ސްރީލަންކާގެ ވެރިރަށް ކޮލޮމްބޯގައި ޓެންޓު ޖަހައިގެން މުޒާހަރާ ކުރަމުންދާ މީހުން ބޮޑު ވަޒީރު މަހިންދަ ރާޖަޕަކްސައާ ބައްދަލުކުރަން ދެކޮޅު ހަދައި، ދެ ޑިމާންޑެއް ހުށަހަޅައިފި އެވެ.
ބުދަ ދުވަހު ބޮޑު ވަޒީރުގެ އޮފީހުގެ ތަރުޖަމާނަކު ބުނީ މުޒާހަރާގެ ބައިވެރިން ސަރުކާރުގެ އޮފިޝަލުންނާ ބައްދަލުކުރަން ބޭނުން ނަމަ، މަޝްވަރާ ކުރަން މަހިންދަ ރާޖަޕަކްސަ ހުންނެވީ ތައްޔާރަށް ކަމަށެވެ.
ގިނަ އަދަދެއްގެ މީހުން އެއްވެ މުޒާހަރާ ކުރަން ފެށީ މިދިޔަ ހޮނިހިރު ދުވަހުގެ ހެނދުނެވެ. އެ މީހުން ވަނީ ރައީސް އޮފީސް ކުރިމަތިން ނުގޮސް ތިބެވޭނެ އިންތިޒާމް ހަދާފަ އެވެ.
ބޯ ވާރެއަށް ބެލުމެއް ނެތި، އެ ތަނުގައި މުޒާހަރާ ކުރަމުން ދާތާ ހަތަރު ދުވަސްވެފައިވާ އިރު، މުޒާހަރާގެ ބައިވެރިން އެ ސަރަހައްދަށް ނިސްބަތް ކުރަނީ "ގޮތަ ގޯ ގަމަ" ގެ ގޮތުގަ އެވެ.
މުޒާހަރާގެ ޝިއާރުގެ ގޮތުގައި "ގޮތަ ގޯ" ބޭނުން ކުރަކީ ރައީސް ގޮތަބަޔާ ރާޖަޕަކްސަގެ އިސްތިއުފާއަށް ޑިމާންޑް ކުރުމަށެވެ. ސިންހަޅަ ބަހުން "ގަމަ" ގެ މާނައަކީ އަވަށެވެ.
އެ މުޒާހަރާގެ ބައިވެރިން ބޮޑު ވަޒީރަށް ފޮނުވި ސިޓީއެއްގައި ބުނީ ބައްދަލުކުރަން ބޭނުން ނުވާ ކަމަށާއި ބޭނުން ވަނީ ރައީސް ގޮތަބަޔާ ރާޖަޕަކްސަގެ އިސްތިއުފާ އާއި ރާޖަޕަކްސަ އާއިލާގެ ހުރިހާ މެމްބަރުން ސަރުކާރުން ވަކިވުން ކަމަށެވެ.
ސިޓީގައި ފާހަގަކޮށްފައިވާ ރާޖަޕަކްސަ އާއިލާގެ މެމްބަރުންނަކީ ރައީސް ގޮތަބަޔާގެ އިތުރުން ބޮޑު ވަޒީރު މަހިންދަ އާއި ޗަމާލް ރާޖަޕަކްސަ، ބެސިލް ރާޖަޕަކްސަ، ނަމާލް ރާޖަޕަކްސަ، ޝަޝިންދްރަ ރާޖަޕަކްސަ އަދި ނިޕުނާ ރަނަވަކަ އެވެ.
މުޒާހަރާގެ ބައިވެރިން ޑިމާންޑް ކުރަނީ އެ ހުރިހާ އެންމެން ވެސް ސަރުކާރާއި ޕާލިމެންޓުން ދުރަށް ޖެހުމަށެވެ. ސޯޝަލް މީޑިއާގައި ސިޓީ އާއްމު ކުރުމަށް ފަހު މުޒާހަރާގެ ބައިވެރިން ބުނީ ޑިމާންޑްތައް ބަލައިގަންނަން ދެން ހުއްޓާ ނުލައި މުޒާހަރާ ކުރާނެ ކަމަށެވެ.
މީގެ ކުރިން ގައުމާ މުހާތަބު ކުރައްވަމުން މަހިންދަ ރާޖަޕަކްސަ ވިދާޅުވީ މުޒާހަރާ ކުރާ ކޮންމެ ސިކުންތަކު އަގުހުރި ޑޮލަރުތަކެއް ގައުމަށް ގެއްލެމުންދާ ކަމަށެވެ.
އެހެން ނަމަވެސް މުޒާހަރާގެ ބައިވެރިން އެ ވާހަކައަށް އިޖާބަދީފައެއް ނުވެ އެވެ. އެނެލިސްޓުން ބުނާ ގޮތުގައި މަހިންދަ ރާޖަޕަކްސަގެ އެ ހިތާބާ މެދު ގިނަ ރައްޔިތުން ޖޯކު ޖަހައި، ހިތްހަމަނުޖެހުން ފާޅުކުރި އެވެ.
