މިލާން (އޭޕްރީލް 10) - އިޓާލިއަން ލީގުގައި ރޭ ހެލަސް ވެރޯނާ އަތުން 2-0 އިން މޮޅުވެ، އިންޓަ މިލާނުން ލީގުގެ އެއް ވަނައިގައި އޮތް އޭސީ މިލާނާ ޕޮއިންޓަކަށް ގާތަށް ޖެހިލިއިރު، ކަލިއަރީ ގޯލެއް ޖަހާފައިވަނިކޮށް ފަހަތުންއަރައި 2-1 އިން މޮޅުވެ، ޔުވެންޓަސް އިން ލީގުގެ ރޭހުގައި ދެމި އޮންނަން މުހިންމު ޕޮއިންޓްތަކެއް ހޯދައިފި އެވެ.
މިލާން, މި ވަގުތު އެއް ވަނައިގައި އޮތީ 31 މެޗުން 67 ޕޮއިންޓް ހޯދައިގެންނެވެ. އެންމެ ފަހުގެ ޗެމްޕިއަން އިންޓަ ދެ ވަނައިގައި އޮތީ 31 މެޗުން 66 ޕޮއިންޓާ އެކު އެވެ. ތިން ވަނައިގައި އޮތް ނަޕޯލީ އަށް ވެސް ވަނީ 31 މެޗުން 66 ޕޮއިންޓް ލިބިފަ އެވެ. ޔުވެންޓަސް ހަތަރު ވަނައިގައި އޮތީ 32 މެޗުން 62 ޕޮއިންޓް ހޯދައިގެންނެެވެ.
މިރޭ ނަޕޯލީން އަމިއްލަ ދަނޑުގައި ފިއޮރެންޓީނާއާ ކުޅޭނެ އެވެ. މިލާނުން ނުކުންނާނީ ރަށުންބޭރުގައި ޓޮރީނޯއާ ދެކޮޅަށެވެ.
ރޭގެ މެޗުގައި އިންޓަ އަށް ގޯލު ޖަހައިދޭން އިވާން ޕެރިސިޗް ޖެހި ބޯޅަ ހެލަސް ވެރޯނާ ކީޕަރު ލޮރެންޒޯ މޮންޓީޕޯ ވަނީ މަތަކޮށްފަ އެވެ. މެޗުގެ 22 ވަނަ މިނިޓްގައި އިންޓަ އަށް ލީޑުނަގައިދިނީ ޕެރިސިޗް ނެގި ހުރަހަކުން ނިކޯލޯ ބަރޭލާ އެވެ. ބަރޭލާ ޖެހި ބޯޅަ އަމާޒުވީ ގޯލުގެ މަތީ ދާގަނޑަށެވެ. އޭގެ ފަހުން ބަރޭލާ ދިން ބޯޅައަކުން ޔަކީން ކޮރޭއާ ޖެހި ޝޮޓް ކީޕަރު މޮންޓީޕޯ ވަނީ މަތަކޮށްފަ އެވެ.
މެޗުގެ 30 ވަނަ މިނިޓްގައި އިންޓަގެ ދެ ވަނަ ގޯލު ޖެހީ އެޑިން ޖެކޯ އެވެ. މިއީ ޑި މާކޯ ނެގި ކޯނަރަކުން ޕެރިސިޗް ބޮލުން ޖައްސާލި ބޯޅަ ކުޑައޭރިއާތެރެއިން ގޯލު ތެރެއަށް ފޮނުވާލައިގެން ޖެކޯ ޖެހި ގޯލެކެވެ. މިއީ މި ފަހަރު ލީގުގައި ޖެކޯގެ 13 ވަނަ ގޯލެވެ.
ޔުވެންޓަސް މޮޅުކޮށްދިން ގޯލު ޖެހުމަށް ފަހު ވްލަހޯވިޗް އުފާފާޅުކުރަނީ.-- ފޮޓޯ: އޭއެފްޕީ
ކަލިއަރީ ދަނޑުގައި ރޭ ކުޅުނު މެޗުގައި އެ ޓީމުން ލީޑުނެގީ 10 ވަނަ މިނިޓްގައި ޖާއޯ ޕެޑްރޯ ޖެހި ގޯލުންނެވެ. ޔުވެންޓަސްގެ ޕައޮލޯ ޑިބާލާ އަތުން ބޯޅަ ހޯދައިގެން އައިސް، ކަލިއަރީގެ ރަޒްވާން މަރީން ހުސްކޮށްލާފައި ޖާއޯ ޕެޑްރޯ އަށް ދިން ބޯޅަ އޭނާ ވަނީ ގޯލުގެ މަތީ ކަނަށް ފޮނުވާލައިފަ އެެވެ.
ޔުވެންޓަސް އިން ޖެހި ފުރަތަމަ ގޯލު ބަލައިނުގަތެވެ. އޭރިއާބޭރުން ޑިބާލާ ޖެހި ބޯޅައެއް ކަލިއަރީގެ ކީޕަރު އަލެސިއޯ ކްރާނިޔޯ އަތުގައި ޖެހިފައި ލިބުނީ ޔުވެންޓަސްގެ ލޫކަ ޕެލެގްރީނީ އަށެވެ. ޕެލެގްރީނީ ޖެހި ބޯޅަ ގޯލަށް ވަނީ ޔުވެންޓަސްގެ އޭޑްރިއަން ރަބިއޯ އަތުގައި ޖެހިފައި ކަމަށް ބަލައި، ގޯލު ބަލައިނުގަންނަން ނިންމި އެވެ.
އެކަމަކު، ފުރަަތަމަ ހާފުގެ އިތުރު ވަގުތުގައި މަތައިސް ޑި ލިޓް ބޮލުން ޖެހި ގޯލުން ޔުވެންޓަސް އިން އެއްވަރުކުރި އެވެ. މިއީ ހުއާން ކުއަޑްރާޑޯ ނެގި ހުރަހަކުން އޭރިއާތެރެއިން ހަމަޖެހިލާފައި ޑި ލިޓް ޖެހި ގޯލެކެވެ.
ދެ ވަނަ ހާފްގެ ކުރީކޮޅުގައި ޔުވެންޓަސް އަށް ލީޑުނަގައިދޭން ކުއަޑްރާޑޯ އާއި ޑިބާލާ ޖެހި ބޯޅަތައް ގޯލާ ސީދާނުވި އެވެ. މެޗު ނިމެން 15 މިނިޓަށް ވެފައި ހުއްޓައި ޔުވެންޓަސް މޮޅުކޮށްދިން ގޯލު ޖެހީ ޑިބާލާ ދިން ބޯޅަ އަކުން ޑޫސާން ވްލަހޯވިޗް އެެވެ.
