ޖިނާއީ އިޖުރާއަތުގެ ގާނޫނުގައި ބަޔާން ކޮށްފައިވާ ދައުވާ އުފުލުމުގެ މުއްދަތު ފާއިތުވި ފަހުން ހުށަހެޅި މައްސަލަތަކެއް ކަމަށް ބުނެ ކްރިމިނަލް ކޯޓުން ބޭރުކޮށްލި 22 މައްސަލައަކާ މެދު އަލުން ގޮތެއް ނިންމަން ހައި ކޯޓުން އަމުރުކޮށްފި އެވެ
ޖިނާއީ ކުށްތަކުގެ ތުހުމަތު ކުރެވޭ ފަރާތްތަކާ ދެކޮޅަށް ދައުވާ ކުރަން ޕޮރެސެކިއުޓާ ޖެނެރަލް (ޕީޖީ) އޮފީހުން ކްރިމިނަލް ކޯޓަށް ހުށަހެޅި މި 22 މައްސަލަ ބަލައިނުގަންނަން ފުރަތަމަ ނިންމީ ކްރިމިނަލް ކޯޓުގެ ރަޖިސްޓްރާ އެވެ. ކްރިމިނަލް ކޯޓުގެ ގާޒީންގެ މަޖިލީހުގައި އެ ކަން މުރާޖައާ ކޮށްދޭން އެދި ހުށަހެޅުމުން ގާޒީން ވަނީ ރަޖިސްޓްރާގެ ނިންމެވުމަށް ތާއީދު ކުރައްވައިފަ އެވެ. އެ ނިންމުމުގައި ރިއާޔަތްކޮށްފައި ވަނީ ސުޕްރީމް ކޯޓުން ބާތިލް ކޮށްފައިވާ ހައި ކޯޓުގެ ގަޒިއްޔާއަކަށެވެ.
ހައި ކޯޓުގެ ގަޒިއްޔާ، މުހައްމަދު އަމީން ވ. ޕްރޮސެކިއުޓާ ޖެނެރަލް، ގައި ބަޔާން ކޮށްފައިވާނީ އެއްވެސް މުއްދަތަކަށް ނުވަތަ ޝަރީއަތް ނިމެންދެން ބަންދުކޮށްފައިވާ މީހެއް ނަމަ، އެ މީހަކު ފަނޑިޔާރެއްގެ ކުރިމައްޗަށް ހާޒިރު ކުރެވޭތާ 30 ދުވަހުގެ ތެރޭގައި ޕީޖީ އޮފީޙުން ދައުވާ އުފުލަން ވާނެ ކަމަށެވެ.
ޕީޖީ އޮފީހުގެ ފަރާތުން އެ 22 މައްސަލަ ހައި ކޯޓުގައި އިސްތިއުނާފް ކޮށްފައި ވަނީ އިސްތިއުނާފް ރައްދުވާ ފަރާތެއް ނެތް ގޮތަށް ކުރިއަށް ގެންދިއުމަށެވެ. އެކި މީހުނަށް ތުހުމަތު ކުރެވޭ މައްސަލައެއްގައި، އެ މީހުންގެ ޣައިރު ހާޒިރުގައި ހައި ކޯޓަށް މައްސަލަ ކުރިއަށް ގެންދެވޭނެތޯ ވެސް ސުވާލު އުފެދުނެވެ.
ކޯޓަށް މައްސަލައެއް ބަލައިގަތުމާ މެދު ގޮތެއް ނިންމުމުގެ މަރުހަލާއަކީ މައްސަލައިގައި ހިމެނޭ ދެ ފަރާތަށް ފުރުސަތު ދީގެން ކުރިއަށް ގެންދާ މަރުހަލާއަކަށް ނުވާތީ، އިސްތިއުނާފް ރައްދުވާ ފަރާތެއް ނެތް ގޮތަށް އެ މައްސަލަ ގެންދެވޭނެ ކަމަށް ހައި ކޯޓުން ނިންމި އެވެ.
ހައި ކޯޓުން މި މައްސަލާގައި އިއްވި ހުކުމުގައި ވަނީ، ކްރިމިނަލް ކޯޓުގެ ނިންމުން ބިނާވެފައިވަނީ ސުޕްރީމް ކޯޓުން ބާތިލްކޮށްފައިވާ ހައި ކޯޓުގެ ގަޒިއްޔާއަކަށް ކަމަށް ވުމުން އެ ނިންމުން ބިނާކޮށްފައިވާ ގާނޫނީ އަސާސް ސައްހަ ކަމަށް ބެލެވެން ނެތުމުން ކްރިމިނަލް ކޯޓުގެ ނިންމުން ބާތިލް ކުރަން ޖެހޭ ކަމަށެވެ.
އެހެންވެ ޕީޖީ އޮފީހުން އެ މައްސަލަތައް ހުށަހެޅުމުން އޭގައިވާ ކަންކަމަށް ބަލާފައި އަލުން ގޮތެއް ކަނޑައަޅަން ޖެހޭ ކަންކަން ކަމާއި، 22 މައްސަލަ ޕީޖީ އޮފީހުން އަލުން ހުށަހެޅުން، މައްސަލާގައި ހިމެނޭ ކަންކަމަށް ބަލާފައި އަލުން ގޮތެއް ނިންމަން ހައި ކޯޓުގެ ހުކުމުގައި އަމުރުކޮށްފައިވެ އެވެ.
ހައި ކޯޓުގައި މި މައްސަލަ ބެއްލެވީ ތިން ފަނޑިޔާރުންގެ ބެންޗަކުންނެވެ. އެއީ ރިޔާސަތުގައި އިންނެވި ފަނޑިޔާރު އަލީ ސަމީރުގެ އިތުރަށް ދެން ތިއްބެވި ފަނޑިޔާރު ހުސައިން މަޒީދުއާއި، ފަނޑިޔާރު ފާތިމަތު ފަރުހީޒާ އެވެ. ހައި ކޯޓުގެ ހުކުމް ނެރުނީ ތިން ފަނޑިޔާރުންގެ އިއްތިފާގުންނެވެ.
