މަގާމުން އިސްތިއުފާ ނުދެއްވާނެ ކަމަށާއި ޕާލިމެންޓުގައި 113 ގޮނޑި އޮތް ޕާޓީއަކަށް ސަރުކާރު ހިންގަން ހަވާލު ކުރަން ތައްޔާރު ކަމަށް ސްރީލަންކާގެ ރައީސް ގޮތަބަޔާ ރާޖަޕަކްސަ ވިދާޅުވެއްޖެ އެވެ.
ވެރިކަން ހިންގާ ކޯލިޝަނުގައި ހިމެނުނު ސްރީލަންކާ ފްރީޑަމް ޕާޓީ (އެސްއެލްއެފްޕީ) އިން ހޯމަ ދުވަހު ވަނީ ކޯލިޝަނާ ވަކިވާން ނިންމާފަ އެވެ. އެއާ އެކު ސަރުކާރު ހިންގާ ކޯލިޝަނަށް ޕާލިމެންޓުގައި ލިބުނު 2/3 މެޖޯރިޓީ ވަނީ ގެއްލިފަ އެވެ.
ސްރީލަންކާއަށް ކުރިމަތިވެފައިވާ އިގްތިސާދީ ކާރިސާގެ ސަބަބުން ހިތްހަމަނުޖެހިފައިވާ ރައްޔިތުން އެކި ހިސާބުތަކުގައި މެދުނުކެނޑި މުޒާހަރާ ކުރާތީ، ހައްލެއް ހޯދުމުގެ މަސައްކަތް ރައީސް ހޯމަ ދުވަހު ވެސް ކުރެއްވި އެވެ.
ހޯމަ ދުވަހުގެ ބައްދަލުވުންތަކުގައި ގޮތަބަޔާ ވިދާޅުވީ ރައީސްކަމުން އިސްތިއުފާ ނުދެއްވާނެ ކަމަށެވެ. ނަމަވެސް ޕާލިމެންޓުގައި 113 ގޮނޑި ކަށަވަރު ކުރާ ޕާޓީއަކަށް ސަރުކާރު ހިންގަން ހަވާލުކުރާނެ ކަމަށެވެ.
އަންގާރަ ދުވަހު ހެނދުނު ޕާލިމެންޓު ބައްދަލުވުން ފަށާފައިވާ އިރު، 113 ގޮނޑި ކަށަވަރުވާ ޕާޓީއެއް ބެލުމަށް ވޯޓަށް އަހާނެ ކަމަށް ބެލެވެ އެވެ. ޕާލިމެންޓު ބައްދަލުވުން ކައިރިއަށްދާ އިރު، އެ ސަރަހައްދުގައި މި ވަގުތު ވެސް ދަނީ އާއްމުން މުޒާހަރާ ކުރަމުންނެވެ.
ރިޕޯޓުތައް ބުނާ ގޮތުން ގޮތަބަޔާގެ އެސްއެލްޕީޕީއިން މިހާރު މަސައްކަތް ކުރަނީ 113 ގޮނޑީގެ "ސިމްޕަލް މެޖޯރިޓީ" އާއެކު ސަރުކާރުގައި ދެމިއޮތުމަށެވެ.
ނަމަވެސް އަންގާރަ ދުވަހުގެ ޕާލިމެންޓު ބައްދަލުވުމުގައި އެސްއެލްޕީޕީއަށް 113 ގޮނޑި ނުލިބޭ ނަމަ، ޕާލިމެންޓުގެ ރައީސަށް ދަންނަވައި، އާ ބޮޑު ވަޒީރަކާ ގުޅޭ ބަހުސް ފަށާނެ އެވެ.
