީރު ދެ މެޗެއް ކުޅުނެވެ. އެ ގޮތުން ފުރަތަމަ މެޗުގައި މެރީ ކޯނާއާ ބައްދަލުކޮށް ދިވެހި ސިފައިންގެ ކްލަބް މޮޅުވީ 82 ލަނޑުންނެވެ. ޓޮސް ދިމާވުމުން ސިފައިން ނިންމީ ބެޓްކުރާށެެވެ. ކުޅެން އަރައި އަށް އޯވަރުގެ ތެރޭގައި ސިފައިން ވަނީ 163 ލަނޑު ހަދައިފަ އެވެ. އެންމެ ރަނގަޅު ކުޅުމެއް ދެއްކީ 68 ލަނޑު ޖެހި އަހުމަދު ހަސަން އާއި 31 ލަނޑު އެއްކުރި އިބްރާހިމް ހިލްމީ އެވެ. ޖަވާބުގައި މެރީ ކޯނާ އިން ކުޅެން އަރައި އަށް އޯވަރު ހަމަވިއިރު، ހެދުނީ 93 ލަނޑެވެ.
މިއަދު ކުޅެން އޮތް ދެ ވަނަ މެޗަށް ގަލޮޅު ކަންމަތި ބަނަފްސާ ގަޑިއަށް ހާޒިރު ނުވުމުން މެޗުގެ އަމްޕަޔަރު ނިންމީ އެވިއާ މޯލްޑިވްސް މޮޅުވީ ކަމަށެވެ.
