ކޮލޮމްބޯގެ ގޯލް ފޭސް ގްރީން ސަރަހައްދުގައި ޓެންޓު ޖަހައިގެން މުޒާހަރާ ކުރަމުންދާ މީހުންނާ އެކު މަޝްވަރާ ކުރަން ސަރުކާރުން ތައްޔާރު ކަމަށް ލަންކާގެ ބޮޑު ވަޒީރު މަހިންދަ ރާޖަޕަކްސަ ވިދާޅުވެއްޖެ އެވެ.
ބުދަ ދުވަހު ބޮޑު ވަޒީރުގެ އޮފީހުގެ ތަރުޖަމާނަކު ބުނީ މުޒާހަރާގެ ބައިވެރިން ސަރުކާރުގެ އޮފިޝަލުންނާ ބައްދަލުކުރަން ބޭނުން ނަމަ، މަޝްވަރާ ކުރަން މަހިންދަ ރާޖަޕަކްސަ ހުންނެވީ ތައްޔާރަށް ކަމަށެވެ.
ގިނަ އަދަދެއްގެ މީހުން އެއްވެ މުޒާހަރާ ކުރަން ފެށީ މިދިޔަ ހޮނިހިރު ދުވަހުގެ ހެނދުނެވެ. އެ މީހުން ވަނީ ރައީސް އޮފީސް ކުރިމަތިން ނުގޮސް ތިބެވޭނެ އިންތިޒާމް ހަދާފަ އެވެ.
ބޯ ވާރެއަށް ބެލުމެއް ނެތި، އެ ތަނުގައި މުޒާހަރާ ކުރަމުން ދާތާ ހަތަރު ދުވަސްވެފައިވާ އިރު، މުޒާހަރާގެ ބައިވެރިން އެ ސަރަހައްދަށް ނިސްބަތް ކުރަނީ "ގޮތަ ގޯ ގަމަ" ގެ ގޮތުގަ އެވެ.
މުޒާހަރާގެ ޝިއާރުގެ ގޮތުގައި "ގޮތަ ގޯ" ބޭނުން ކުރަކީ ރައީސް ގޮތަބަޔާ ރާޖަޕަކްސަގެ އިސްތިއުފާއަށް ޑިމާންޑް ކުރުމަށެވެ. ސިންހަޅަ ބަހުން "ގަމަ" ގެ މާނައަކީ އަވަށެވެ.
މީގެ ކުރިން ގައުމާ މުހާތަބު ކުރައްވަމުން މަހިންދަ ރާޖަޕަކްސަ ވިދާޅުވީ މުޒާހަރާ ކުރާ ކޮންމެ ސިކުންތަކު އަގުހުރި ޑޮލަރުތަކެއް ގައުމަށް ގެއްލެމުންދާ ކަމަށެވެ.
އެހެން ނަމަވެސް މުޒާހަރާގެ ބައިވެރިން އެ ވާހަކައަށް އިޖާބަދީފައެއް ނުވެ އެވެ. އެނެލިސްޓުން ބުނާ ގޮތުގައި މަހިންދަ ރާޖަޕަކްސަގެ އެ ހިތާބާ މެދު ގިނަ ރައްޔިތުން ޖޯކު ޖަހައި، ހިތްހަމަނުޖެހުން ފާޅުކުރި އެވެ.
