ކްރިކެޓް ބޯޑް އޮފް މޯލްޑިވްސް (ސީބީއޭއެމް) އިން ކޮންމެ ރަމަޟާން މަހަކަށް ހާއްސަކޮށްގެން ކުރިއަށްގެންދާ ކްރިކެޓް ކާނިވަލުގެ ޓޭޕް ބޯލް މުބާރާތުގައި އިއްޔެ ހަވީރު ކުޅުނު ގްރޫޕް ސީގެ މެޗުތަކުން އެމްއޭސީއެލް އާއި ގަލޮޅު ކަންމަތި ބަނަފްސާ މޮޅުވެއްޖެ އެވެ.
ކުޅިވަރު އެކުވެނި އެއް ނަމްބަރު ދަނޑުގައި އިއްޔެ ހަވީރު ކުޅުނު ފުރަތަމަ މެޗުން ލަވޭލިޔާއާ ބައްދަލުކޮށް ގަލޮޅު ކަންމަތި މޮޅުވީ 60 ލަނޑުންނެވެ. ޓޮސް ދިމާވުމުން ގަލޮޅު ކަންމަތިން ނިންމީ ބެޓް ކުރުމަށެވެ. އެ ގޮތުން ކުޅެން އަރައި ގަލޮޅު ކަންމަތިން ވަނީ 8 އޯވަރު 155 ލަނޑު ހަދައިފަ އެވެ. އެންމެ ރަނގަޅު ކުޅުމެއް ދެއްކީ 51 ލަނޑު ހެދި މުހައްމަދު އަފްލާހް އާއި 35 ލަނޑު ހެދި މުހައްމަދު ނަޒީހް އެވެ. ޖަވާބުގައި ލަވޭލިޔާ އިން ކުޅެންއަރައި 8 އޯވަރު ހަމަވިއިރު ހެދުނީ 95 ލަނޑެވެ. އެ ޓީމުން އެންމެ ރަނގަޅު ކުޅުމެއް ދެއްކީ 32 ލަނޑު ހެދި އައްސަދު އަބްދުލް ޣަނީ އެވެ. އަދި އެ ޓީމުގެ އިސްމާއިލް ނާސިހް ވަނީ 25 ލަނޑު އެއްކޮށްފަ އެވެ.
އިއްޔެ ކުޅުނު ދެ ވަނަ މެޗުގައި ކިންޒާ ކެފޭއާ ބައްދަލުކޮށް އެމްއޭސީއެލް މޮޅުވީ ހަތް ވިކެޓުންނެވެ. ޓޮސް ދިމާވުމުން އެމްއޭސީއެލް އިން ނިންމީ ފީލްޑް ކުރުމަށެވެ. އެ އެގޮތުން ކިންޒާކެފޭ އިން ކުޅެން އަރައި 8 އޯވަރު ތެރޭ 60 ލަނޑު ހެދިއިރު، އެ ޓީމުގެ ފައިޒާން ވަނީ 17 ލަނޑު ހަދައިފަ އެވެ. ޖަވާބުގައި އެމްއޭސީއެލް އިން ކުޅެން އަރައި އެންމެ ކުޅުންތެރިއެއް ނުބައިވެގެން 3 އޯވަރުގެތެރޭގައި 66 ލަނޑު ހަދައި މެޗުން މޮޅުވި އެވެ. އެންމެ ރަނގަޅު ކުޅުމެއް ދެއްކީ 35 ލަނޑު ހެދި އިސްމާއިލް އަލީ އާއި 13 ލަނޑު ހެދި މުއާވިޔަތު އަބްދުލް ގަނީ އެވެ.
މިއަދުގެ ފުރަތަމަ މެޗުގައި ގަލޮޅު ކަންމަތި ބަނަފްސާ ކުޅޭނީް އޭއާރްސީއާ އެވެ. އަދި ދެ ވަނަ މެޗުގައި އެވިއާ މޯލްޑިވްސް އިން ދިވެހި ސިފައިންގެ ކްލަބާ ކުޅޭނެ އެވެ.
