ޔޫކްރެއިން ހަނގުރާމައާ ގުޅޭ ގޮތުން މަޝްވަރާ ކުރުމަށް އިންޑިއާގެ ބޮޑު ވަޒީރު ނަރެންދްރަ މޯދީ އާއި އެމެރިކާގެ ރައީސް ޖޯ ބައިޑެން ވާޗުއަލްކޮށް ބައްދަލުކުރައްވައިފި އެވެ.
ރަޝިއާއާ އެކު ގާތް ގުޅުމެއް އޮންނަ އިންޑިއާއިން މިހާތަނަށް ޔޫކްރެއިން ހަނގުރާމަ ކުށްވެރިކޮށްފައެއް ނުވެ އެވެ. އަދި ރަޝިއާއާ ދެކޮޅަށް ފިޔަވަޅު އެޅުމުގައި ވެސް ބައިވެރިއެއް ނުވެ އެވެ.
އިންޑިއާއިން ދަނީ ރަޝިއާގެ ތެލާއި ގޭސް ގަންނަމުންނެވެ. އެކަމާ ގުޅިގެން އެމެރިކާ އާއި ހުޅަނގުގެ ގައުމުތަކުގެ ފިއްތުންތައް ދަނީ މޯދީގެ ސަރުކާރަށް ކުރިމަތިވަމުންނެވެ.
ބައްދަލުވުމުގެ ކުރިން އިންޑިއާއިން ބުނީ މަޝްވަރާ ކުރާނީ ދުނިޔޭގެ ކަންކަމުގައި ގުޅިގެން މަސައްކަތް ކުރެވޭނެ ގޮތްތަކާ މެދު ކަމަށެވެ. ނަމަވެސް އެމެރިކާއިން ބުނީ ރަޝިއާއިން ހިންގާ އަނިޔާވެރި ހަނގުރާމައާ ގުޅޭ މަޝްވަރާތައް ކުރާނެ ކަމަށެވެ.
ބައްދަލުވުން ފަށަމުން ބައިޑެން ވަނީ ދެ ގައުމުގެ މެދުގައިވާ "ފުން ގުޅުން" ފާހަގަކުރައްވައި، ހަނގުރާމައާ ގުޅޭ ކަންކަމުގައި ވެސް އެ ގުޅުން ބާއްވަން ބޭނުންވާ ކަމަށް ވިދާޅުވެފަ އެވެ.
މޯދީ ވިދާޅުވީ ދެ ގައުމަކީ "ފަސޭހަ ދެ ބައިވެރިން" ކަމަށާއި ޔޫކްރެއިންގައި ދިމާވެފައިވާ އޮތް ކާރިސާއާ މެދު އިންޑިއާއިން ވަރަށް ބޮޑަށް ކަންބޮޑުވާ ކަމަށެވެ.
މިދިޔަ މާޗް މަހު ވެސް ބައިޑެން އާއި މޯދީގެ ބައްދަލުވުމެއް އޮތެވެ. ނަމަވެސް އެ ފަހަރު ވެސް ދެ ގައުމު އެކުގައި ރަޝިއާގެ އަމަލުތައް ކުށްވެރިކޮށްފައެއް ނުވެ އެވެ.
މިދިޔަ ހަފްތާގައި އދ. ގެ އިންސާނީ ހައްގުތަކާ ބެހޭ ކައުންސިލުން ރަޝިއާ ސަސްޕެންޑް ކުރުމަށް ނެގި ވޯޓުގައި އިންޑިއާއިން ވޯޓު ދީފައެއް ނުވެ އެވެ.
ޔޫކްރެއިން ހަނގުރާމައާ ހެދި ރަޝިއާއާ ދެކޮޅަށް އަޅާފައިވާ ފިޔަވަޅުތަކަށް ލުއި ލިބޭ ފަދަ ގޮތަކަށް އަމަލު ކުރާ ކޮންމެ ގައުމަކަށް ވެސް "ދެރަވާނެ" ކަމަށް އެމެރިކާއިން ވަނީ ބުނެފަ އެވެ.
އެހެން ނަމަވެސް އިންޑިއާއިން އަދިވެސް ދަނީ ރަޝިއާއާ އެކު ވިޔަފާރީގެ ގުޅުން ފުޅާ ކުރަމުންނެވެ. އެގޮތުން ބޭންކު ނިޒާމާ ގުޅިގެން އެޅި ފިޔަވަޅު ލުއި ކުރުމުގެ ގޮތުން، ޑޮލަރުގެ ބަދަލުގައި ރުޕީ އާއި ރޫބްލްއިން ފައިސާ ދެއްކޭނެ ގޮތެއް ވަނީ ހަދާފަ އެވެ.
އޭގެ އިތުރުން ރަޝިއާގައި އުފައްދާ ތެލުން ހާއްސަ ޑިސްކައުންޓެއް ދެމުން ދާތީ، އެ ތެޔޮ ވެސް އިންޑިއާއިން ދަނީ ގަންނަމުންނެވެ. ހަނގުރާމަ ފެށި ފަހުން އިންޑިއަން އޮއިލް ކޯޕް ކުންފުނިން ވަނީ ރަޝިއާއިން ތިން މިލިއަން ފީފާގެ ސާފު ނުކުރާ ތެޔޮ ގަނެފަ އެވެ.
