ހުޅުމާލޭގައި 13 އަހަރުގެ ފިރިހެން ކުއްޖަކު ރަހީނުކޮށް މަރާލި މައްސަލައިގައި ތުހުމަތު ކުރެވޭ 17 އަހަރުގެ ފިރިހެން ކުއްޖާ ގޭބަންދުގައި ބަހައްޓަން ހައި ކޯޓުން ދެވަނަ ފަހަރަށް ނިންމުން އެ މައްސަލަ ސުޕްރީމް ކޯޓުގައި ދެވަނަ ފަހަރަށް އިސްތިއުނާފް ކުރަން ޕްރޮސެކިއުޓާ ޖެނެރަލް (ޕީޖީ) އޮފީހުން ނިންމައިފި އެވެ.
ކުޑަކުއްޖެއްގެ މައްސަލައެއް ކަމުން އެ މައްސަލަ ބަލަމުން ގެންދިޔައީ ޖުވެނައިލް ކޯޓުންނެވެ. އެ ކުއްޖާ ބަންދުކޮށްފައި ހުރި ޑިޓެންޝަން ސެންޓަރަކީ ކުޑަކުދިން ބައިތިއްބަން އެކަށީގެންވާ ތަނެއް ނޫން ކަމަށް ހިއުމަން ރައިޓްސް ކޮމިޝަން (އެޗްއާރުސީއެމް) އިން ދިން ލަފައަކާ ގުޅިގެން ޖުވެނައިލް ކޯޓުންނެވެ.
އެ މައްސަލަ ހައި ކޯޓުގައި އިސްތިއުނާފް ކުރުމުން ހައި ކޯޓުން ވެސް ޖުވެނައިލް ކޯޓުގެ ނިންމުމަށް ތާއީދު ކުރި އެވެ. ދެން ސުޕްރީމް ކޯޓުގައި އިސްތިއުނާފް ކުރި އެވެ. އޭގައި މައްސަލަ ބަލަންވާ ވަރަށް ހައި ކޯޓުން ބަލާފައި ނެތް ކަމަށް ބުނެ އަލުން މައްސަލަ ގެންދަން ސުޕްރީމް ކޯޓުން އެންގި އެވެ.
ދައުލަތުން ދެން އެ މައްސަލަ ޖުވެނައިލް ކޯޓަށް ހުށަހެޅުމުން އަނެއްކާ ވެސް ގޭބަންދު ދެމެހެއްޓި އެވެ. އަދި ހައި ކޯޓަށް ވެސް ދެވަނަ ފަހަރަށް މައްސަލަ އިސްތިއުނާފް ކުރުމުން ހައި ކޯޓުން ވެސް އަނެއްކާ ނިންމީ ކުއްޖާ ގޭބަންދުގައި ބެހެއްޓުމަށެވެ.
ޕަބްލިކް ޕްރޮސެކިއުޓަރު އަދި ޕްރޮސެކިއުޓާ ޖެނެރަލްގެ މީޑިއާ އޮފިޝަލް އަހްމަދު ޝަފީއު މި ނޫހަށް ވިދާޅުވީ މިއަދު ނުވަތަ މާދަމާގެ ވަގުތެއްގައި އަނެއްކާ ވެސް އެ މައްސަލަ ސުޕްރީމް ކޯޓަށް ހުށަހަޅުއްވާނެ ކަމަށެވެ. މީގެ ކުރިން ވެސް މި މައްސަލާގައި ސުޕްރީމް ކޯޓުން ނިންމީ ދައުލަތުން އެދުނު ގޮތަށެވެ.
ގަސްތުގައި މީހާކު މެރުމުގެ ދައުވާއާއި، ހުއްދަ ނޫން ގޮތެއްގައި މީހަކު ހިފެހެއްޓުމާއި، މައްޔިތާގެ ބޭނުން ނަހަމަ ގޮތުގައި ކުރުމުގެ ދައުވާ އުފުލިފައިވާ އެ ކުއްޖާ ގޭބަންދުގައި ބަހައްޓާފައި ވަނީ ޝަރުތުތަކެއް ކުރުމަށް ފަހުގަ އެވެ.
ދިރިއުޅޭ ގެއިން ބޭރަށް ނުދިއުމާއި، މުވާސަލަތީ ވަސީލަތް ބޭނުން ނުކުރުމާއި، ގޭގައި އުޅޭ މީހުން ފިޔަވައި އިތުރު މީހުން ގެއަށް ނުވެއްދުމާއި، ޖުވެނައިލް ޖަސްޓިސްގެ ޕްރޮގްރާމްތަކަށް އެއްބާރުލުން ދިނުމާއި، އެ ތަނުގެ ސެޝަންތަކަށް ހާޒިރުވާއިރު ބެލެނިވެރިޔަކާ އެކު ގެއިން ނުކުތުން ޝަރުތުތަކުގެ ތެރޭގައި ހިމެނެ އެވެ.
މި ކުއްޖާގެ މައްޗަށް ތުހުމަތު ކުރެވެނީ ޖިނާއީ ބޮޑު ކުށެއް ކަމާއި، ކުއްޖާ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކާ ވުމުގެ ފުރުސަތު އޮވެދާނެ ކަމާއި، ކުއްޖާގެ ފަރާތުން ހެއްކަށް ނުފޫޒު ފޯރުވުމުގެ ފުރުސަތު ވެސް އޮވެދާނެ ކަން ސުޕްރީމް ކޯޓުގެ ކުރީގެ ނިންމުމުގައި ފާހަގަ ކޮށްފައިވެ އެވެ.
މިދިޔަ އަހަރުގެ ޖޫން މަހުގެ 22 ވަނަ ދުވަހުގެ މެންދަމު ހުޅުމާލެ ދެވަނަ ފިޔަވަހީގެ މޫދާވީ ދިމާލުން ފޮށިގޮނޑަކަށް ލާފައި އޮއްވައި ފެނުނު 13 އަހަރުގެ ކުއްޖާ ގަސްތުގައި މަރާލި ކަމުގެ ދައުވާ އުފުލީ 17 އަހަރުގެ ކުއްޖާގެ އިތުރުން 27 އަހަރުގެ ނ. ލަންދޫ، ބަގީޗާގޭ، އިބްރާހީމް ޒިހާންގެ މައްޗަށެވެ.
