މުމްބާއީ (އޭޕްރިލް 6) - އިންޑިއަން ޕްރިމއާ ލީގު (އައިޕީއެލް)ގެ ފުރަތަމަ ދެ މެޗު ބޮޑު މޮޅަކާ އެކު ކާމިޔާބުކޮށްފައިވާ ރާޖަސްތާން ރޯޔަލްސް އަތުން ރޯޔަލް ޗެލެންޖާސް ބެންގަލޫރު މޮޅުވެއްޖެ އެވެ.
ދުނިޔޭގެ އެންމެ އަގުބޮޑު ކްރިކެޓް ލީގުގެ ކަމަށްވާ އިންޑިއަން ޕްރިމިއާ ލީގު މިދިޔަ މަހު ފަށާފައިވާއިރު، ތާވަލްގެ އެއް ވަނައިގައި އޮތީ ރާޖަސްތާން ރޯޔަލްސް އެވެ. ހަ ޓީމަކަށް ހަތަރު ޕޮއިންޓް ލިބިފައި އޮތް ނަމަވެސް ރާޖަސްތާން އެއް ވަނައިގައި އޮތީ ނެޓް ރަންރޭޓަށް ބަލާއިރު ކުރި ލިބޭތީ އެވެ. އެ ޓީމުން ވަނީ ކުޅުނު ފުރަތަމަ ދެ މެޗުގައި ސަންރައިޒާސް ހައިދްރާބާދު އާއި މުމްބާއީ އިންޑިއަންސް އަތުން މޮޅުވެފަ އެވެ.
ތިން ވަނަ މެޗުގައި ރޭ ބެންގަލޫރު އަތުން ރާޖަސްތާން ބަލިވީ ހަތަރު ވިކެޓުންނެވެ. މިއީ ބެންގަލޫރު ޖެހިޖެހިގެން މޮޅުވި ދެ ވަނަ މެޗެވެ. ފުރަތަމަ މެޗުގައި ޕަންޖާބު ކިންގްސް އަތުން ބަލިވި ނަމަވެސް ދެ ވަނަ މެޗުގައި އެ ޓީމުން ވަނީ ކޮލްކަތާ އަތުން މޮޅުވެފަ އެވެ.
ރާޖަސްތާން އާއި ބެންގަލޫރު ވާދަކުރި މެޗުގެ ޓޮސް ދިމާވުމުން ބެންގަލޫރުން ނިންމީ ރާޖަސްތާނަށް ބެޓްކުރަން ފުރުސަތުދޭށެވެ. ރާޖަސްތާން ކުޅެން އަރައި ތިން ކުޅުންތެރިން ނުބައިވެގެން 169 ލަނޑު ހެދި އެވެ. އެ ޓީމުގެ އޯޕަނިން ބެޓްސްމަން ޖޯ ބަޓްލާ ނުބައިނުވެ 47 ބޯޅައިން 70 ލަނޑު ހެދިއިރު، ޝިމްރޮން ހެތުމަޔާ 31 ބޯޅައިން 42 ލަނޑު ހެދި އެވެ.
ރަނގަޅު ސްކޯއަކާ އެކު އުކަން ނުކުމެ ރާޖަސްތާނުން ރަނގަޅަށް ފެށި އެވެ. މި އިނިންގްސްގެ ހަތް ވަނަ އޯވަރާއި 8 ވަނަ އޯވަރުގައި ބެންގަލޫރުގެ އޯޕަނިން ދެ ބެޓްސްމަނުން ނުބައިކޮށް މެޗުގެ ކޮންޓްރޯލް ނެގި އެވެ. ނުވަ ވަނަ އޯވަރުގައި ބެންގަލޫރުގެ ތަރި ވިރާތު ކޯލީ ނުބައިކޮށް އޯލްރައުންޑަރު ޑޭވިޑް ވިލީގެ ވިކެޓުވެސް ނެގި އެވެ. ބެންގަލޫރުން މެޗު އަނބުރާލީ 13 ވަނަ އޯވަރުގައި ތަޖުރިބާކާރު ކުޅުންތެރިޔާ ޑިނޭޝް ކާތިކް ކުޅެން އެރުމާ އެކުގަ އެވެ. ކާތިކް އާއި ޝަހްބާޒު އަހުމަދުގެ މޮޅު ކުޅުމާ އެކު ބާކީ ފަސް ބޯޅަ އޮއްވައި އެ ޓީމުން މެޗު ކާމިޔާބުކުރި އެވެ.
މި އިނިންގްސް ގައި މެޗުގެ މޮޅު ކުޅުންތެރިޔާގެ މަގާމް ހޯދި ކާތިކް ނުބައިނުވެ 23 ބޯޅައިން 44 ލަނޑު ހެދިއިރު، ޝަހްބާޒު ވަނީ 26 ބޯޅައިން 45 ލަނޑު ހަދައިފަ އެވެ. ރާޖަސްތާނަށް ބަލާއިރު، ޔުޒްވެންދްރަ ޗަހާލް ހަތަރު ހޯވަރުގައި 15 ލަނޑަށް ދެ ވިކެޓު ނެގި އެވެ. އަދި ޓްރެންޓް ބޯލްޓް ވެސް ހަތަރު އޯވަރުގައި 34 ލަނޑަށް ދެ ވިކެޓު ނެގި އެވެ.
މި މެޗުން ބަލިވި ނަމަވެސް ރާޖަސްތާން އޮތީ ތިން މެޗު ކުޅުނުއިރު ލީގުގެ އެއްވަނައިގަ އެވެ. މިރޭ ކުޅޭ މެޗުގައި މުމްބާއީގެ މައްޗަށް ކޮލްކަތާއިން ކުރި ހޯދައިފިނަމަ އެ ޓީމަށް އެއް ވަނަ އަށް ޖެހި ލެވޭނެ އެވެ. މި މެޗަށް ނުކުންނައިރު މުބާރާތުގެ އެންމެ ކާމިޔާބު ޓީމު މުމްބާއީ އަދި މެޗަކުން މޮޅު ނުވެ އެވެ. އަނެއްކޮޅުން އެންމެ ފަހުގެ ޗެމްޕިއަން ޗެންނާއީ ވެސް ވަނީ މިހާތަނަށް ކުޅުނު ތިން މެޗުން ވެސް ވަނީ ބަލިވެފަ އެވެ.
