ސްރީލަންކާއަށް ކުރިމަތިވެފައިވާ އިގްތިސާދީ ކާރިސާ ހައްލު ކުރަން ކެބިނެޓް މިނިސްޓްރީތަކުގެ ސެކެޓްރީއިންގެ ފަރާތުން ސަރުކާރަށް 33 ލަފާ ފޮނުވައިފި އެވެ.
ހުރިހާ ހުށަހެޅުމެއް ފޮނުވީ ރައީސްގެ ސެކެޓްރީ ގަމިނީ ސެނަރަތު އަށެވެ. މިނިސްޓްރީތަކުގެ ސެކެޓްރީއިން އެދެނީ ވީ އެންމެ އަވަހަކަށް އެ ލަފާތަކާ އެއް ގޮތަށް އަމަލު ކުރުމަށެވެ.
މިނިސްޓްރީތަކުގެ ސެކެޓްރީއިން ހުށަހެޅި ކަންކަން ދިރާސާ ކުރާނީ ބޮޑު ވަޒީރުގެ ސެކެޓްރީއިން ރިޔާސަތު ބަލަހައްޓާ ހާއްސަ ކޮމިޓީއަކުންނެވެ.
ހުށަހެޅި ކަންކަމުގެ ތެރޭގައި މިނިސްޓަރުންގެ އަދަދު މަދު ކުރުމާއި، މިނިސްޓަރުންނަށް ލިބޭ ފައިސާ އާއި އިނާޔަތްތައް ކުޑަ ކުރުމާއި، ސްޓޭޓް މިނިސްޓަރުންގެ އަދަދު ވަރަށް ބޮޑަށް މަދު ކުރުން ނުވަތަ އެއްކޮށް އުވާލުމާއި، ސަރުކާރު ކުންފުނިތަކާއި ސިވިލް ސާވިސްއަށް މުވައްޒަފުން ނެގުން ވަގުތީ ގޮތުން މެދުކަނޑާލުމެވެ.
ސަންޑޭ ޓައިމްސް ނޫހުގައިވާ ގޮތުން މި ވަގުތު 70 އަށް ވުރެ ގިނަ މިނިސްޓަރުންނާއި ސްޓޭޓް މިނިސްޓަރުން އެބަ ތިއްބެވެ. އެހެންކަމުން ޕަބްލިކް އެޑްމިނިސްޓްރޭޝަން މިނިސްޓްރީގެ ސެކެޓްރީ ޖޭޖޭ ރަތުނަސިރީ ހުށަހެޅުއްވީ އަދަދު މަދު ކުރުމަށެވެ.
މިނިސްޓަރުން މަދު ކުރުމުން ހަރަދުތައް ކުޑަ ވާނެ ކަމަށާއި އެ ފައިސާ އެހެން މިނިސްޓްރީތަކާއި ތެޔޮ ގަންނަން ބޭނުން ކުރެވޭނެ ކަމަށް އޭނާ ފާހަގަކުރެއްވި އެވެ.
އޭގެ އިތުރުން ތަރައްގީގެ އެއްވެސް އާ މަޝްރޫއެއް ނުފެށުމަށާއި ސަރުކާރާއި ސަރުކާރުން ކުންފުނިތަކުން އެއްވެސް އިމާރާތެއް ނުވަތަ ބިމެއް ކުއްޔަށް ނުނެގުމަށާއި 2022 ވަނަ އަހަރުގެ ބަޖެޓު މުރާޖައާ ކުރަން ވެސް ހުށަހަޅާފައިވެ އެވެ.
ހުށަހެޅުންތަކުގައި އިތުރަށް ބުނީ ތަކެތި އިމްޕޯޓް ކުރުމުގައި އިސްކަން ދޭންވީ ތެލާއި، ގޭސް އަދި ބޭހަށް ކަމަށާއި އިންޓަނޭޝަނަލް މަނިޓަރީ ފަންޑް (އައިއެމްއެފް) އާ އެކު ކުރާ މަޝްވަރާ އަވަސް ކުރުން މުހިއްމު ކަމަށެވެ.
