ބޯކޮށް ވާރޭ ވެހެމުން ދިޔަ ނަމަވެސް، އާދީއްތަ ދުވަހު ހެނދުނު ކޮލޮމްބޯގެ ގޯލް ފޭސް ގްރީން ސަރަހައްދުގައި ފެށި މުޒާހަރާ މެދުކެނޑުމެއް ނެތި އަދިވެސް ކުރިއަށްދާ ކަމަށް ނޫސްތަކުން ބުނެފި އެވެ.
ރައީސްގެ އޮފީސް ހުންނަ ސަރަހައްދުގައި ފެށި މުޒާހަރާގައި އާއްމުން ޑިމާންޑް ކުރަނީ ރައީސް ގޮތަބަޔާ ރާޖަޕަކްސަގެ އިސްތިއުފާ އަށެވެ. މުޒާހަރާ ފެށީ އާދީއްތަ ދުވަހު ހެނދުނު 09:00 ގަ އެވެ.
ރިޕޯޓުތައް ބުނާ ގޮތުން މުޒާހަރާގެ ގިނަ ބައިވެރިން ރޭ ދަންވަރު ވެސް އެ ސަރަހައްދުން ގޮސްފައެއް ނުވެ އެވެ. ހޯމަ ދުވަހު ބޯކޮށް ވާރޭ ވެހެމުން ދިޔަ ނަމަވެސް، މުޒާހަރާ ކުރިއަށްދާ ކަމަށް ވެ އެވެ.
ލަންކާއަށް ކުރިމަތިވެފައިވާ އިގްތިސާދީ އަދި މާލީ ކާރިސާގައި އާއްމު ރައްޔިތުންގެ ދިރިއުޅުމަށް ގިނަ ގޮންޖެހުންތަކެއް ކުރިމަތިވަމުން ދާތީ ސަރުކާރާ ދެކޮޅަށް ބޮޑު މުޒާހަރާތައް ފެށީ މިދިޔަ ހަފްތާގަ އެވެ.
ފިއްތުންތައް ބޮޑުވެ، ބޮޑު ވަޒީރު މަހިންދަ ރާޖަޕަކްސަ ފިޔަވައި ކެބިނެޓްގެ ހުރިހާ މެމްބަރުން އިސްތިއުފާ ދެއްވި އެވެ. ނަމަވެސް ރައްޔިތުން ބޭނުން ވަނީ ބޮޑު ވަޒީރާއީ ރައީސް ވެސް އިސްތިއުފާ ދެއްވުމަށެވެ.
އެހެން ނަމަވެސް، މިދިޔަ ހަފްތާގައި ރައީސް ގޮތަބަޔާ ވިދާޅުވީ ފިއްތުންތައް ކުރިމަތި ކުރުވި ނަމަވެސް އިސްތިއުފާ ނުދެއްވާނެ ކަމަށެވެ.
