ސްރީ ލަންކާގެ ރައްޔިތުން އެދެނީ ރާޖަޕަކްސަ އާއިލާއިން ވެރިކަމާ ދުރަށް ޖެހެން ކަމަށް އެ ގައުމުގެ ކުރީގެ ރައީސް މައިތްރިޕާލާ ސިރިސޭނާ ވިދާޅުވެއްޖެ އެވެ.
ސްރީލަންކާ ފްރީޑަމް ޕާޓީ (އެސްއެލްއެފްޕީ) ގެ ޗެއާމަންކަން ކުރައްވާ ސިރިސޭނާ އާދީއްތަ ދުވަހު ވަނީ އިދިކޮޅު ލީޑަރު ސަޖިތު ޕްރޭމަދާސައާ ބައްދަލުކުރައްވާފަ އެވެ.
އޭގެ އިތުރުން ސަރުކާރު ހިންގާ ކޯލިޝަނާ ވަކިވި ޕާލިމެންޓުގެ 41 މެމްބަރުން ވެސް އާދީއްތަ ދުވަހު ސިރިސޭނާއާ ބައްދަލުކުރެއްވި އެވެ.
ނޫސްވެރިންނަށް މައުލޫމާތު ދެއްވަމުން ސިރިސޭނާ ވިދާޅުވީ ގައުމަށް ދިމާވެފައިވާ މައްސަލަ ހައްލު ކުރަން އާ ބޮޑު ވަޒީރަކާ އެކު ވަގުތީ ހިންގާ ކައުންސިލެއް ގާއިމް ކުރަން ޖެހޭ ކަމަށެވެ.
ސިރިސޭނާ ވިދާޅުވީ ހިންގާ ކައުންސިލްގެ މަސައްކަތުން ތެލާއި، ގޭސް އަދި ކާބޯތަކެއްޗާއި ބޭހާއި ކަރަންޓުގެ ކާރިސާ ހައްލު ކުރަން ފިޔަވަޅު އެޅޭނެ ކަމަށެވެ.
"ރައްޔިތުންގެ އެންމެ މައިގަނޑު އެދުމަކީ ރާޖަޕަކްސަ އާއިލާއިން ވެރިކަމާ ދުރަށް ޖެހުން. ހުރިހާ ދިމާލެއްގައި ވެސް ރައްޔިތުން ދެނީ އެ މެސެޖު. އެހެންވީމާ، ރާޖަޕަކްސަ އާއިލާއާ ދެކޮޅަށް ރައްޔިތުން އުފުލަމުންދާ އަޑު ސަރުކާރުން އަހައި، ފިޔަވަޅުން އަޅަން ޖެހޭނެ،" ސިރިސޭނާ ވިދާޅުވި އެވެ.
ސިރިސޭނާއާ އެކު އިދިކޮޅު ލީޑަރާއި ސަރުކާރާ ވަކިވި ޕާލިމެންޓު މެމްބަރުން ބައްދަލުވުމެއް ބޭއްވި އިރު، ހޯމަ ދުވަހުގެ ރޭ އެ ފަރާތްތަކުން ވަނީ ރައީސް ގޮތަބަޔާ ރާޖަޕަކްސައާ ވެސް ބައްދަލުކޮށްފަ އެވެ.
