ސްރީ ލަންކާގެ ރައްޔިތުން މުޒާހަރާ ކުރާ ކޮންމެ ސިކުންތަކުގެ އެތައް ޑޮލަރެއްގެ ގެއްލުން ގައުމަށް ލިބެމުންދާ ކަމަށް ބޮޑު ވަޒީރު މަހިންދަ ރާޖަޕަކްސަ ވިދާޅުވެއްޖެ އެވެ.
ޓީވީ މެދުވެރިކޮށް ހޯމަ ދުވަހު ގައުމާ މުހާތަބު ކުރައްވަމުން ރާޖަޕަކްސަ ވިދާޅުވީ ހުރިހާ ޕާޓީތައް ހިމެނޭ ސަރުކާރެއް ގާއިމް ކުރަން ދިން ދައުވަތު ޕާޓީތަކުން ބަލައިގެންފައި ނުވާތީ، ކާރިސާއިން އަރައިގަތުމަށް އެޅެން ހުރި ހުރިހާ ފިޔަވަޅެއް މިހާރު އޮތް ސަރުކާރުން އަޅާނެ ކަމަށެވެ.
ރާޖަޕަކްސަ ވިދާޅުވީ 30 އަހަރުގެ ދިގު ދާހިލީ ހަނގުރާ ނިމުމަކަށް ގެނައީ އެމަނިކުފާނުގެ ސަރުކާރުން ކަމަށާއި ގޭހާއި ތެލަށް ޖެހި ދިގު ކިޔުތަކެއްގައި ރައްޔިތުން ބުރަ އުފުލާ މަންޒަރު ބަލަން ބޭނުން ނުވާ ކަމަށެވެ.
ރައްޔިތުން އުފުލަމުންދާ ތަކުލީފާ މެދު ހިތާމަ ކުރާ ކަމަށާއި ރައީސް ގޮތަބަޔާ ރާޖަޕަކްސައާ އެކު، ގޮންޖެހުންތަކުން އަރައިގަންނަން ކުރެވެން ހުރި ހުރިހާ މަސައްކަތެއް ކުރައްވާނެ ކަމަށް އެމަނިކުފާނު ވިދާޅުވި އެވެ.
ބޮޑު ވަޒީރު ގައުމާ މުހާތަބު ކުރައްވާފައިވާ އިރު، ރައީސްގެ އިތުބާރު ނެތްކަމުގެ މައްސަލައެއް ޕާލިމެންޓަށް ހުށަހެޅުމަށް އިދިކޮޅު ދަނީ މަސައްކަތް ކުރަމުންނެވެ.
އިގްތިސާދީ ކާރިސާއާ ހެދި ބޮޑު ވަޒީރާއި ރައީސްގެ އިސްތިއުފާއަށް ގޮވާލައި ކޮލޮމްބޯގައި ގިނަ އަދަދެއްގެ މީހުން ޓެންޓު ޖަހައި މުޒާހަރާ ކުރަމުން ދާތާ ދެ ދުވަސް ވެއްޖެ އެވެ.
