ކޮވިޑް-19 ގެ ބަލިމަޑުކަން ކޮންޓްރޯލްކުރަން 2020 ވަނަ އަހަރު ރާއްޖޭގެ ބޯޑަރުތައް ބަންދުކުރުމަށް ފަހު އަލުން ހުޅުވަން އިސްނެގީ ސަރުކާރުންތޯ ނުވަތަ އެކަމަށް ބާރު އެޅީ ރައްޔިތުންގެ މަޖިލީހުންތޯ މިއީ މަޖިލީހުގެ މިއަދުގެ ޖަލްސާގެ އެޖެންޑާގައި އޮތްކަމެއް ނޫނެވެ. އެކަމަކު މިއަދުގެ ޖަލްސާގައި އެންމެ ބޮޑު ބަހުސެއް ކުރިއަށް ދިޔައީ އެ ސުވާލާ ގުޅިގެންނެވެ.

އެކަން ބަހުސަކަށް ވީ ފޮރިން ސާވިސްގެ ގާނޫނަށް އިސްލާހު ގެންނަން ސަރުކާރުން ހުށަހެޅި ބިލުގެ ބަހުސްގައި މެމްބަރަކު ދެއްކެވި ވާހަކައަކަށް ރިޔާސަތުން މަޖިލީހުގެ ރައީސް މުހައްމަދު ނަޝީދު ރައްދު ދެއްވުމުންނެވެ. އެ ބިލުގެ ބަހުސްގައި ދާންދޫ ދާއިރާގެ އެމްޑީޕީ މެމްބަރު ޔައުގޫބް އަބްދުﷲ ވިދާޅުވީ ބަލިމަޑުކަމާ ގުޅިގެން އަވަށްޓެރި ސްރީލަންކާއަށް ޖެހުނު ހާލު ރާއްޖެއަށް ނުޖެހުމުގެ އެންމެ މުހިއްމު ސަބަބަމީ ރާއްޖޭގެ ބޯޑަރު ހުޅުވައިލަން ޖެހޭ މުހިއްމު ވަގުތުގައި ބޯޑަރު ހުޅުވައިލުމުން ކަމަށެވެ. އެކަން އެގޮޮތަށް ކުރެއްވީ ރައީސް އިބްރާހީމް މުހައްމަދު ސޯލިހުކަމަށް ވިދާޅުވެ، އެމަނިކުފާނަށް ޔައުގޫބު ތައުރީފު ކުރެއްވި އެވެ.

"އެންމެ ދެތިން ގައުމު ދުނިޔެއަށް ހުޅުވައިލެވިގެން ދިޔައިރު ދިވެހިރާއްޖެ އޭގެ ތެރޭގައި ހިމެނިގެން ދިއުމަކީ އެއީ ރާއްޖޭގެ މިއަދުގެ ސަރުކާރުގެ ގާބިލުކަމާ ކެބިނެޓްގެ ކުޅަދާނަކަމުގެ ހެއްކެއް،" ޔައުގޫބް ވިދާޅުވި އެވެ.

އެކަމުގެ ޝުކުރުގެ ލިސްޓްގައި ފިނޭންސް މިނިސްޓަރު އިބްރާހީމް އަމީރާއި އިކޮނޮމިކް މިނިސްޓަރު ފައްޔާޒް އިސްމާއީލްގެ ނަން ޔައުގޫބު ހިމެނުއްވި އެވެ.

އެމްޑީޕީގެ ޗެއާޕާސަން ހޮވުމުގެ އިންތިހާބަށް ކުރާ ކެމްޕޭންގައި، ފައްޔާޒަށް ތާއީދުކުރައްވާ މެމްބަރުންގެ ތެރޭގައި ހިމެނިވަޑައިގަންނަވާ ޔައުގޫބްގެ މިވާހަކައަށް ރިޔާސަތުން ނަޝީދު ރައްދު ދެއްވި އެވެ.

