ސްރީލަންކާއިން އުޅެނީ ޗައިނާގެ ދަރަނީގެ ދަންތުރައެއްގައ ޖެހިގެން ނޫން ކަމަށް އެ ގައުމުން ޗައިނާއަށް ކަނޑައަޅާފައި ހުންނަ ސަފީރު ޕަލިތަ ކޮހޮނާ ވިދާޅުވެއްޖެ އެވެ.
ސައުތު ޗައިނާ މޯނިން ޕޯސްޓް ނޫހަށް ދެއްވި އިންޓަވިއުގައި އެހެން ވިދާޅުވި އިރު، ލަންކާއަށް ވަނީ ބޮޑު އިގްތިސާދީ އަދި މާލީ ކާރިސާއަކާ ކުރިމަތިވެފަ އެވެ.
ކޮހޮނާ ވިދާޅުވީ އިގްތިސާދީ ކާރިސާއާ ގުޅިގެން އިންޓްރެސްޓް މަތިކޮށް، ފައިސާގެ އަގު ދަށްކޮށް، ޒަރޫރީ ނޫން މުދާ އިމްޕޯޓް ކުރުން މެދުކަނޑާލަން ޖެހިފައިވާ ކަމަށެވެ.
"މިފަދަ ކަންކަން ޑިމޮކްރަސީއެއްގައި ފެންނާނެ. އެކަމަކު އޭގެ މާނައެއް ނޫން، ލަންކާއިން ބޭރުގެ އިންވެސްޓްމަންޓް ބޭނުމެއް ނުވެޔޭ،" އޭނާ ވިދާޅުވި އެވެ.
ލަންކާގެ ހާލަތާ މެދު ހިތްހަމަނުޖެހިފައި ތިބި އާއްމުން މިދިޔަ ހޮނިހިރު ދުވަހު ކޮލޮމްބޯގައި ފެށި މުޒާހަރާ އަދިވެސް ދަނީ ކުރިއަށެވެ. ގައުމުގެ އެހެން ހިސާބުތަކުގައި ވެސް ކޮންމެ ދުވަހަކު މުޒާހަރާ ކުރެ އެވެ.
"މިހާރު ދިމާވެފައި އޮތީ ވަރަށް އުނދަގޫ ހާލަތެއް. އެއީ ހަގީގަތުގައި ވަރަށް ގިނަ ކަންކަން އެކުވެގެން މެދުވެރިވި ހާލަތެއް. ރައްޔިތުންނަށް ފިއްތުންތަކާއި ވޭން އެބަ ކުރިމަތިވޭ. އަދި މުޒާހަރާ ކުރުމުގެ ހައްގު ރައްޔިތުންނަށް އެބަ އޮތް."
"އަޅުގަނޑުމެން ވަގުތުން ވަގުތަށް ކުރަން ޖެހޭ ކަމަކީ ގަވާއިދުން ދަރަނި ދެއްކުން. ދެން އޮތީ ތެލާއި ގޭހުގެ އިމްޕޯޓަށް ފައިސާ ދެއްކުން. ތެލާއި ގޭސް އަދި ކަރަންޓު ނެތި އެއްވެސް އިގްތިސާދެއް މާ ގިނަ ދުވަހަކު ނުހިނގާނެ."
ޗައިނާގެ ބޭންކުތަކުން ނަގާފައިވާ ލޯނުތައް އަނބުރާ ދެއްކުމަށް، ސްރީލަންކާއިން ވަނީ ޗައިނާ ސަރުކާރުން އެއް ބިލިއަން ޑޮލަރުގެ ލޯނެއް ފޯރުކޮށްދިނުމަށް އެދިފަ އެވެ. އޭގެ އިތުރުން ޒަރޫރީ މުދާ ޗައިނާއިން ގަތުމަށް 1.5 ބިލިއަން ޑޮލަރުގެ ކްރެޑިޓް ފެސިލިޓީއަކަށް ވެސް އެދިފައިވެ އެވެ.
ލަންކާގެ އިގްތިސާދީ އަދި މާލީ ކާރިސާ މެދުވެރިވީ ޗައިނާގެ ދަރަނީ ދަންތުރައެއްގައި ޖެހުމުގެ ސަބަބުންތޯ އެ ގައުމުގެ ގިނަ ބަޔަކު ސުވާލު އުފައްދަ އެވެ. ނަމަވެސް ކޮހޮނާ ވިދާޅުވީ އެއީ ހަގީގަތެއް ނެތް ވާހަކަތަކެއް ކަމަށެވެ.
އޭނާ ވިދާޅުވީ ލަންކާގެ ބޭރުގެ ދަރަނީގެ ތެރެއިން ޗައިނާއަށް ދައްކަން ޖެހެނީ 10 ޕަސެންޓަށް ވުރެ ކުޑަ މިންވަރެއް ކަމަށެވެ.
