ސްރީލަންކާގެ ރައީސްގެ ބާރުތައް ކުޑަކޮށް، ޖަވާބުދާރީ ކުރުމުގެ ނިޒާމު ހަރުދަނާ ކުރެވޭނެ ފަދަ އިސްލާހުތަކެއް ގާނޫނު އަސާސީއަށް ގެންނަން އިދިކޮޅު ލީޑަރު ސަޖިތު ޕްރޭމަދާސަ ގޮވާލައްވައިފި އެވެ.
"މި ހަފްތާގެ ތެރޭގައި އަޅުގަނޑުމެން ކުރަންވީ ކަމަކީ މިހާރު މި އޮތް ނިޒާމް ބަދަލުކުރުން. އެއީ ރައީސަށް ބޮޑެތީ ބާރުތަކެއް ލިބިދޭ ނިޒާމެއް. މިހާރު ހުރި ވަސީލަތްތަކުގެ އެހީގައި ވެސް މި ހަފްތާ ތެރޭގައި މި ބަދަލު ގެނެވިދާނެ،" އަންގާރަ ދުވަހު ކުރިއަށް ދިޔަ ޕާލިމެންޓް ބައްދަލުވުމުގައި ޕްރޭމަދާސަ ވިދާޅުވި އެވެ.
"އަޅުގަނޑުމެންނަށް ބޭނުން ވަނީ ހަރުދަނާ ނިޒާމެއް. އެއީ ރައީސް އާއި ބޮޑު ވަޒީރަށް ވެސް އެކަކު އަނެކަކު ޖަވާބުދާރީ ކުރެވޭނެ ނިޒާމެއް."
އޭގެ އިތުރުން ސަރުކާރު ބަދަލު ކުރުމުގެ ދަޅަ ދެއްކުމުގެ ގޮތުން ކެބިނެޓުގެ އެކި މިނިސްޓްރީތަކުގައި ތިބި ފަރާތްތަކުގެ މެދުގައި "މިޔުޒިކަލް ޗެއާ" ކުޅޭ އިރު އެކަމުގައި އިދިކޮޅުން ބައިވެރި ނުވާނެ ކަމަށް ޕްރޭމަދާސަ ވިދާޅުވި އެވެ.
އޭނާ އެހެން ވިދާޅުވި އިރު، އިންތިގާލީ ސަރުކާރު ގާއިމް ކުރުމަށް ކަމަށް ބުނެ ރައީސް ގޮތަބަޔާ ރާޖަޕަކްސަ ވަނީ އިދިކޮޅު ޕާޓީތަކުން ކެބިނެޓުގެ މިނިސްޓްރީތަކާ ހަވާލުވުމަށް ދައުވަތު ދީފަ އެވެ. ނަމަވެސް ޕާޓީތަކުން އެ ދައުވަތު ބަލައެއްނުގަތެވެ.
އަންގާރަ ދުވަހުގެ ޕާލިމެންޓު ބައްދަލުވުމުގައި ލަންކާގެ ކުރީގެ ބޮޑު ވަޒީރު ރަނިލް ވިކްރަމަސިންހަ ވިދާޅުވީ އެކުވެރި ގައުމުތަކާއި ޖަމިއްޔާތަކުން ލަންކާއަށް މާލީ އެހީ ފޯރުކޮށްދޭން ތައްޔާރު ކަމަށާއި ކާރިސާއިން އަރައިގަނެވޭނެ ގޮތެއް ޕާލިމެންޓުގެ ތެރެއިން ހޯދަން ޖެހޭ ކަމަށެވެ.
އެގޮތުން އިންޑިއާ، ޗައިނާ، ޖަޕާން، ދެކުނު ކޮރެއާ އަދި ޔޫރަޕިއަން ޔޫނިއަން (އީޔޫ) ގެ އެހީ ލިބޭނެ ކަމަށާއި ވޯލްޑް ބޭންކާއި އިންޓަނޭޝަނަލް މަނިޓަރީ ފަންޑް (އައިއެމްއެފް) އާއި އޭޝިއަން ޑިވެލޮޕްމަންޓް ބޭންކް (އޭޑީބީ) ގެ އެހީ ލިބޭނެ ކަމަށް ވިދާޅުވި އެވެ.
މިދިޔަ ހުކުރު ދުވަހު ސްރީލަންކާގައި ކުއްލި ނުރައްކަލުގެ ހާލަތު އިއުލާނު ކުރި ފަހުން، އަންގާރަ ދުވަހު ބޭއްވި ފުރަތަމަ ޕާލިމެންޓް ބައްދަލުވުމުގައި ބަހުސް ކުރަން ހުޅުވާލީ ގައުމަށް ދިމާވެފައިވާ އިގްތިސާދީ އަދި ސިޔާސީ ކާރިސާއާ ގުޅޭ ގޮތުންނެވެ.
ބައްދަލުވުން ކުރިއަށް ދިޔަ އިރު ޕާލިމެންޓް ކައިރީގައި އާއްމުން ދިޔައީ މުޒާހަރާ ކުރަމުންނެވެ. އަންގާރަ ދުވަހުގެ ބައްދަލުވުން މެދުކަނޑާލީ ބުދަ ދުވަހު ހެނދުނު 10:00 ޖަހާއިރު އަލުން ބަހުސް ކުރިއަށް ދާނެކަން އިއުލާން ކުރުމަށް ފަހު އެވެ.
