ސްރީލަންކާގެ ކުރީގެ ރައީސް މައިތްރިޕާލާ ސިރިސޭނާގެ ސްރީލަންކާ ފްރީޑަމް ޕާޓީ (އެސްއެލްއެފްޕީ) އިން ސަރުކާރު ހިންގާ ކޯލިޝަނާ ވަކިވެއްޖެ އެވެ.
ސިރިސޭނާއަކީ އެސްއެލްއެފްޕީގެ ޗެއާޕާސަން އެވެ. އެ ޕާޓީއިން ބުނީ ސަރުކާރު ހިންގާ ކޯލިޝަނާ ވަކިވެ، ޕާލިމެންޓުގައި ދެމިއޮންނާނީ ވަކިން ކަމަށެވެ.
ޑެއިލީ މިރާ ނޫހުން ބުނި ގޮތުގައި ލަންކާއަށް އިންތިގާލީ ސަރުކާރެއް ގެނައުމާ މެދު އެސްއެލްއެފްޕީގެ ވެރިން ރައީސް ގޮތަބަޔާ ރާޖަޕަކްސައާ އެކު ކުއްލި ބައްދަލުވުމެއް ހޯމަ ދުވަހު ބޭއްވި އެވެ.
ރައީސް އޮފީހުގައި އޮތް ބައްދަލުވުމުގައި ބޮޑު ވަޒީރު މަހިންދަ ރާޖަޕަކްސަ ވެސް ބައިވެރިވެވަޑައިގެންނެވި އެވެ. އެ ބައްދަލުވުމުގައި ސަރުކާރު ކޯލިޝަނުގެ 132 ޕާލިމެންޓު މެމްބަރުން ބައިވެރިވެވަޑައިގެންނެވި އެވެ.
އެކަމަކު އެ ބައްދަލުވުމުން އެސްއެލްއެފްޕީ ބޭނުންވާ ނަތީޖާއެއް ނުލިބުނެވެ. އެހެންކަމުން ސަރުކާރު ހިންގާ ކޯލިޝަނާ ވަކިވެ، އަންގާރަ ދުވަހު ޕާލިމެންޓުގައި ސިރިސޭނާ އެކަން އިއުލާނު ކުރައްވާނެ އެވެ.
އެސްއެލްއެފްޕީއިން ހިތްހަމަނުޖެހޭ އެންމެ ބޮޑު މައްސަލައަކީ އިންތިގާލީ ސަރުކާރުގެ ފިނޭންސް މިނިސްޓަރު ކަމަށް އަލީ ސަބްރީ އައްޔަނު ކުރެއްވުމާއި އިގްތިސާދީ ކާރިސާއެއް އޮތް ދަނޑިވަޅުގައި ހައިވޭ މިނިސްޓަރެއް އައްޔަނު ކުރެއްވުމެވެ.
އޭގެ އިތުރުން ތެލާއި ހަކަތައިގެ ބޮޑު ކާރިސާއެއް ދިގުދެމިގެންދާ އިރު، ހަކަތައާ ގުޅޭ މިނިސްޓަރެއް ނެތުމުން ވެސް އެސްއެލްއެފްޕީއިން ހިތްހަމަނުޖެހެ އެވެ.
