ސްރީލަންކާގެ އިގްތިސާދީ ކާރިސާއާ ގުޅިގެން އަޅަންވީ ފިޔަވަޅުތަކުގެ ހުށަހެޅުމެއް، ސަރުކާރުގައި ހިމެނޭ 11 ޕާޓީ އާއި އިތުރު ދެ ޕާޓީއަކުން ރައީސް ގޮތަބަޔާ ރާޖަޕަކްސައަށް ހުށަހަޅައިފި އެވެ.
ސަރުކާރު ކޯލިޝަނުގައި ހިމެނޭ 11 ޕާޓީ އާއި ސްރީލަންކާ ފްރީޑަމް ޕާޓީ (އެސްއެލްއެފްޕީ) އަދި ސްރީލަންކާ ޕޮޑުޖަނާ ޕެރަމުނާ (އެސްއެލްޕީޕީ) އިން ވަނީ ގުޅިގެން ތައްޔާރު ކުރި ސިޓީއެއް ފޮނުވާފަ އެވެ.
ސިޓީގައި ޕާޓީތަކުން ފާހަގަކުރީ ހުރިހާ ޕާޓީތަކެއް ހިމެނޭ އިންތިގާލީ ސަރުކާރެއްގެ މުހިއްމު ކަމެވެ. އަދި އާ ބޮޑު ވަޒީރަކާއި، އާ މިނިސްޓަރުންނާއި، ސެކެޓްރީއިން އައްޔަނު ކުރުމުގައި ރައީސަށް ލަފާދޭން ހާއްސަ ނޭޝަނަލް އެގްޒެކްޓިވް ކައުންސިލެއް އުފައްދަން ހުށަހެޅި އެވެ.
ޕާޓީތަކުން ރައީސަށް ހުށަހެޅުމެއް ފޮނުވާފައިވާ އިރު، ސަރުކާރާއި ރައީސްގެ އިތުބާރު ނެތް ކަމުގެ މައްސަލައެއް ޕާލިމެންޓުގެ ތެރެއިން ކުރިއަށް ގެންދިޔުމުގެ ވާހަކަ އިދިކޮޅު ޕާޓީތަކުން ދަނީ ދައްކަމުންނެވެ.
އިދިކޮޅު ސަމަގި ޖަނާ ބަލަވެގަޔަ (އެސްޖޭބީ) އިން އިތުބާރު ނެތް ކަމުގެ މައްސަލައަށް ބޭނުންވާ ސޮއި އެއްކުމުގެ މަސައްކަތް ވަނީ ހުކުރު ދުވަހު ފަށާފަ އެވެ.
ރައީސް ގޮތަބަޔާ މި ހަފްތާގައި ވިދާޅުވެފައި ވަނީ މުޒާހަރާކޮށް، ފިއްތުންތައް ކުރިމަތި ކުރުވި ނަމަވެސް އެއްވެސް ހާލަތެއްގައި އިސްތިއުފާ ނުދެއްވާނެ ކަމަށެވެ.
