ސްރީލަންކާއަށް ބޭނުންވާ ބޭސް ގަންނަން ދުނިޔޭގެ ސިއްހަތު ޖަމިއްޔާ (ޑަބްލިއުއެޗްއޯ) އިން ދެ މިލިއަން ޑޮލަރު ފޯރުކޮށްދޭން ނިންމައިފި އެވެ.
ބޭހާއި ސިއްހީ ދާއިރާއަށް ބޭނުންވާ ސާމާނުގެ ދަތިކަން ކުރިމަތިވެ، ސިއްހީ ކުއްލި ހާލަތު ސްރީލަންކާގައި އިއުލާން ކުރީ މިދިޔަ އަންގާރަ ދުވަހު އެވެ.
ސިއްހީ ކުއްލި ހާލަތު އިއުލާން ކުރުމުން، ދައުލަތުން ސިއްހީ ހިދުމަތްދޭ ފެސިލިޓީތަކުގައި އަންގާރަ ދުވަހުން ފެށިގެން އިސްކަންދެނީ އެމެޖެންސީ އަދި އަވަސް ފަރުވާއަށް އެކަންޏެވެ.
ބޭހުގެ ދަތިކަން ކުރިމަތިވި ސިއްހީ ނިޒާމަށް ބުރޫ އަރާފައި ވާތީ ޑަބްލިއުއެޗްއޯއިން އެހީތެރިކަން ފޯރުކޮށްދޭން ނިންމީ ލަންކާ ސަރުކާރުގެ އެދުމަކަށް ކަމަށް ނޫސްތަކުން ބުނެ އެވެ.
އިގްތިސާދީ ކާރިސާއެއް ކުރިމަތިވެ، ޑޮލަރުގެ ދަތިކަމާ ހެދި ލަންކާއަށް ބޭނުންވާ ޒަރޫރީ ތަކެތީ އިމްޕޯޓް ނުކުރެވުމުގެ ސަބަބުން ކަރަންޓުގެ ހިދުމަތް ކެނޑި އާއްމު ދިރިއުޅުމަށް ވަނީ ބުރޫ އަރާފަ އެވެ.
މިހާރު ލަންކާގައި ކޮންމެ ދުވަހަކު ވެސް ރައްޔިތުން ދަނީ ރައީސް ގޮތަބަޔާ ރާޖަޕަކްސަ އާއި ބޮޑު ވަޒީރު މަހިންދަ ރާޖަޕަކްސަގެ އިސްތިއުފާއަށް ގޮވާލައި މުޒާހަރާ ކުރަމުންނެވެ.
އާދީއްތަ ދުވަހުގެ ރޭ ކެބިނެޓު އިސްތިއުފާ ދިން ނަމަވެސް، ގޮތަބަޔާ ހޯމަ ދުވަހު ވިދާޅުވީ އިސްތިއުފާ ނުދެއްވާނެ ކަމަށެވެ. އިދިކޮޅު ޕާޓީތަކުން ރައީސަށް އެއްބާރުލުންދީ، ކެބިނެޓުގެ މަގާމުތައް ގަބޫލުކުރުމަށް ދައުވަތު ދިން ނަމަވެސް، ޕާޓީތަކުން އެ ދައުވަތު ގަބޫލުކޮށްފައެއް ނުވެ އެވެ.
