ގއ. ކޫއްޑޫ ފިޝަރީޒް ކޮމްޕްލެކްސްގެ ކެޕޭސިޓީ އިތުރު ނުކޮށް ލަސްވާ މައްސަލާގައި ސުވާލުކުރުމަށް ފިޝަރީޒް މިނިސްޓަރު ޑރ. ހުސެއިން ރަޝީދު ހަސަން ރައްޔިތުންގެ މަޖިލީހަށް ހާޒިރުކުރަން މިއަދު ހުށަހަޅައިފި އެވެ.
ދެކުނުގެ މަސްވެރިކަން އިންތިހާއަށް ރަނގަޅުވެ މިފްކޯގެ ކެޕޭސިޓީއަށް ނުތަކާވަރަށް މަސް ބާނަމުންދާތީ މަސް ގަންނަ މިންވަރު އެ ކުންފުނިން ލިމިޓުކުރި އެވެ. އެއީ ދުވަހުން ދުވަހަށް މަސްވެރިން ބާނާ މަސް ކިރުމުގެ ގޮތުން އެޕްރީލް 6 އިން ފެށިގެން މިފްކޯ އިން ކިރަމުން ދަނީ ދޯންޔަކުން ފަސް ޓަނު މަހެވެ.
އެކަމާ ހިތްހަމަނުޖެހިގެން މިއަދު ހެނދުނުގެ ވަގުތެއްގައި ގާތްގަނޑަކަށް 50-100 އާ ދެމެދުގެ އަދަދަކަށް މަސްވެރިން ވަނީ ކޫއްޑޫއަށް އަރައި ހިތްހަމަނުޖެހުން ފާޅުކޮށް، މިފްކޯގެ އިސްވެރިންނާ ބައްދަލުކުރަން ޑިމާންޑު ކޮށްފަ އެވެ. އަދި، ރެއިން ފެށިގެން މިފްކޯ ކަލެކްޓަރު ބޯޓުގައި ހުރި މަސްތައް ނަގައި، އެ ބޯޓުތައް ހުސްކުރުމަށް ވެސް މަސްވެރިން ވަނީ ހުރަސް އަޅައިފަ އެވެ.
ވިލިނގިލި ދާއިރާގެ މެމްބަރު ސައުދު ހުސެއިން ހުށަހެޅީ މައްސަލާގައި ވަނީ ހަތަރު ސުވާލެއް ކުރުމަށެވެ. އެއީ
- ކޫއްޑޫ ފިޝަރީޒް ކޮމްޕްލެކްސްގެ ކެޕޭސިޓީ އިތުރުކުރަން ސަރުކާރުން ރާވާފައިވާ މަޝްރޫއުތަކުގެ ތެރޭގައި ހިމެނޭ ކޯލްޑް ސްޓޯރޭޖް ކެޕޭސިޓީ އިތުރުކުރުމާއި ބަނދަރު ބޮޑުކުރުމުގެ މަސައްކަތް ނުފެށި ލަސްވަނީ ކީއްވެތޯ؟
- މަސްވެރިން ބާނާ މަސް ކޫއްޑުއަށް ލިބޭ ތަނުން ތާޒާކަމާ އެކު ވަގުތުން ދަޅުގައި ބަންދުކޮށް ހަރަދު ކުޑަކޮށް ޕްރޮސެސް ކުރުމަށް ކުއްޑޫގައި ކޭނިން ފެކްޓްރީއެއް ގާއިމް ނުކުރެވެނީ ކީއްވެތޯ؟
- ކޭނިން ފެކްޓްރީއެއް ގާއިމް ކުރުިމަށް އެއްވެސް މަސައްކަތެއް މިހާތަނަށް މިނިސްޓްރީން ކޮށްފައިވާނެތޯ؟
- މަސްވެރިކަން ރަނގަޅު ދުވަސްވަރު މަސް ނުކިރޭ މައްސަލައަށް އެކަށީގެންވާ ހައްލެއް ގެނައުމަށް މިނިސްޓްރީން ކުރަމުންދަނީ ކޮން މަސައްކަތެއްތޯ؟
މަސްވެރިކަން ރަނގަޅުވުމާއެކު ބައެއް ދޯނިތަކުން ވަނީ ދުވާލެއްގެ މައްޗަށް 60 ޓަނުގެ މަސް ވެސް މިފަހުން ބާނައިގެން ކިރުމަށް ކޫއްޑުއަށް ދަތުރުކޮށްފަ އެވެ. ނަމަވެސް، އެހާ ގިނަ ދޯނިތަކަކުން އެއްފަހަރާ އެހާ ގިނަ މަހެއް ކިރުމުގެ ކެޕޭސިޓީ ކޫއްޑޫގަައި ވެސް ނެތުމުން، މިފްކޯއިން ވަނީ އެ ކުންފުނީގެ އުތުރު ހަބުކަމުގައިވާ ފެލިވަރުގައި އޮތް ދެ މަސްކިރާ ބޯޓެއް ކޫއްޑުއަށް ގެންގޮސްގެން މަސްކިރައިފަ އެވެ.
