ބައިނަލްއަގްވާމީ ޓޭބަލް ޓެނިސް ދުވަސް ފާހަގަކުރުމުގެ ގޮތުން އައްޑޫ ސިޓީ ކައުންސިލާ ގުޅިގެން އައްޑޫގައި ހާއްސަ ހަރަކާތްތަކެއް ޓޭބަލް ޓެނިސް އެސޯސިއޭޝަނުން ކުރިއަށް ގެންގޮސްފި އެވެ.
ދުނިޔޭގެ ޓޭބަލް ޓެނިސް ދުވަސް ކޮންމެ އޭޕްރީލް މަހެއްގެ ވެސް ހަ ވަނަ ދުވަހު މުޅި ދުނިޔޭގައި ފާހަގަކުރަމުން އަންނައިރު، ރާއްޖޭގައި ވެސް ވަނީ މި ދުވަސް މީގެ ކުރިން ކުލަގަދަކޮށް ފާހަގަކޮށްފަ އެވެ. މި އަހަރު ދުނިޔޭގެ ޓީޓީ ދުވަސް ފާހަގަކުރުމުގެ މައިގަނޑު ހަރަކާތްތައް ކުރިއަށް ދިޔައީ އައްޑޫ ސިޓީގަ އެވެ.
އައްޑޫ ސިޓީގައި މި އަހަރު ދުނިޔޭގެ ޓޭބަލް ޓެނިސް ދުވަސް ފާހަގަކުރަން ނިންމިއިރު ޓޭބަލް ޓެނިސް އެސޯސިއޭޝަނުން ވަނީ މީގެ މިއަހަރު މުޅި ރާއްޖެ އަށް ޓޭބަލް ޓެނިހުގެ ހަރަކާތްތައް ފުޅާކުރުމުގެ ޕްލޭނެއްވެސް ރާވައިފަ އެވެ.
އައްޑޫ ސިޓީގައިި ހިންގާ ހަރަކާތްތަކުގައި ބައިވެރިވުމަށް އެސޯސިއޭޝަންގެ އިސްވެރިންނާއި ގައުމީ ޓީމުގެ ކުޅުންތެރިންގެ އިތުރުން ކުރީގެ ޗެމްޕިއަނުންވެސް ބައިވެރިވި އެވެ.
މިއަދު ހަވީރު އައްޑޫ ސިޓީ ސްކޮޔާގައި ކުރިއަށްދިޔަ ހަރަކާތްތަކުގައި ގައުމީ އަންހެން ޓީމުގެ އައިޝަތު ރަފާ ނާޒިމް، ރާއްޖޭގެ ގައުމީ ޗެމްޕިއަން މޫސާ މުންސިފް، ކުރީގެ ޝަރަފްވެރި ދެ ޗެމްޕިއަނުން ކަމަށްވާ އަލި މަނިކު (ތާޅަފިލި އަލިބެ) އަދި މުއީނާ މުހައްމަދު ބައިވެރިވި އެވެ.
މީގެ އިތުރުން އެސޯސިއޭޝަންގެ ރައީސް އަލީ ރަޝީދު، ނައިބް ރައީސް އިބްރާހިމް ޝިއުރީ އަދި ޖެނެރަލް ސެކްރަޓްރީ އައިޝަތު ސަމާހަތުގެ އިތުރުން ހަޒާންދާރު އަހުމަދު ޝާޒިލްވެސް ބައިވެރިވި އެވެ.
އައްޑޫ ސިޓީގެ ސްކޫލްތަކުގެ ދަރިވަރުން ބައިވެރިވި މި ހަރަކާތްތަކުގައި ކުރީގެ އަދި މިހާރުގެ ޗެމްޕިއަނުންނާ އެކު ކުޅުމުގެ ފުރުސަތު ބައިވެރިންނަށް ލިބިފައިވާއިރު، ޓީޓީއާ ގުޅުންހުރި ތަފާތު އެކި މައުލޫމާތު ވެސް ވަނީ ފޯރުކޮށްދީފަ އެވެ. ޓީޓީއާ ގުޅުން ހުރި ސުވާލުތައް ކޮށްލުމާއި ޗެމްޕިއަނުންގެ ހަޔާތުގެ މުހިންމު މައުލޫމާތު ހިއްސާކުރުން ވެސް ކުރިއަށްދިޔަ އެވެ.
ޓީޓީ އެސޯސިއޭޝަންގެ ވެރިންނާއި އައްޑޫ ކައުންސިލްގެ ވެރިން ބޭއްވި ބައްދަލުވުމުގެ ތެރެއިން.-- ފޮޓޯ: އައްޑޫ ކައުންސިލް/ފޭސްބުކް
މީގެ އިތުރުން ޓީޓީ އެސޯސިއޭޝަނާއި އައްޑޫ ކައުންސިލް ގުޅިގެން އައްޑޫގައި ޓީޓީ ފުޅާކުރަން ކުރެވޭނެ މަޝްވަރާތައް ވަރަށް ފުޅާކޮށް ކުރިއަށްގެންދިޔަ އެވެ.
އައްޑޫ ސިޓީގެ މޭޔަރު އަލީ ނިޒާރު ވެސް ބައިވެރިވި މި ހަރަކާތްތަކުގައި ޓީޓީ އެސޯސިއޭޝަނުން ވަނީ އައްޑޫ ސީޓީގައި ޓޭބަލް ޓެނިސް ކުރިއެރުމަށް އެހީތެރިވެދޭނެކަމުގެ ޔަގީންކަން ދީފަ އެވެ. އަދި އެ ސިޓީގައި ތަމްރީން ޕްރޮގްރާމްތައް ކުރިއަށްގެންދެވޭނެ ގޮތްތަކާއި ގުޅޭގޮތުން ވެސް މަޝްވަރާތައް ކުރި އެވެ.
އެ ގޮތުން ޓީޓީ ޒުވާނުންގެ މަރުކަޒުގައި މިހާރަށް ވުރެ ބޮޑަށް ޓީޓީ ހަރަކާތްތައް ބޭއްވޭނެ ގޮތްތަކާ ބެހޭ ގޮތުން ވެސް ވަނީ ވާހަކަ ދެކެވިފަ އެވެ.
ދުނިޔޭގެ ޓޭބަލް ޓެނިސް ދުވަސް ފާހަގަކުރުމަށް މާލޭގައި ހަރަކާތްތައް ކުރިއަށް ގެންގޮސްފައި ވަނީ އިހާ އެކަޑެމީ އިންނެވެ. އެ އެކަޑެމީ އިން ވަނީ މާލޭގެ އާޓިފިޝަލް ބީޗުގައި އިއްޔެ ޓޭބަލް ޓެނިސް ކުޅުމުގެ ހަރަކާތްތަކެއް ކުރިއަށް ގެންގޮސްފަ އެވެ.
