ހިޔާ ފްލެޓްތަކުގެ ކުލި ދައްކަން ނުފަށައި ގްރޭސް ޕީރިއަޑުގެ ގޮތުގައި ދިން މުހުލަތު ތިން ފަހަރެއްގެ މަތިން އިތުރުކޮށް، ޖުމްލަ ހަތް މަސް ދީފައި ކުލި ނަގަން ފެށުމުން ވެސް ހިޔާ ޔޫނިއަނުން އެކަމާ ދެކޮޅަށް ތެދުވީ އިއްޔެ އެވެ.
ހިޔާ ޔޫނިއަނުން އިއްޔެ ނެރުނު ބަޔާނެއްގައި ބުނީ ހިޔާ ފްލެޓްތަކަށް ކުލީގެ ގޮތުގައި ދެއްކޭނީ 5،600.ރ ގެ ރޭޓުން ކަމަށް ބުނެ 1900 މީހަކު ހައުސިން ޑިވެލޮޕްމެންޓް ކޯޕަރޭޝަނަށް ސިޓީ ފޮނުވާފައިވާ ކަމަށެވެ.
އިއްޔެ ނެރުނު އެ ބަޔާނުގައި ވަނީ ހިޔާ ފްލެޓްތަކަށް ދައްކަން ސަރުކާރާއި އެޗްޑީސީން ކަނޑައަޅާފައި ކުއްޔަކީ ނެގޭނެ އެއްވެސް ޖާގައެއް އޮތް އަދަދެއް ނޫން ކަމަށް ބުނެފަ އެވެ. މިގޮތަށް ހިޔާ ޔޫނިއަނުން ދެކޭއިރު، ހުޅުމާލޭގެ ފުރަތަމަ ފޭހުގައި އަދި މާލޭގައި އެކި ސަރުކާރުތަކުން އެޅި ފްލެޓްތަކުގެ ކުލި، އެތަންތައް ލިބުނު މީހުން ދައްކަމުން އަންނަނީ ސަރުކާރުތަކުން ކަނޑައެޅި ރޭޓްތަކުގަ އެވެ.
ކުލި ދައްކަން ފަށަން ނުޖެހޭ ކަމަށް ހިޔާ ޔޫނިއަނުން ދެކޭ ސަބަބުތަކެއް ދެއްކުމަށް ފަހު އެ ބަޔާނުގައި ބުނީ އެ ފްލެޓްތަކުގެ ކުއްޔާއި މެއިންޓެނެންސްފީ ނެގުން މިހާރުން މިހާރަށް ހުއްޓައިލަން ހައުސިން ޑިވެލޮޕްމެންޓް ކޯޕަރޭޝަނަށް "އަންގާ" ކަމަށް ވެސް އިއްޔެގެ ބަޔާނުގައި އޮތެވެ.
"... 01 އޭޕްރިލްގައި ހިޔާ ފްލެޓްގެ ކުލިނަގަން ހައުސިިން ޑިވެލޮޕްމެންޓް ކޯޕަރޭޝަނުން ނެރެފައިވާ އިއުލާނާ ގުޅިގެން ދަންނަވަމެވެ. ހައުސިިން ޑިވެލޮޕްމެންޓް ކޯޕަރޭޝަނުން ނެރެފައިވާ އިއުލާނުގައި ބުނާ ކުލި ނެގޭނެ އެއްވެސް ޖާގައެއް އޮތް ކަމަކަށް މި ޔޫނިއަނުން ނުދެކޭ ވާހަކަ ދަންނަވަމެވެ،" ހިޔާ ޔޫނިއަނުން އިއްޔެ ނެރުނު ބަޔާނުގައި ބުންޏެވެ.
