ލަންޑަން (އޭޕްރީލް 7) - އިނގިރޭސި ޕްރިމިއާ ލީގުގައި ރޭ ފަހު ވަގުތު ބާންލީ އަތުން ބަލިވެ، އެވަޓަން އިން ރެލިގޭޝަނުގެ ބިރާ ކުރިމަތިލާން ޖެހިފައިވާއިރު، އެ ޓީމުގެ ކޯޗު ފްރޭންކް ލަމްޕާޑަށް ވަޒީފާ ގެއްލިދާނެ ކަމުގެ ބިރު ބޮޑުވެއްޖެ އެވެ.
ޖެނުއަރީ މަހު ފަހުކޮޅު އެވަޓަން އިން ލަމްޕާޑް ކޯޗަކަށް ހަމަޖެއްސީ ދެ އަހަރު ބައިގެ ކޮންޓްރެކްޓެއްގަ އެވެ. ސްޕެއިންގެ ކޯޗު، ރަފައެލް ބެނިޓޭޒާ އެކު މި ސީޒަން ފެށި، އެވަޓަން އިން ލަމްޕާޑްގެ ކޯޗުކަމުގައި ލީގުގައި ކުޅުނު 12 މެޗުގެ ތެރެއިން އަށް މެޗުން ވަނީ ބަލިވެފަ އެވެ. އެންމެ ފަހުން ލީގުގައި އެވަޓަން އިން ކުޅުނު ހަތް މެޗުގެ ތެރެއިން ހަ މެޗުން ބަލިވިއިރު، ރޭ ބާންލީގެ އަތްދަށުވީ އެވަޓަން ލީޑުގައި އޮއްވައި ބާންލީ ފަހަތުން އަރައި ޖެހި ގޯލުތަކުން 3-2 އިންނެވެ.
އެވަޓަން އެންމެ ފަހުން ރެލިގޭޓްވީ ބައިގަރުނަށް ވުރެ ގިނަ އަހަރުތަކެއް ކުރިން 1951 ވަނަ އަހަރު އެވެ. ރޭ ބާންލީ އަތުން ލިބުނު ނާކާމިޔާބީއާ އެކު އެވަޓަންއާ ރެލިގޭޝަން ޒޯނާ އޮތް ފަރަގަކީ އެއް ޕޮއިންޓެވެ.
ލީގު ތާވަލުގެ 17 ވަަނައިގައި އެވަޓަން އޮތީ 29 މެޗުން 25 ޕޮއިންޓާ އެކު އެވެ. ބާންލީ 18 ވަނައިގައި އޮތީ 29 މެޗުން 24 ޕޮއިންޓް ހޯދައިގެންނެވެ. ފުލުން ދެ ވަނައިގައި އޮތް ވަޓްފޯޑަށް 30 މެޗުން ވަނީ 22 ޕޮއިންޓް ލިބިފަ އެވެ. އެންމެ ފަހަތުގައި އޮތް ނޮރިޗް ސިޓީ އަށް ވަނީ 30 މެޗުން 18 ޕޮއިންޓް ލިބިފަ އެވެ.
އީރާންގެ މަހުޖަނު ފަރުހާދު މޮޝިރީ، 2016 ވަނަ އަހަރު އެވަޓަން ގަތް ފަހުން ގިނަ ކޯޗުންތަކެއް ބަދަލުކޮށްގެން ވެސް ބޭނުންވާ މިސްރާބަށް އެ ކްލަބަށް ނުދެވެ އެވެ. މޮޝިރީގެ މި ދައުރުގައި އެވަޓަންގައި މަޝްހޫރު ކޯޗުންތަކެއް މަސައްކަތް ކޮށްފައިވާއިރު، ޖުމްލަ އެއްކޮށް 500 މިލިއަން ޑޮލަރަށް ވުރެ ބޮޑު އަދަދެއް އާ ކުޅުންތެރިންނަށް ވަނީ ހޭދަކޮށްފަ އެވެ.
