ލ. ކައްދޫ އަށް ދަތުރުކުރި މޯލްޑިވިއަން ގެ ފްލައިޓެއްގެ ލޭންޑިން ގިއަރުގައި ޖެހުނު މައްސަލައަކާ ގުޅިގެން އިމަޖެންސީ ހާލަތުގައި ވެލާނާ އިންޓަނޭޝަނަލް އެއާޕޯޓު (ވީއައިއޭ) އަށް ޖައްސައިފި އެވެ.
އިމަޖެންސީގައި ފްލައިޓު ޖައްސަން ޖެހުނީ ކައްދޫ އަށް ޖައްސަން ފްލައިޓުގެ ލޭންޑިން ގިއަރު ތިރި ކުރަން ކުރި މަސައްކަތް ކާމިޔާބު ނުވުމުންނެވެ.
މި ނޫހަށް މައުލޫމާތު ދެއްވަމުން ވީއައިއޭގެ މީޑިއާ އޮފިޝަލް ޝައްމާން ޝާކިރު ވިދާޅުވީ އިމަޖެންސީ ހާލަތުގައި ޖެއްސި ނަމަވެސް ފްލައިޓު ޖެއްސީ ރައްކާތެރިކޮށް ކަމަށެވެ.
އަދި، ފްލައިޓަށް ގެއްލުން ލިބިފައި ނުވާ ކަމަށާއި އޭގެއިން ދަތުރުކުރި އެއްވެސް މީހަކަށް ވެސް އަނިޔާ ވެފައި ނުވާ ކަމަށް އޭނާ ކަށަވަރުކޮށްދެއްވި އެވެ.
މިރޭ އިމަޖެންސީގައި ޖެއްސީ މޯލްޑިވިއަންގެ އެތެރޭގެ އުދުހުންތަކުގައި ބޭނުންކުރާ ޑޭޝް-8 މަރުކާގެ ބޯޓެކެވެ. މި ހާދިސާއާ ގުޅިގެން އަދި މޯލްޑިވިއަންގެ ބަހެއް ލިބިފައެއް ނުވެ އެވެ.
