ސްރީލަންކާގެ ހަކަތައާ ބެހޭ ކަންކަމަށް ހާއްސަ މިނިސްޓަރެއް ވީ އެންމެ އަވަހަކަށް އައްޔަނުކުރުމަށް ޕަބްލިކް ޔުޓިލިޓީޒް ކޮމިޝަން އޮފް ސްރީލަންކާ (ޕީޔޫސީއެސްއެލް) އިން ރައީސް ގޮތަބަޔާ ރާޖަޕަކްސައަށް ގޮވާލައްވައިފި އެވެ.
ރައީސަށް ފޮނުއްވި ސިޓީއެއްގައި ޕީޔޫސީއެސްއެލްގެ ޗެއާމަން ޖަނަކަ ރަތުނަޔަކެ ވިދާޅުވީ ހަކަތައާ ގުޅުން ހުރި ސީރިއަސް ކާރިސާއެއް ގައުމުގައި އެބަ އޮތް ކަމަށާއި އެއީ ޖެނެރޭޓަރުތަކަށް ބޭނުންވާ ތެޔޮ ނުލިބޭތީ ދިމާވެފައިވާ ކާރިސާއެއް ކަމަށެވެ.
ލަންކާގެ އެކި ހިސާބުތަކުގައި ކޮންމެ ދުވަހަކު ވެސް ރައްޔިތުން ކުރަމުންދާ މުޒާހަރާގައި އެންމެ ބޮޑަށް ފާހަގަކުރާ އެއް މައްސަލައަކީ ކަރަންޓު ނުލިބުމުގެ މައްސަލަ އެވެ. ކޮންމެ ދުވަހަކު ވެސް ގިނައިރުތަކެއް ވަންދެން ހުންނަނީ ކަރަންޓު ކަނޑާލާފަ އެވެ.
ޕީޔޫސީއެސްއެލްގެ ޗެއާމަން ވިދާޅުވީ ވަގުތުން ވަގުތަށް ހައްލު ބޭނުންވާ އެންމެ ބޮޑު މައްސަލައަކީ ހަކަތައިގެ މައްސަލަ ކަމަށާއި އެހެންކަމުން އެ ދާއިރާގެ މަސައްކަތް ރަނގަޅަށް ކުރެވޭނެ ތަޖުރިބާ ހުރި މީހަކު މިނިސްޓަރުކަމަށް އައްޔަނުކުރުން މުހިއްމު ކަމަށެވެ.
މިދިޔަ އާދީއްތަ ދުވަހުގެ ރޭ ލަންކާގެ މުޅި ކެބިނެޓު އިސްތިއުފާ ދީފައިވާ އިރު، ހޯމަ ދުވަހު އައްޔަނު ކުރީ ހަތަރު މިނިސްޓަރުންނެވެ. އޭގެ ތެރެއިން ފިނޭންސް މިނިސްޓަރު އަލީ ސަބްރީ ވަނީ 24 ގަޑިއިރު ނުވަނީސް އިސްތިއުފާ ދެއްވާފަ އެވެ.
