ހުޅުމާލޭ ފަޅުގައި އޮތް ދޯންޏަކުން ފެނުނު 130 ކިލޯގެ މަސްތުވާތަކެއްޗާއެކު ހައްޔަރުކުރި މީހުންގެ ތެރެއިން އެކަމުގައި އިސްކޮށް ހުރި ދެ މީހުން ބޭސްފަރުވާއަށް ކްރިމިނަލް ކޯޓުން ދޫކޮށްލައިފި އެވެ.
ހަތް މީހަކު ހައްޔަރުކޮށް ދައުވާ އުފުލާފައިވާއިރު، އޭގެ ތެރެއިން އެންމެ އިސް ދެ މީހުން ކަމަށް ފުލުހުން ތުހުމަތު ކުރަނީ ގއ. ވިލިނގިލި, ލައިޓް ހައުސް, ޝަހީބް އިބްރާހީމް އާއި ހއ. ހޯރަފުށި، ވައިލެޓްވިލާ، އަހްމަދު މޫސާއަށެވެ.
މިއަދު ކްރިމިނަލް ކޯޓުގައި ކުރިއަށް ދިޔަ އަޑުއެހުމުގައި އޮތީ ޝަރީއަތުގެ ކުރިން ހުށަހަޅާ ހުށަހެޅުންތަކެވެ. އެގޮތުން ޝަހީބާއި އަހްމަދު މޫސާގެ ބޭސްފަރުވާއަށް ރިއާޔަތްކޮށް ބަންދު މުރާޖައާ ކޮށްދޭން ދެ ފަރާތުގެ ވަކީލުން ވެސް ހުށަހެޅި އެވެ.
ޝަހީބުގެ ދިފާއީ ވަކީލުވަނީ އޭނާގެ ނަފްސާނީ މައްސަލަތަކާއި ކަށީގެ މައްސަލަތައް ހުރިކަމަށް ފާހަގަކުރައްވާފަ އެވެ. އޭނާގެ މައިބަދައިގެ ދެ ޑިސްކު ގުޑާފައިވާއިރު އެކަމަށް ފަރުވާ ނުލިބޭ ކަމަށާއި، ޑޮކްޓަރުން ދިން ލަފައާ އެއްގޮތަށް އޭނާއަށް ކައުންސެލިން ދެމުން ނުދާ ކަމަށް ބުންޏެވެ.
އަހްމަދު މޫސާގެ ވަކީލު ފާހަގަ ކުރެއްވި ގޮތުގައި އޭނާގެ ނޭވާލާ ނިޒާމުގައި މައްސަލަތަކެއް ވަނީ ދިމާވެފަ އެވެ. އެކަމާ ގުޅިގެން ހަދަން ޖެހޭ ޓެސްޓުތައް ވެސް މިހާތަނަށް ހެދިފައި ނެތްކަން ވަނީ ފާހަގަކޮށްފަ އެވެ. އެ ފުރުސަތުތައް ނުލިބޭތީ ބޭސްފަރުވާއަށް ދޫކޮށްދޭން އެދުނެވެ.
ދައުލަތާއި ސުވާލު ކުރުމުން، ދައުލަތުން ވެސް ވަނީ އަހްމަދު މޫސާ ހަދަން ޖެހިފައި ހުރި ޓެސްޓްތަކާއި ޝަހީބަށް ވެސް ކައުންސެލިންގެ ކަންކަން އަދި އެންމެ ފުރިހަމައަށް ނުދާ ކަމަށް ބުނެފަ އެވެ.
ދެ ފަރާތުން ވެސް ދެއްކި ވާހަކަތަކަށް ރިއާޔަތް ކުރެއްވުމަށް ފަހު، މައްސަލަ ބެއްލެވި ގާޒީ ވަނީ ދެ މީހުން ވެސް ބޭސްފަރުވާއަށް ދޫކޮށްލަން ނިންމަވައިފަ އެވެ. ނަމަވެސް، ރާއްޖޭން ބޭރަށް ފުރުން ވަނީ މަނާކޮށްފަ އެވެ. އަދި، ބޭސްފަރުވާއަށް ބަންދުގެ ލުއި ދެނީ ދެ މަސް ދުވަހަށް ކަމަށް ގާޒީ ވިދާޅުވި އެވެ.
ރާއްޖެއަށް ކަނޑުމަގުން ގިނަ އަދަދެއްގެ މަސްތުވާތަކެތި އެތެރެކުރަން އުޅޭ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން މި މައްސަލައިގައި ހަތް މީހަކު ހައްޔަރުކުރީ 2019 ގަ އެވެ. މި ހަތް މީހުންގެ ތެރޭގައި ހިމެނޭ ހަ މީހުންނަކީ 25 އަހަރާއި 48 އަހަރާ ދެމެދުގެ ފިރިހެނުންނެވެ. ދެން ހިމެނެނީ 18 އަހަރު ނުފުރޭ ކުޑަ ކުއްޖެކެވެ.
މި ދެމީހުންގެ ތެރެއިން ޝަހީބަކީ 2019 ނޮވެމްބަރު މަހުގެ ތެރޭގައި ރާއްޖެއަށް މަސްތުވާތަކެތި އެތެރެކުރާކަމަށް ތުހުމަތުކުރެވޭ މައްސަލައަކާ ގުޅިގެން ރާއްޖޭގެ ކަނޑުގެ ސަރަހައްދު ތެރެއިން ފުލުހުންގެ ބެލުމުގެ ދަށަށް ގެނައި އިރާން ބޯޓުގެ މައްސަލައާ ވެސް ގުޅުން އޮތް މީހެކެވެ.
ރާއްޖެއަށް މަސްތުވާތަކެތި އެތެރެކުރަން އުޅުނު ކަމުގެ ތުހުމަތުގައި ހިފެހެއްޓި އިރާން ބޯޓުން ހައްޔަރުކުރި ހަތް މީހުން ދޫކޮށްލިއިރު ޖާމިނުވީ ޝަހީބު އެވެ.
