ހަސަން ނަޒީމް ގާސިމް (ޗޯޓު)ގެ ހެޓްރިކާ އެކު، އުރީދޫ ދިވެހި ޕްރިމިއާ ލީގުގައި މިރޭ ދަ ގްރާންޑޭ ސްޕޯޓްސް ކްލަބް 4-0 އިން ބަލިކޮށް ކްލަބް ގްރީން ސްޓްރީޓްސް އިން މި ފަހަރުގެ ލީގުގެ ދެ ވަނަ މޮޅު ހޯދައިފި އެވެ.
ލީގުގެ ފުރަތަމަ ބުރުގެ ހަތް މެޗުގެ ކުޅުން ނިމުނުއިރު، ގްރީން ސްޓްރީޓްސް އަށް ލިބުނީ އެންމެ މޮޅެކެވެ. އެއީ ކްލަބް ވެލެންސިއާ އަތުންނެވެ. ފުރަތަމަ ބުރުގައި ދެން ގްރީން ސްޓްރީޓްސް އަށް ލިބުނު ޕޮއިންޓަކީ، ދަ ގްރާންޑޭއާ އެއްވަރުވެގެން ހޯދި ޕޮއިންޓެވެ.
މިރޭގެ މެޗާ އެކު ލީގުގެ ދެ ވަނަ ބުރުގެ ފުރަތަމަ ހަފްތާގެ ކުޅުން ނިމުނުއިރު ކޮންމެ ޓީމެއް މި ވަނީ އަށް މެޗު ކުޅެފަ އެވެ. އެއް ވަނައިގައި މާޒިޔާ ސްޕޯޓްސް އެންޑް ރެކްރިއޭޝަން އޮތީ 21 ޕޮއިންޓް ހޯދައިގެންނެވެ. ދެ ވަނައިގައި އޮތް ކްލަބް އީގަލްސް އަށް ވަނީ 19 ޕޮއިންޓް ލިބިފަ އެވެ. ތިން ވަނައިގައި އޮތް ވެލެންސިއާ އަށް ވަނީ 13 ޕޮއިންޓް ލިބިފަ އެވެ.
ހަތަރު ވަނައިގައި އޮތް ޓީސީ ސްޕޯޓްސް ކްލަބްގެ 11 ޕޮއިންޓް އޮތްއިރު، ފަސް ވަނައިގައި އޮތް ޔުނައިޓެޑް ވިކްޓްރީ އަށް ވަނީ 10 ޕޮއިންޓް ލިބިފަ އެވެ. ހަ ވަނައިގައި އޮތް ސުޕަ ޔުނައިޓެޑް ސްޕޯޓްސް (ސަސް)ގެ އޮތީ އަށް ޕޮއިންޓެވެ. މިރޭގެ މޮޅާ އެކު ގްރީން ސްޓްރީޓްސް ވަނީ ހަތް ޕޮއިންޓް ހަމަކޮށްފަ އެވެ. މި ސީޒަނުގައި މޮޅެއް ނުލިބި އޮތް ހަމައެކަނި ޓީމު ކަމަށްވާ ދަ ގްރާންޑޭ ލީގުގެ ފުލުގައި އޮތީ އެއް ޕޮއިންޓާ އެކު އެވެ.
ލަނޑު ޖެހުމަށް ފަހު ގްރީން ސްޓްރީޓްސް އަވީލާ އުފާފާޅުކުރަނީ.-- ފޮޓޯ: މުހައްމަދު ޝާބިން/ އަދަދު
ގްރީން ސްޓްރީޓްސް އިން ވަނީ މިރޭގެ މެޗުގެ ނުވަ ވަނަ މިނިޓްގައި ލީޑުނަގައިފަ އެވެ. ދަ ގްރާންޑޭ އޭރިއާތެރެއިން ގްރީން ސްޓްރީޓްސްގެ ކޮލަމްބިއާ ފޯވާޑް ހޯސޭ އަވީލާ އަށް ލިބުނު ފުރުސަތުން އޭނާ ވަނީ ގޯލުގެ ދުރު ކަަނަށް ބޯޅަ ފޮނުވާލައިފަ އެވެ. މެޗުގެ 23 ވަނަ މިނިޓްގައި ގްރީން ސްޓްރީޓްސް އިން ލީޑުފުޅާކުރީ އަހުމަދު ނާހިލް އިބްރާހިމް ހުސްކޮށްލާފައި ދިން ބޯޅައަކުން ޗޯޓު ވަނީ އެ ޓީމަށް ލީޑުފުޅާކޮށްދީފަ އެވެ.
މި މެޗުގައި ދަ ގްރާންޑޭގެ ސްރީ ލަންކާ ފޯވާޑް މުހައްމަދު އާކިބަށް ވަނީ ރަނގަޅު ފުރުސަތުތަކެއް ލިބިފަ އެވެ. ގޯލެއް ޖެހޭތޯ ދަ ގްރާންޑޭ އިން ފޮނުވާލި ގިނަ ހަމަލާތަކުގެ ހުރަހަކަށްވީ ގްރީން ސްޓްރީޓްސްގެ ގޯލުގައި ހުރި ޕާކިސްތާންގެ ކީޕަރު ހަނީފް ސާގިބް އެވެ.
ދެ ވަނަ ހާފްގައި ގްރީން ސްޓްރީޓްސް އިން ލަނޑެއް ޖެހޭތޯ ގިނަ އެޓޭކްތަކެއް ކުރަމުންދިޔައިރު، އެ ޓީމުން މި ހާފުގައި ޖެހި ފުރަތަމަ ގޯލު ކާމިޔާބުކުރީ 84 ވަނަ މިނިޓްގައި ޗޯޓު އެވެ. އޭރިއާތެރެއަށް ބޯޅަ ހިފައިގެން ވަދެ ޗޯޓު ވަނީ ގޯލުގެ ދުރު ކަނަށް ބޯޅަ ފޮނުވާލައިފަ އެވެ. ޗޯޓު ހެޓްރިކް ފުރިހަމަކުރި ގޯލު ޖެހީ މެޗުގެ 90 ވަނަ މިނިޓްގަ އެވެ. ގްރީން ސްޓްރީޓްސްގެ އަވީލާ އާއި ސްޕެއިންގެ އެންހެލް މުނޯޒް ގުޅިގެން އުފެއްދި އެޓޭކެއްގައި ގޯލު ކުރިމައްޗަށް ހުރަސްކޮށްލި ބޯޅަ ޗޯޓު ވަނީ ހަމަޖެހިލާފައި ގޯލުގެ ތެރެއަށް ބޯޅަ ފޮނުވާލައިފަ އެވެ.
ލީގުގެ ކުޅުން ދެން ފަށާނީ ބުރާސްފަތި ދުވަހުގެރޭ ސަސް އާއި ދަ ގްރާންޑޭ ކުޅޭ މެޗުންނެވެ.