މަސްކިރުން ލިމިޓުކުރީ އެބޯޓުތައް ވެސް ކެޕޭސިޓީ އާ ހަމަޔަށް ދިޔުމުންނެވެ. އެއާއެކު ގިނަ މަސްވެރިން ވަނީ އެކަމަށް ހިތްހަމަނުޖެހުން ފާޅުކުރާ އަދި އެމީހުން ބޭނި މަސްތައް ކަނޑަށް އުކާލާ ވީޑިއޯތަކެއް ސޯޝަލް މީޑިއާގައި ދައުރުވި އެވެ.
މިފްކޯއިން ދަނީ ކޫއްޑޫގެ މަސްކިރުމުގެ ކަންކަމަށް ވަގުތީ ހައްލެއް ގެނައުމަށް ބޭރުން ބޯޓެއް ގެނައުމަށް ވެސް މަސައްކަތް ކުރަމުންނެވެ. ނަމަވެސް، އެކަން ވެސް އަދި ހަމަޖެހިފައެއް ނުވެ އެވެ.
މިނިސްޓަރު ހާޒިރު ކުރުމަށް މަޖިލީހަށް ހުށަހަޅާފައި ވާއިރު، މިދިޔަ އާދިއްތަ ދުވަހުވެސް މިނިސްޓަރު ވަނީ މަޖިލީހަށް ހާޒިރުކޮށްފަ އެވެ. އެއީ ސައުދީ ފަންޑުގެ އެހީގައި ހއ. ދިއްދޫގައި 25 ޓަނުގެ އައިސް ޕްލާންޓެއް ގާއިމުކުރުމުގެ މަސައްކަތް އިއުލާނުކޮށް އެ މަސައްކަތް ކުރިއަށްނުދާތީ އެކަން ސާފުކުރަން ދިއްދޫ ދާއިރާގެ މެމްބަރު އަބްދުﷲ ވަހީދު ކުރައްވާ ސުވާލަށް ޖަވާބު ދެއްވުމަށެވެ.
ސުވާލުކުރުމުގެ ވަގުތު ހަމަވާން ކައިރިވެފައިވަނިކޮށް މެމްބަރަކު ވަނީ ނިޒާމީ ނުކުތާއެއް ނަންގަވައި ފިޝަރީޒް މިނިސްޓަރު މަޖިލީހަށް ހާޒިރު ކުރެވުނީ "އީދާރީ އޮޅުމަކުން" ކަމަށް ވިދާޅުވެފަ އެވެ. އެއީ މެމްބަރެއްގެ ސުވާލުގެ ޖަވާބު ލިޔުމުން ހޯދައި ދެއްވުމަށް އެދިފައި އޮއްވާ މަޖިލީހަށް ހާޒިރުކޮށްގެން ސުވާލު ކުރެވުމުންނެވެ.
