މި އަހަރު ހައްޖުގެ އަޅުކަން އަދާ ކުރުމުގެ ފުރުސަތު ޖުމްލަ އެއް މިލިއަން މީހުންނަށް ދިނުމަށް ސައުދީ އަރަބިއްޔާއިން ނިންމައިފި އެވެ.
ހައްޖު މިނިސްޓްރީން ބުނީ އެހެން ގައުމުތަކުން އަންނަ މީހުންނާއި ސައުދީ އަރަބިއްޔާގައި ދިރިއުޅޭ މީހުން ހިމެނޭ ގޮތަށް ޖުމްލަ އެއް މިލިއަން މީހުންނަށް މި އަހަރު ހައްޖުގެ އަޅުކަން އަދާ ކުރެވޭނެ ކަމަށެވެ.
ދެހާސް ނަވާރަ ވަނަ އަހަރު 2.5 މިލިއަން މީހުން ހައްޖުގެ އަޅުކަން އަދާކުރި އެވެ. ނަމަވެސް ކޮވިޑާ ގުޅިގެން ހައްޖުގެ އަޅުކަން އަދާކުރެވޭ މީހުންގެ އަދަދު ވަރަށް ބޮޑަށް ލިމިޓްކުރި އެވެ.
އެގޮތުން 2020 ވަނަ އަހަރު ހައްޖުގެ އަޅުކަން އަދާ ކުރުމުގެ ފުރުސަތު ލިބުނީ އެންމެ 1000 މީހުންނަށެވެ. އޭގެ ފަހުން 2021 ވަނަ އަހަރު ވެކްސިން ފުރިހަމަކޮށްފައިވާ އުމުރުން 65 އަހަރުން ދަށުގެ 60،000 މީހުންނަށް އެ ފުރުސަތު ލިބުނެވެ.
މި އަހަރު އެއް މިލިއަން މީހުންނަށް އެ ފުރުސަތު ދޭން ނިންމި ނަމަވެސް ޝަރުތުތަކުގެ ތެރޭގައި ކޮވިޑް ވެކްސިން ޖަހާފައިވުމާއި އުމުރުން 65 އަހަރުން ދަށުގެ މީހަކަށްވުން ހިމެނެ އެވެ.
ހައްޖުގެ އަޅުކަމަށް އެހެން ގައުމުތަކުން ސައުދީ އަރަބިއްޔާއަށް ދަތުރު ކުރާ މީހުން 72 ގަޑިއިރު ހަމަނުވާ ނެގެޓިވް ޕީސީއާރް ނަތީޖާއެއް ހުށަހަޅަން ޖެހޭނެ އެވެ.