ހިޔާ ފްލެޓްގެ ކުލި ކުޑަކުރުމަށާއި އެ ތަނުގައި ހުރި އެހެން މައްސަަލަތަކަށް ހައްލު ހޯދަން މަސައްކަތް ކުރަމުން ގެންދާ ކަމަށް ވެސް އެ ބަޔާނުގައި ބުންޏެވެ. އަދި، ރަމަޟާން މަހާ ދިމާކޮށް ފްލެޓުތަކަށް ކުލި ނެގުން އަދިވެސް އަވަސް ކަމަށް ދެކޭ ކަމަށް ވެސް އެ ބަޔާނުގައި ބުނެފައިވެ އެވެ. އެ ޔޫނިއަނުން ވަނީ ކުލި ނުދައްކައި މަޑުޖައްސާލުމަށް ވެސް ގޮވާލާފަ އެވެ.
"ހިޔާގެ ކަންކަމަށް ބަސްބުނާނީ އަބަދުވެސް ހިޔާގެ ވެރިންކަން ހަނދުމަކޮށްދެމެވެ،" ހިޔާ ޔޫނިއަންގެ ބަޔާނުގައި ބުންޏެވެ.
25 ބުރީގެ 16 ޓަވަރު ހިމެނޭ ހިޔާ މަޝްރޫއަކީ ކުރީގެ ރައީސް އަބްދުﷲ ޔާމީނުގެ ވެރިކަމުގައި ބޮޑެތި ލޯނުތަކެއް ނަގައިގެން ހިންގި މަޝްރޫއެކެވެ. އެއީ، އެޗްޑީސީން ނަގާފައިވާ ލޯނުތަކަކަށް ވާތީ ލޯނު އަނބުރާ ދައްކަން ޖެހޭނީ އެކުންފުނިންނެވެ.
ފްލެޓުތަކުން ނަގާ ކުލި
މި ފްލެޓުތަކަށް ދައްކަން ޖެހެނީ ފްލެޓު ކުލީގެ 7،500ރ. އާއި މެއިންޓެނަންސް ފީއަށް 1،000ރ. ހިމެނޭހެން، 8،500ރ. އެވެ. މި އަދަދާ މެދު ހިޔާ ފްލެޓު ލިބުނު މީހުންގެ މެދުގައި ދެބަސްވުމާއި ހިޔާލު ތަފާތުވުން އޮތަސް، ހުރިހާ ރައްޔިތުން ކުލި ދައްކަން އެޗްޑީސީން ވަނީ އަންގާފަ އެވެ.
އެގޮތުން، އެޗްޑީސީން ބުނީ ހިޔާ ސަރަހައްދުގައި ޕާކު ހެދުމާއި، މަގު ހެދުމާއި، މިސްކިތް އެޅުމާއި ސްކޫލްތައް އެޅުމުގެ މަސައްކަތް ކުރަނީ މި ފައިސާއިން ކަމުން މި ހިދުމަތްތައް ދެމެހެއްޓެނިވި ގޮތެއްގައި ފޯރުކޮށްދޭން ކުލި ދައްކަން އިލްތިމާސްކުރި އެވެ.
ހިޔާ ފްލެޓުތަކުގެ ކުލި ދެއްކުމުގެ މުއްދަތަކީ ކޮންމެ މީލާދީ މަހެއްގެ 10 ވަނަ ދުވަހާ ހަމައަށެވެ. އެ ތާރީހުގެ ފަހުން ކުލިން ދައްކާ ނަމަ ދައްކަން ޖެހޭ ކުލީގެ ޕަސެންޓެއް ޖޫރިމަނާގެ ގޮތުގައި އަދާކުރަން ޖެހޭނެ އެވެ.
ބައެއް މުހިންމު ހަބަރުތައް
- ސައުދީ އަރަބިއްޔާއިން ކޮންމެ ރޯދަމަހަކު ރާއްޖެއަށް ހަދިޔާކުރާ ކަދުރު މިފަހަރު ލިބޭނީ ރޯދަމަހުގެ ފަހު ދިހައިގެ ތެރޭގައި ކަމަށް އިސްލާމިކް މިނިސްޓްރީން ބުނީ އިއްޔެ އެވެ.
