އަމްސްޓެޑަމް، ނެދަލެންޑްސް (އޭޕްރީލް 6) - ގަތަރުގައި މި އަހަރު ފަހުކޮޅުގައި ބާއްވާ ފީފާ ވޯލްޑް ކަޕަށް ފަހު ނެދަލެންޑްސް ގައުމީ ޓީމުގެ ކޯޗުކަމާ ހަވާލުވާން ރޮނާލްޑް ކޫމަން ނިންމައިފި އެވެ.
ކޫމަން އަލުން ނެދަލެންޑްސް ކޯޗުކަމަށް ގެންނަން ނިންމީ މި ވަގުތު އެ ޓީމާ ހަވާލުވެގެން ހުރި ތަޖުރިބާކާރު ކޯޗު ލުއީ ވެން ހާލް، ޕްރޮސްޓޭޓް ކެންސަރަށް ފަރުވާ ހޯދަމުންދާކަން އިއުލާނުކުރުމާ ގުޅިގެންންނެވެ. މިދިޔަ ދެ އަހަރު ކެންސަރަށް ފަރުވާ ހޯދަމުން އައި ވެން ހާލް، ވޯލްޑް ކަޕަށް ފަހު ހާއްސަ މެޑިކަލް ކެއާއަކަށް ދާން އުޅޭ ކަމަށް މީޑިއާ ރިޕޯޓްތައް ބުނެ އެވެ.
މިއީ ކޫމަން، 59، ނެދަލެންޑްސް ގައުމީ ޓީމަށް އިރުޝާދުދޭނެ ދެ ވަނަ ފަހަރެވެ. މީގެ ކުރިން ކޫމަން ވަނީ 2018 ވަނަ އަހަރުގެ ވޯލްޑް ކަޕަށް ނެދަލެންޑްސް ކޮލިފައިނުވުމުން އެ ގައުމުގެ ފުޓްބޯޅަ ވެއްޓުނު އަޑިގަޑުން ނަގައި ކޮޅަށް ޖެހުމަށް ކުރެވުނު މަސައްކަތުގައި ބައިވެރިވާން ނެދަލެންޑްސް ކޯޗުކަމާ ހަވާލުވެފަ އެވެ. އެ ފަހަރު އޭނާ ވަނީ 2019 ވަނަ އަހަރުގެ ޔުއެފާ ނޭޝަންސް ލީގުގެ ފައިނަލުން ވެސް ނެދަލެންޑްސް އަށް ފުރުސަތު ހޯދައިދީފަ އެވެ.
ކޫމަން، ނެދަލެންޑްސް ކޯޗުކަން ދޫކޮށްލީ 2020 ވަނަ އަހަރު، ބާސެލޯނާއާ ހަވާލުވާށެވެ. މިދިޔަ އޮކްޓޫބަރު މަހު ބާސެލޯނާގެ ކޯޗުކަމުން ވަކިކުރި ކޫމަން މިވީ މުއްދަތުގައި ހުރީ ކޯޗިން ވަޒީފާއެއް ނެތި އެވެ.
ކޫމަން ބުނީ އަލުން ނެދަލެންޑްސް ގައުމީ ޓީމަށް އަންނަން ހުށަހެޅުން ލިބުމުން އެންމެ ބޮޑު ހިތްހަމަޖެހުމެއް ލިބުނީ ކުރިން ކުރަމުން އައި ރަނގަޅު މަސައްކަތް އަލުން ފަށައި، ކުރިއަށް ވުރެ ރަނގަޅު މިސްރާބަކަށް ޓީމު ގެންދަން ފުރުސަތު ލިބޭނެތީ ކަމަށެވެ.
ނެދަލެންޑްސްގެ ފުޓްބޯޅަ ފެޑެރޭޝަންގެ ޑިރެކްޓަރު މަރިއާން ވެން ލިއުވެންއާ ހަވާލާދީ އެ ގައުމުގެ ބައެއް ނޫސްތަކުން ރިޕޯޓްކުރާގޮތުގައި މި ފަަހަރުގެ ވޯލްޑް ކަޕްގައި ނެދަލެންޑްސްގެ ޓެކްނިކަލް ސްޓަޑީ ގްރޫޕްގައި ކޫމަން ހަރަކާތްތެރިވާނެ އެވެ. އަދި ޓީމަށް އެހީ ބޭނުންވާ އެކި ދާއިރާތަކުން ކޫމަން ސަޕޯޓް ހޯދާނެ އެވެ.
ނެދަލެންޑްސް އޮތީ ވޯލްޑް ކަޕްގެ ގްރޫޕް އޭގަ އެވެ. އެ ގްރޫޕްގައި ދެން އޮތީ މުބާރާތް ބާއްވާ ގަަތަރާއި ސެނެގާލް އެވެ. ނެދަލެންޑްސް އިން ވޯލްޑް ކަޕްގައި ކުޅޭ ފުރަތަމަ މެޗުގައި ނުކުންނާނީ ސެނެގާލާ ދެކޮޅަށެވެ.