އެމަނިކުފާނު ސާފުކޮށް ވިދާޅުވީ ބޯޑަރު ހުޅުވުމަށް ސަރުކާރުން ހުރަސް އަޅަމުން ގެންދިޔަ ގޮތް މަޖިލީހުގެ ޔައުމިއްޔާތަކުން ފެންނަން އެބަ އޮތް ކަމަށެވެ. އެ މައުލޫމާތު އާއްމުކޮށް ލިބޭނެ އިންތިޒާމް ހަމަޖައްސަަވައިދެއްވާނެ ކަމަށް ވެސް އެމަނިކުފާނު ވިދާޅުވި އެވެ.

"އަޅުގަނޑު ރެކޯޑަށް ޓަކައި އަދި މިތަނުގެ ޔައުމިއްޔާއަށް ޓަކައި ދަންނަވަން ޖެހޭ. އިރާދަކުރެއްވިއްޔާ އިއްޒަތްތެރި މެމްބަރުންނަށް ބޯޑަރު ހުޅުވުމާ ގުޅޭ ގޮތުން މިތަނުގެ ކޮމިޓީތަކުގައި ދެކެވުނު ވާހަކަތަކާއި ސަރުކާރުން އެކަމަށް ހުރަސްއަޅުއްވަމުން ގެންދިޔަ ގޮތް އަދި ބައެއް އިއްޒަތްތެރި މެމްބަރުން ވެސް އެކަމާ ނުރުހުން ފާޅުކުރައްވަމުން ގެންދިޔަ ގޮތް އިރާދަކުރެއްވިއްޔާ ސާފުކޮށް މި އިއްޒަތްތެރި މަޖިލީހުގެ މެމްބަރުންނާއި ރާއްްޖޭގެ ރައްޔިތުންނަށް ސާފުކޮށް އެނގޭނެ ގޮތް އަޅުގަނޑު ހަމަޖައްސައިދޭނަން،" ނަޝީދު ވިދާޅުވި އެވެ.

އޭގެ ފަހުން ވާހަކަ ދެއްކެވި މާވަށު ދާއިރާގެ ޕީއެންސީ މެމްްބަރު މުހައްމަދު ސައީދު ވެސް ވިދާޅުވީ ސަރުކާރުން އޭރު މަސައްކަތްކުރީ ބޯޑަރު ނުހުޅުވޭނެ ގޮތްތައް ހޯދަން ކަމަށެވެ.

"މިވާހަކަ އަަޅުގަނޑު ހަމަ [މިދެންނެވީ ] ތާރީހަށް ޓަކައި، ފެކްޓް ޗެކެއް ހެެއްދެވިޔަސް ވަރިހަމަ މިކަން ހިނގި ގޮތް ދަންނަވާލީ،" ސައީދު ވިދާޅުވި އެވެ.

ހަނިމާދޫ ދާއިރާގެ އެމްޑީޕީ މެމްބަރު އަބްދުލް ޣަފޫރު މޫސާ ސައީދަށް ރައްދު ދެއްވަމުން ވިދާޅުވީ ކޮވިޑަށް ފަހު ރާއްޖޭގެ އިގުތިސާދު ރަނގަޅުވީ ސަަރުކާރާއި މަޖިލީހުން ކުރި މަސައްކަތުން ކަމަށެވެ. އެހެން ނަމަވެސް އޭނާ ނުސީދާ ގޮތެއްގައި ރައީސް ނަޝީދަށް ވެސް ރައްދު ދެއްވި އެވެ. ޣަފޫރު ވިދާޅުވީ ރާއްޖޭން ހޯދި ނަތީޖާއަކީ ސަރުކާރުގެ ހިތްވަރުން ހޯދި ނަތީޖާއެއް ކަމަށެވެ.

މިއަދުގެ ހާޒިރީ

• ހާޒިރުވެވަޑައިގެންނެވީ: 35 މެމްބަރުން
• ސަލާމުގައި: 09 މެމްބަރުން

ކަނޑީތީމު ދާއިރާގެ އެމްޑީޕީ މެމްބަރު އަބްދުﷲ ޝަހީމް އަބްދުލް ހަކީމް ވިދާޅުވީ ކޮވިޑަށް ފަހު ޕާކިސްތާނާއި ސްރީލަންކާ ފަދަ ގައުމުތައް ވެއްޓުނު ހާލަތަށް ރާއްޖެ ނުވެއްޓި އޮތީ ރައީސް އިބްރާހީމް މުހައްމަދު ސޯލިހާއި އިކޮނޮމިކް މިނިސްޓަރު ފައްޔާޒް އިސްމާއީލާއި ފިނޭންސް މިނިސްޓަރު އިބްރާހީމް އަމީރުގެ ދުރު ވިސްނުމުގެ ސަބަބުން ކަމަށެވެ.

