ޔަމަނުގެ ހަނގުރާމަ މެދުކަނޑާލަން ނިންމުމާ އެކު މިހާރު ގާއިމްވެފައި އޮތް ވަގުތީ ސުލްހަ ދަމަހައްޓަން ދެ ފަރާތުން ވެސް ސީރިއަސް މަސައްކަތްތަކެއް ކުރުމަށް އދ. އިން އެ ގައުމަށް ކަނޑައަޅާފައި ހުންނަ މަންދޫބު ބާރު އަޅުއްވައިފި އެވެ.
ޔަމަނުގެ ހޫތީން ކޮންޓްރޯލް ކުރާ ވެރިރަށަށް ކުރެއްވި ޒިޔާރަތެއްގައި ބޭއްވި މަޝްވަރާތަކަށް ފަހު ނޫސްވެރިންނަށް މައުލޫމާތު ދެއްވަމުން ހާންސް ގްރުންޑްބާގް ވިދާޅުވީ މި ވަގުތަށް ސުލްހަ އޮތް ނަމަވެސް އެ ގޮތުގައި ދަހަމައްޓަން ގޮންޖެހުން އެބަ ހުރި ކަމަށެވެ.
އިރާނުގެ އެހީއާ އެކު އުޅޭ ހޫތީންނާއި ޔަމަނުގެ ސަރުކާރަށް އެއްބާރުލުންދޭ ސައުދީ އަރަބިއްޔާގެ އަސްކަރީ ކޯލިޝަނުން ދެ މަހަށް ހަނގުރާމަ މެދުކަނޑާލަން އެއްބަސްވީ ރޯދަ މަހާ ދިމާކޮށެވެ. އެއާ އެކު މީގެ 11 ދުވަސް ކުރިން ހަމަލާތައް މެދުކަނޑާލި އެވެ.
"އެ އެއްބަސްވުމަށް ދެ ފަރާތުން ވެސް އިހްތިރާމް ކުރާ މަންޒަރު އެބަ ފެނޭ. އެކަމަކު ހުރި ގޮންޖެހުންތައް ހަނދާން ނައްތާލައިގެން ނުވާނެ،" ޔަމަނުގެ ވެރިރަށަށް ކުރެއްވި ތިން ދުވަހުގެ ދަތުރު ނިންމަވަމުން ސްވިޑަންގެ ޑިޕްލޮމެޓް ވިދާޅުވި އެވެ.
"ސުލްހަ ދަމަހައްޓަން މި ބަރޯސާ ވަނީ ދެ ފަރާތުގެ އެއްބާރުލުމާއި ސީރިއަސްކަމާ އެކު ކުރާ މަސައްކަތަށް."
ދެ މަހަށް ހަނގުރާމަ މެދުކަނޑާލަން އެއްބަސްވި އިރު، އެއްބަސްވުމުގައިވާ ގޮތުން އެ މުއްދަތު ހަމަވުމުން ވެސް ދެ ފަރާތުން ބޭނުންވާ ނަމަ ހަނގުރާމަ އޮންނާނީ މެދުކަނޑާލާފަ އެވެ. އެފަދަ އެއްބަސްވުމަކަށް އާދެވުނީ އަހަރުތަކެއް ފަހުންނެވެ.
ހޫތީ ހަނގުރާމަވެރިން ވެރިރަށް ސަނާ ހިފައި ގާނޫނީ ވެރިކަމާ ދެކޮޅަށް ނުކުތީ 2014 ވަނަ އަހަރު އެވެ. ސައުދީ އަރަބިއްޔާގެ އަސްކަރީ ކޯލިޝަނުން ހަނގުރާމައިގެ ތެރެއަށް ވަނީ ޔަމަނު ސަރުކާރުގެ އެދުމަކަށެވެ.
ހޫތީންނާ އެކު ސުލްހައިގެ މަޝްވަރާތައް ކުރުމަށް ހާއްސަ ލީޑަރުންގެ ކައުންސިލެއް ގާއިމްކޮށް، މިދިޔަ ހަފްތާގައި ޔަމަނުގެ ރައީސް ވަނީ އެ ކައުންސިލާ ހުރިހާ ބާރުތަކެއް ހަވާލުކޮށްފަ އެވެ. އެނެލިސްޓުން ބުނީ ސުލްހަ ދެމެހެއްޓުމަށް ފެހި ސިގްނަލެއް ކަމަށެވެ.
އދ. އިން ލަފާ ކުރާ ގޮތުގައި އެ ހަނގުރާމައިގައި 400،000 އަށް ވުރެ ގިނަ މީހުން މަރުވެއްޖެ އެވެ. އޭގެ ތެރެއިން 60 ޕަސެންޓު މަރުވީ ބަނޑުހައި ހޫނުކަމާއި، ސިއްހީ އެހީތެރިކަން ނުލިބުމާއި، ސާފު ބޯފެން ނެތުމުގެ ސަބަބުންނެވެ.