އިނގިރޭސި ފުޓްބޯޅައިގެ ތަޖުރިބާކާރުން ގަބޫލުކުރާގޮތުގައި އެވަޓަން އިން ލީގު ސީޒަނުގެ ފަހު ނުވަ މެޗާ ކުރިމަތިލާއިރު، މި ވަގުތު މުހިންމު ފިޔަވަޅުތަކެއް ނާޅައިފިނަމަ ރެލިގޭޓްވުމުގެ ބިރު ވެސް އެބައޮތެވެ.
ރިޕޯޓްތައް ބުނާގޮތުން އެވަޓަންގެ ސީނިއާ މެނޭޖްމަންޓާއި ލަމްޕާޑް ކުރިއަށް އޮތް ދުވަސްތަކުގެ ތެރޭގައި ކްލަބްގެ ހާލަތާއި މެޗުތަކުގެ ނަތީޖާއާ ބެހޭގޮތުން މަޝްވަރާކުރަން ބައްދަލުކުރާނެ އެވެ. އެ ބައްދަލުވުމާ ދިމާކޮށް، އެވަޓަންގެ ގިނަ ސަޕޯޓަރުން އަޑުއުފުލަމުން އަންނަނީ ލަމްޕާޑް މަގާމުން ވަކިކުރުމަށް އެދި އެވެ. އަދި ރެލިގޭޝަނުން ޓީމުތައް ސަލާމަތްކުުރުމުގެ ތަޖުރިބާހުރި ކޯޗެއް ގެންނަން ވެސް ބައެއް ސަޕޯޓަރުން އަންނަނީ ގޮވާލަމުންނެވެ.
ދާދި ފަހުން ނޫސްވެރިންގެ ބައްދަލުވުމެއްގެ ތެރެއިން ރެލިގޭޝަން ޒޯނުގައި ކުޅެން ޖެހުމުގެ ވާހަކައާ ގުޅޭ ސުވާލެއް ލަމްޕާޑް ގާތުގައި އެހުމުން ބުނީ ކުޅުންތެރިއެއްގެ ގޮތުގައި ވެސް ވާދަވެރި ތަފާތު ރޫހެއްގެ މެޗުތައް ކުޅެން ހާއްސަ ޝައުގުވެރިކަމެއް ހުންނަ ކަމަށެވެ. އެ ގޮތަށް ވިސްނާއިރު، ރެލިގޭޝަން ޒޯނުގައި އޮވެގެން އެވަޓަން ގޮވައިގެން މި ކުޅެން ޖެހޭ މެޗުތަކުގެ "ޓެންޝަން" އަކީ ކްލަބްގައި ތިބި ކުޅުންތެރިންގެ އަސްލު ލެވަލްގައި ކުޅެލަން ލިބޭނެ ހިތްވަރަކަށް ހެދޭނެ ކަމަށް ލަމްޕާޑް ވަނީ ބުނެފަ އެވެ.
އެވަޓަން އަށް ދެން އޮތް މެޗުތަކަކީ މެންޗެސްޓާ ޔުނައިޓެޑް (އަމިއްލަ ދަނޑުގައި)، ލެސްޓާ ސިޓީ (އަމިއްލަ ދަނޑުގައި)، ލިވަޕޫލް (ރަށުންބޭރުގައި)، ޗެލްސީ (އަމިއްލަ ދަނޑުގައި)، ލެސްޓާ ސިޓީ (ރަށުންބޭރުގައި)، ވަޓްފޯޑް (ރަށުންބޭރުގައި)، ބްރެންޓްފޯޑް (އަމިއްލަ ދަނޑުގައި)، ކްރިސްޓަލް ޕެލެސް (އަމިއްލަ ދަނޑުގައި) އަދި އާސެނަލް (ރަށުންބޭރުގައި) އެވެ.
