ބޭހާއި ސިއްހީ ދާއިރާއަށް ބޭނުންވާ ސާމާނުގެ ދަތިކަން ކުރިމަތިވެ، ސިއްހީ ކުއްލި ހާލަތު ސްރީލަންކާގައި އިއުލާންކޮށްފި އެވެ.
ސިއްހީ ކުއްލި ހާލަތު އިއުލާން ކުރުމުން، ދައުލަތުން ސިއްހީ ހިދުމަތްދޭ ފެސިލިޓީތަކުގައި އަންގާރަ ދުވަހުން ފެށިގެން އިސްކަންދޭނީ އެމެޖެންސީ އަދި އަވަސް ފަރުވާއަށް އެކަންޏެވެ.
އިގްތިސާދީ ކާރިސާއެއް ކުރިމަތިވެ، ޑޮލަރުގެ ދަތިކަމާ ހެދި ލަންކާއަށް ބޭނުންވާ ޒަރޫރީ ތަކެތީ އިމްޕޯޓް ނުކުރެވުމުގެ ސަބަބުން ކަރަންޓުގެ ހިދުމަތް ކަނޑައި އާއްމު ދިރިއުޅުމަށް ވަނީ ބުރޫ އަރާފަ އެވެ.
މިހާރު ލަންކާގައި ކޮންމެ ދުވަހަކު ވެސް ރައްޔިތުން ދަނީ ރައީސް ގޮތަބަޔާ ރާޖަޕަކްސަ އާއި ބޮޑު ވަޒީރު މަހިންދަ ރާޖަޕަކްސަގެ އިސްތިއުފާއަށް ގޮވާލައި މުޒާހަރާ ކުރަމުންނެވެ.
އާދީއްތަ ދުވަހުގެ ރޭ ކެބިނެޓުން އިސްތިއުފާ ދިން ނަމަވެސް، ގޮތަބަޔާ ހޯމަ ދުވަހު ވިދާޅުވީ އިސްތިއުފާ ނުދެއްވާނެ ކަމަށެވެ. އިދިކޮޅު ޕާޓީތަކުން ރައީސަށް އެއްބާރުލުންދީ، ކެބިނެޓުގެ މަގާމުތައް ގަބޫލުކުރުމަށް ދައުވަތު ދިން ނަމަވެސް، ޕާޓީތަކުން އެ ދައުވަތު ގަބޫލުކޮށްފައެއް ނުވެ އެވެ.
ސިއްހީ ކުއްލި ހާލަތު އިއުލާނު ކުރުން
ގަވަމަންޓް މެޑިކަލް އޮފިސާޒް އެސޯސިއޭޝަން (ޖީއެމްއޯއޭ) އިން ހޯމަ ދުވަހު ބޭއްވި ބައްދަލުވުމަކަށް ފަހު ނިންމީ ސިއްހީ ކުއްލި ހާލަތު އިއުލާން ކުރުމަށެވެ.
މުޅި ސްރީލަންކާގައި ވެސް ބޭހާއި ސިއްހީ މަސައްކަތަށް ބޭނުންވާ ސާމާނުގެ ދަތިކަން ކުރިމަތިވަމުންދާ އިރު، އެމެޖެންސީ ހިދުމަތް ދިނުމުގައި ވެސް ހޮސްޕިޓަލްތަކަށް ގޮންޖެހުންތައް އެބަ ހުރި ކަމަށް ޖީއެމްއޯއޭއިން ބުނެ އެވެ.
"ސަރުކާރާއި ހެލްތު މިނިސްޓްރީ ވެސް ވަނީ ސިއްހީ ދާއިރާ ހުއްޓުމަކަށް ނާންނަ ގޮތަށް މަސައްކަތް ކުރުމުގައި ފެއިލްވެފައި،" ޖީއެމްއޯއޭގެ ބަޔާނެއްގައި ބުންޏެވެ.
"ރައްޔިތުންގެ ދިރިހުރުމުގެ ހައްގާއި އަސާސީ ސިއްހީ ހިދުމަތުގެ ހައްގު ވެސް ސަރުކާރަށް ކަށަވަރުކޮށް ނުދެވުނު."
ސްރީލަންކާގައި އޮންނަނީ ޔުނިވާސަލް ޕަބްލިކް ހެލްތު ސިސްޓަމެކެވެ. އެ ނިޒާމަށް ރައްޔިތުންގެ އަތުން ނަގާ ޓެކްސް ފައިސާއިން ފަންޑު ކުރާއިރު، ދައުލަތުގެ ކޮންމެ ފެސިލިޓީއަކުން ވެސް ރައްޔހިތުންނަށް ހިލޭ ބޭސް ފަރުވާ ލިބޭނެ އެވެ.
