ސްރީ ލަންކާގެ މަރުކަޒީ ބޭންކްގެ ކުރީގެ ގަވަރުނަރު އަޖިތު ނިވާރްޑް ކަބްރާލް އެޕްރީލް 18 ވަނަ ދުވަހުގެ ކުރިން ގައުމުން ފުރުން މަނާކޮށްފި އެވެ.
އެޕްރީލް 18 ވަނަ ދުވަހު އޮންނަ އަޑުއެހުމަކަށް ކޯޓަށް ހާޒިރުވުމަށް ކަބްރާލްއަށް ވަނީ ޗިޓު ފޮނުވާފަ އެވެ. އެއީ ކުރީގެ ގަވަރުނަރު ކީރްތި ޓެންނަކޫން ހުށަހަޅާފައިވާ މައްސަލައަކާ ގުޅިގެންނެވެ.
ކޯޓަށް ހުށަހެޅި މައްސަލައިގައި ބުނެފައި ވަނީ މަރުކަޒީ ބޭންކްގެ ގަވަރުނަރުގެ މަގާމުގައި ހުންނަވައި، ދައުލަތުގެ ފައިސާ ނުހައްގުން ބޭނުން ކުރައްވާފައިވާ ކަމަށެވެ.
ލަންކާގައި އިގްތިސާދީ އަދި މާލީ ކާރިސާއެއް އުފެދި، އާއްމުން މުޒާހަރާ ކުރަން ފެށުމުން، ގަވަރުނަރުގެ މަގާމުން ކަބްރާލް އިސްތިއުފާ ދެއްވީ މި ހަފްތާގަ އެވެ.
އޭނާގެ އިސްތިއުފާއާ ގުޅިގެން، ބުރާސްފަތި ދުވަހު އާ ގަވަރުނަރުގެ މަގާމަށް އައްޔަނު ކުރެއްވީ ޑރ. ނަންދަލާ ވީރަސިންގެ އެވެ.
ލަންކާގެ ހާލަތު ގޯސްވެފައި ވާތީ، އެމެރިކާއިން ވަނީ އެ ގައުމަށް ދަތުރު ކުރުމާ ދެކޮޅަށް އާ އެޑްވައިޒަރީއެއް ނެރިފަ އެވެ. ތެލާއި ބޭހުގެ ދަތިކަމުގެ އިތުރުން ޓެރަރިސްޓް ހަމަލާއެއްގެ ނުރައްކާ ވެސް އެޑްވައިޒަރީގައި ފާހަގަކޮށްފައިވެ އެވެ.
"ތެލާއި ބޭހުގެ ދަތިކަން އަދި ކޮވިޑާ ހެދި ސްރީލަންކާއަށް ދަތުރު ނުކުރަން އެދެން. ޓެރަރިޒަމްގެ ސަބަބުން ލަންކާގައި އުޅޭ އިރު އިތުރަށް ސަމާލުވާން ޖެހޭނެ،" އެޑްވައިޒަރީގައި ބުންޏެވެ.
