ސްރީލަންކާގެ އާ ފިނޭންސް މިނިސްޓަރު އަލީ ސަބްރީ މަގާމާ ހަވާލުވެވަޑައިގެންނެވިތާ އެއް ދުވަސް ތެރޭގައި އިސްތިއުފާ ދެއްވައިފި އެވެ.
ކުރިން ޖަސްޓިސް މިނިސްޓަރުގެ މަގާމުގައި ހުންނެވި ސަބްރީ ފިނޭންސް މިނިސްޓަރުގެ ހުވާ ކުރެއްވީ ހޯމަ ދުވަހުގެ ހެނދުނު، ލަންކާގެ މުޅި ކެބިނެޓު އެއްކޮށް އިސްތިއުފާ ދިނުމުންނެވެ.
ސަބްރީ ފިނޭންސް މިނިސްޓަރު ކަމަށް އައްޔަނު ކުރުމަކީ ސަރުކާރު ހިންގާ ކޯލިޝަނުގައި އޮތް ސްރީލަންކާ ފްރީޑަމް ޕާޓީ (އެސްއެލްއެފްޕީ) އިން ހިތްހަމަޖެހޭ ކަމެއް ނޫނެވެ.
އެހެންކަމުން އެސްއެލްއެފްޕީ އިން ހޯމަ ދުވަހު ވަނީ ސަރުކާރު ކޯލިޝަނަކާ ވަކިވެފަ އެވެ. އެއާއެކު ޕާލިމެންޓުގައި ސަރުކާރަށް އޮތް 2/3 މެޖޯރިޓީ ގެއްލުނެވެ.
އަންގާރަ ދުވަހު ޕާލިމެންޓް ބައްދަލުވުން ފަށައިގެން ކުރިއަށްދާ އިރު، ސަރުކާރުން މިހާރު މަސައްކަތް ކުރަނީ 113 ގޮނޑީގެ ސިމްޕަލް މެޖޯރިޓީ ހޯދައިގެން ވެރިކަމުގައި ދެމިއޮތުމަށެވެ.