ދުވަހުގެ ފޮޓޯ

ރައްޔިތުންގެ މަޖިލީހުގެ މިއަދުގެ ޖަލްސާގައި މެމްބަރުން އެއްބޭފުޅަކު އަނެއް ބޭފުޅަކާ ވާހަކަދައްކަވަނީ

ދުވަހުގެ ކޯޓޭޝަން

އަޅުގަނޑު ރެކޯޑަށް ޓަކައި އަދި މިތަނުގެ ޔައުމިއްޔާއަށް ޓަކައި ދަންނަވަން ޖެހޭ. އިރާދަކުރެއްވިއްޔާ އިއްޒަތްތެރި މެމްބަރުންނަށް ބޯޑަރު ހުޅުވުމާ ގުޅޭ ގޮތުން މިތަނުގެ ކޮމިޓީތަކުގައި ދެކެވުނު ވާހަކަތަކާއި ސަރުކާރުން އެކަމަށް ހުރަސްއަޅުއްވަމުން ގެންދިޔަ ގޮތް އަދި ބައެއް އިއްޒަތްތެރި މެމްބަރުން ވެސް އެކަމާ ނުރުހުން ފާޅުކުރައްވަމުން ގެންދިޔަ ގޮތް އިރާދަކުރެއްވިއްޔާ ސާފުކޮށް މި އިއްޒަތްތެރި މަޖިލީހުގެ މެމްބަރުންނާއި ރާއްްޖޭގެ ރައްޔިތުންނަށް ސާފުކޮށް އެނގޭނެ ގޮތް އަޅުގަނޑު ހަމަޖައްސައިދޭނަން--ރައީސް ނަޝީދު

ފައްޔާޒްގެ ކެމްޕޭންގައި އިސްކޮށް އުޅުއްވާ އަދި އެމްޑީޕީގެ އަންހެނުންގެ ގޮފީގެ ރައީސްކަމަށް ވާދަކުރައްވާ އައްޑޫ މީދޫ ދާއިރާގެ މެމްބަރު ރޮޒައިނާ އާދަމް ވެސް ވިދާޅުވީ ކޮވިޑްގައި އެކި ދިމަ ދިމާލުން އެެކި ކަހަކަ ފިއްތުންތައް ސަރުކާރަށް އޮތް ކަމަށެވެ.

"އެހެން ނަމަވެސް ރައީސުލް ޖުމްހޫރިއްޔާ މަސައްކަތްކުރައްވާފައި ހުރި ގޮތާއި އެ ތާވަލުތަކަށް ބަލައިލީމާ އެބަ އެނގޭ އިންތިޒާމް ކުރެވިގެން ވަކި ވަގުތެއްގައި ވަކިކަމެއް ކުރެވެމުން ކުރެވެމުން ކަން މިހިސާބަށް އައިސްފައި މިހިރީ. ބޯޑަރު ބަންދުކުރީ ވެސް ހަމަ ވަކި ހިސާބަކަށް ދިޔައިރުގައި ބޯޑަރު ހުޅުވީ ވެސް ގައުމުގެ ހާލަތު ވަކި ހިސާބަކަށް ދިޔައިމާ،" ރޮޒައިނާ ވިދާޅުވި އެވެ.

ރައީސާއި މިނިސްޓަރުންނާ އެއްކޮޅަށް ވާހަކަ ދެއްކެވި މެމްބަރުންނަށް ރައްދު ދެއްވަމުން މާފަންްނު މެދު ދާއިރާގެ މެމްބަރު އިބްރާހީމް ރަޝީދު (ބޮންޑޭ) ވިދާޅުވީ މަޖިލިސް ނުހުޅުވަން ވެސް އޭރު ރައީސް އޮފީހުން ގޮވި ކަމަށެވެ.