ކްރިކެޓް ބޯޑް އޮފް މޯލްޑިވްސް (ސީބީއޭއެމް) އިން ކޮންމެ ރަމަޟާން މަހަކަށް ހާއްސަކޮށްގެން ކުރިއަށްގެންދާ ކްރިކެޓް ކާނިވަލުގެ ޓޭޕް ބޯލް މުބާރާތުގައި އިއްޔެ ހަވީރު ކުޅުނު ގްރޫޕް ބީގެ މެޗުތަކުން މޮޅުވެ، ސަންކުއިކް ލިލީ އެއް ވަނައިގައި އޮތްއިރު، ދެ ވަނަ މަގާމު، އައިބީއެސް އިން ހޯދައިފި އެވެ.
މީޓިއޯސްއާ ވާދަކޮށް ސަންކުއިކް ލިލީ މޮޅުވީ ހަ ވިކެޓުންނެވެ. އަދި އައިބީއެސް އިން ވަނީ ސުގަ ކޯން ހަ ވިކެޓުން ބަލިކޮށްފަ އެވެ.
ގްރޫޕް ބީގެ އެއް ވަނައިގައި ސަންކުއިކް ލިލީ އޮތީ ތިން މެޗުން ވެސް މޮޅުވެ، ހަ ޕޮއިންޓް ހޯދައިގެންނެވެ. އައިބީއެސް އަށް ދެ ވަނަ ލިބެނީ ތިން މެޗުން ހަތަރު ޕޮއިންޓް ހޯދުމުންނެވެ. މީޓިއޯސް ތިން ވަނައިގައި އޮތީ ތިން މެޗުން ދެ ޕޮއިންޓާ އެކު އެވެ. ފުލުގައި އޮތް ސުގަ ކޯން މެޗަކުން މޮޅެއްނުވެ އެވެ.
ކުޅިވަރު އެކުވެނި އެއް ނަމްބަރު ދަނޑުގައި އިއްޔެ ހަވީރު ކުޅުނު ފުރަތަމަ މެޗުގައި މީޓިއޯސް އަށް ޓޮސް ދިމާވުމުން ނިންމީ ބެޓް ކުރާށެވެ. އެ ޓީމުން އެންމެ ރަނގަޅު ކުޅުމެއް ދެއްކީ 42 ލަނޑު ހެދި އަލީ ނިހާދާއި 30 ލަނޑު އެއްކުރި އިބްރާހިމް އަލީ އެވެ. ޖުމްލަ އެއްކޮށް މީޓިއޯސް އިން ވަނީ އަށް 112 ލަނޑު ހަދައިފަ އެވެ.
ޖަވާބުގައި ކުޅެން އަރައި، ސަންކުއިކް ލިލީން ވަނީ 5.4 އޯވަރުގެ ތެރޭގައި އެއް ވިކެޓަށް 114 ލަނޑު އެއްކޮށް މެޗުން މޮޅުވެފަ އެވެ. ސަންކުއިކް ލިލީން އެންމެ ރަނގަޅު ކުޅުމެއް ދެއްކީ 36 ލަނޑު ހެދި ޔޫސުފް އަޒްޔާން ފަރުހަތާއި 33 ލަނޑު އެއްކުރި މުހައްމަދު ރިޝްވާން އަދި 23 ލަނޑު އެއްކުރި ހަސަން ހާޒިގް އެވެ.
އިއްޔެގެ ދެ ވަނަ މެޗުގައި ޓޯސް ދިމާވުމުން ސުގަ ކޯން އިން އެރީ ބެޓް ކުރާށެވެ. އަށް އޯވަރު ނިމުނުއިރު، ތިން ވިކެޓަށް ސުގަ ކޯން އަށް ހެދުނީ 105 ލަނޑެވެ. އެ ޓީމުން އެންމެ ރަނގަޅަށް ކުޅުނީ 36 ލަނޑު ހެދި މުހައްމަދު އާމިރާއި 13 ލަނޑު ހެދި އަހުމަދު އާމިރު އެވެ. ޖަވާބުގައި އައިބީއެސް އިން ކުޅެން އަރައި، 6.4 އޯވަރުގެ ތެރޭގައި އެއް ވިކެޓަށް 106 ލަނޑު ހަދައި މެޗުން މޮޅުވީ އެވެ. އެންމެ ރަނގަޅަށް ކުޅުނީ 13 ބޯޅައިން 32 ލަނޑު ހެދި މަހުމޫދު ރިޔާޒާއި 20 ލަނޑު އެއްކުރި އަހުމަދު މުނާޒް އެވެެ..
