ކްރިކެޓް ބޯޑް އޮފް މޯލްޑިވްސް (ސީބީއޭއެމް) އިން ކޮންމެ ރަމަޟާން މަހަކަށް ހާއްސަކޮށްގެން ކުރިއަށްގެންދާ ކްރިކެޓް ކާނިވަލުގައި އިއްޔެ ކުޅުނު އޯޕަން ޓޭޕްބޭލް މުބާރާތުގެ މެޗުތަކުން އައިބީއެސް އާއި ގަލޮޅު ކަންމަތި މޮޅުވެއްޖެ އެވެ.
ކުޅިވަރު އެކުވެނި އެއް ނަމްބަރު ދަނޑުގައި އިއްޔެ ހަވީރު ފުރަތަމަ ކުޅުނު މެޗުގައި މީޓިއޯސްއާ ބައްދަލުކޮށް އައިބީއެސް ކާމިޔާބުކުރީ ހަތް ވިކެޓުންނެވެ.
ޓޮސް ދިމާވުމުން މީޓިއޯސް އިން ނިންމީ ބެޓް ކުރުމަށެވެ. މީޓިއޯސް އިން ކުޅެންއަރައި އަށް އޯވަރު ކުޅެގެން ތިން ކުޅުންތެރިން ނުބައިވިއިރު، ހެދުނީ 109 ލަނޑެވެ. އެ ޓީމުން އެންމެ ރަނގަޅަށް ކުޅުނީ 35 ލަނޑު ހެދި އަލީ ސުނާން އާއި 21 ލަނޑު އެއްކުރި އިބްރާހިމް އަލީ އެވެ. އައިބީއެސްގެ ހުސެން ރިޔާޒު ވަނީ މި އިނިންސްގައި ދެ ވިކެޓް ނަގައިފަ އެވެ.
ޖަވާބުގައި އައިބީއެސް އިން ކުޅެން އަރައި ހަތް އޯވަރުގެ ތެރޭގައި އެންމެ ކުޅުންތެރިއެއް ނުބައިވެގެން ވަނީ 112 ލަނޑު ހަދައި މެޗުން މޮޅުވެފަ އެވެ. އައިބީއެސް ޓީމަށް އެންމެ ރަނގަޅު ކުޅުމެއް ދެއްކީ 34 ލަނޑު ހެދި ފައިސަލް އާއި 31 ލަނޑު އެއްކުރި ހަސަން އިބްރާހިމް އެވެ.
އިއްޔެ ކުޅުނު ދެ ވަނަ މެޗުގައި ކިންޒާ ކެފޭއާ ވާދަކޮށް ގަލޮޅު ކަންމަތި މޮޅުވީ ހަތަރު ވިކެޓުންނެވެ. ކިންޒާ އަށް ޓޮސް ދިމާވުމުން ނިންމީ ބެޓިން އަށް ދިއުމަށެވެ. ކިންޒާ އިން އަށް އޯވަރުގެ ތެރޭގައި ހަތަރު ކުޅުންތެރިން ނުބައިވެގެން 113 ލަނޑު ހެދި އެވެ. އެންމެ ރަނގަޅު ކުޅުމެއް ދެއްކީ 23 ލަނޑު ހެދި ސަލާމް މުހައްމަދު އެވެ.
ޖަވާބުގައި ގަލޮޅު ކަންމަތިން ކުޅެން ނުކުމެ، ހަތް އޯވަރުގެ ތެރޭގައި 117 ލަނޑު ހަދައި މެޗުން މޮޅުވި އެވެ. އެންމެ ރަނގަޅު ކުޅުމެއް ދެއްކީ 42 ލަނޑު ހެދި މުހައްމަދު އަފްލާހު އެވެ. އެ ޓީމުގެ އަލީ ސުޒޭން ވަނީ 17 ލަނޑު ހަދައިފަ އެވެ.
މުބާރާތުގައި މިއަދު ވެސް ދެ މެޗެއް ކުޅޭނެ އެވެ. ފުރަތަމަ މެޗުގައި ލަވާލިޔާ ކުޅޭނީ އެމްއޭސީއެލްއާ އެވެ. އެ މެޗަށް ފަހު ދެ ވަނަ މެޗު ފަށާއިރު، ސަންކުއިކް ލިލީން ނުކުންނާނީ ސުގަ ކޯންއާ ދެކޮޅަށެވެ.