- މަސްވެރިކަން އިންތިހާއަށް ރަނގަޅުވެ މިފްކޯގެ ކެޕޭސިޓީއަށް ވުރެ އިތުރަށް މަސް ބާނަމުން ދާތީ، ބާނަމުންދާ މަސް ގަނެވޭނެ ގޮތެއް ހޯދުމުގެ މަސައްކަތުގައި ބޭރުގެ ބޯޓެއް ގެންނަން ހަމަޖެހިފައިވާ ކަމަށް ފިޝަރީޒް މިނިސްޓަރު ޑރ. ހުސައިން ރަޝީދު ހަސަން ވިދާޅުވީ އިއްޔެ އެވެ.
- ކުދި އަދި މެދު ފަންތީގެ ވިޔަފާރިތަކަށް މާލީ އެހީތެރިކަން ދޭން އުފައްދާފައިވާ ސަރުކާރުގެ ބޭންކް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) އިން ދޫކޮށްދޭ ލޯނުތަކަށް އެދުމުގެ ފުރުސަތު އަލުން ހުޅުވާލަން ނިންމީ އިއްޔެ އެވެ.
ދުވަހުގެ ކޯޓޭޝަން
ދެކުނު މަސްވެރިކަން ވަރަށް ބޮޑަށް ރަނގަޅުވެ ކެޕޭސިޓީއަށް ވުރެ އިތުރަށް މަސް ބާނަމުންދާތީ މަސް ކިރައި ފިނިކުރުމުގެ ކެޕޭސިޓީ އިތުރުކުރުމުގެ މަސައްކަތް ކުރަމުން އަންނަކަން ހާމަކުރަމުން ފިޝަރީޒް މިނިސްޓަރު ޑރ. ހުސައިން ރަޝީދު ހަސަން ވިދާޅުވީ:
"މަސްވެރިން ބާނާގެން ގެންނަ ހުރިހާމަހެއް އެއްބުރުން ނުގަނެވޭ މައްސަލަ ދާއިމީކޮށް ހައްލު ކުރެވޭނީ މަސްފުރީޒުކުރާ ކެޕޭސިޓީ ދެކުނުގައި މިހާރު ހުރިވަރަށްވުރެ އިތުރަށް ގާއިމުކޮށްގެނެވެ. މަސްގަތުމަށް ވަގުތީގޮތުން ބޭރުގެ ބޯޓެއް ހޯދުމަށްވެސް މިފްކޯ އިން ދަނީ މަސައްކަތް ކުރަމުންނެވެ."
ދުވަހުގެ ފޮޓޯ
އެފްއޭއެމް ވެޓެރަންސް ލީގު 2022 ގައި އިއްޔެ ހަވީރު ޕޮލިސް ކުލަބުން ގޯލެއް ޖަހާފައިވަނިކޮށް ފަހަތުން އަރައި 3-1 އިން ދަ ގްރާންޑޭ ސްޕޯޓްސް މޮޅުވި މެޗުގެ ތެރެއިން ލަނޑު ޖެހުމަށް ފަހު ދަ ގްރާންޑޭ ކުޅުންތެރިން އުފާފާޅުކުރަނީ. --- ފޮޓޯ: އަބްދުﷲ އިޔާން/ އަދަދު
ދިރާސާތަކުން ކިޔާލުމަށް
"އަ ކޮމްޕްރިހެންސިވް ހައުސިން މާކެޓު ސްޓަޑީ ފޯ ދަ ގްރޭޓާ މާލެ ރީޖަން"
މިއީ ގްރޭޓާ މާލެ ސަރަހައްދުގައި ބޯހިޔާވަހިކަމަށް ބޭނުންޖެހިފައިވާ މިންވަރު ދެނެގަތުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އާއި އިސްލާމިކް ޔުނިވާސިޓީ އޮފް ދަ މޯލްޑިވްސް (އައިޔޫއެމް) އަދި މޯލްޑިވް ނޭޝަނަލް ޔުނިވާސިޓީ (އެމްއެންޔޫ) ގުޅިގެން ކޮށްފައިވާ ދިރާސާއެކެވެ. މި ދިރާސާއަކީ ބޯހިޔާވަހިކަމުގެ ސިޔާސަތު ކަނޑައެޅުމުގައި މުހިންމު ދިރާސާއެކެވެ.
