އެމެޖެންސީ ބޭސް ގަންނަން ސްރީލަންކާއަށް 10 މިލިއަން ޑޮލަރުގެ ހިލޭ އެހީއެއް ވަގުތުން ދޫކުރަން ވޯލްޑް ބޭންކުން ފާސްކޮށްފި އެވެ.
ފިނޭންސް މިނިސްޓަރު އަލީ ސަބްރީ ވިދާޅުވީ ވޯލްޑް ބޭންކުގެ އެހީ ދޭން ނިންމީ ލަންކާ ސަރުކާރުން ބޭންކުގެ އޮފިޝަލުންނާ އެކު ކުރި މަޝްވަރާއަށް ފަހު ކަމަށެވެ.
ބޭހާއި އެހެނިގެން ޒަރޫރީ ތަކެތި ގަންނަން ބޭނުންވާ 500 މިލިއަން ޑޮލަރުގެ އިތުރު ހިލޭ އެހީ ކުރިއަށް އޮތް ދެ ހަފްތާ ތެރޭގައި ވޯލްޑް ބޭންކުން ދޫކުރާނެ ކަމަށް ވެސް އޭނާ ވިދާޅުވި އެވެ.
ބޭހާއި ސިއްހީ ދާއިރާއަށް ބޭނުންވާ ސާމާނުގެ ދަތިކަން ކުރިމަތިވެ، ސިއްހީ ކުއްލި ހާލަތު ސްރީލަންކާގައި އިއުލާން ކުރީ އެޕްރީލް ފަސް ވަނަ ދުވަހު އެވެ.
ސިއްހީ ކުއްލި ހާލަތު އިއުލާން ކުރުމުން، ދައުލަތުން ސިއްހީ ހިދުމަތްދޭ ފެސިލިޓީތަކުގައި މިހާރު އިސްކަންދޭނީ އެމެޖެންސީ އަދި އަވަސް ފަރުވާއަށް އެކަންޏެވެ.
އެ ގައުމަށް ބޭނުންވާ ބޭސް ގަންނަން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ވެސް ދެ މިލިއަން ޑޮލަރު ފޯރުކޮށްދޭން މި މަހު ނިންމި އެވެ.
ބޭހުގެ ދަތިކަން ކުރިމަތިވެ ސިއްހީ ނިޒާމަށް ބުރޫ އަރާފައި ވާތީ ޑަބްލިއުއެޗްއޯއިން އެހީތެރިކަން ފޯރުކޮށްދޭން ނިންމީ ލަންކާ ސަރުކާރުގެ އެދުމަކަށް ކަމަށް ނޫސްތަކުން ބުނެ އެވެ.
އިގްތިސާދީ ކާރިސާއެއް ކުރިމަތިވެ، ޑޮލަރުގެ ދަތިކަމާ ހެދި ލަންކާއަށް ބޭނުންވާ ޒަރޫރީ ތަކެތީ އިމްޕޯޓް ނުކުރެވުމުގެ ސަބަބުން ކަރަންޓުގެ ހިދުމަތް ކެނޑި އާއްމު ދިރިއުޅުމަށް ވަނީ ބުރޫ އަރާފަ އެވެ.
